“Laat al julle aangeleenthede in liefde geskied”
1 “Julle lede is ’n ware plesier; hulle gedrag is uiters hoflik en eerbiedig.” Hierdie opmerking is gemaak deur ’n kongres- en besoekersburo in ’n Amerikaanse stad waar een van ons streekbyeenkomste gehou is. Dit verbly ons hart om sulke lof te ontvang vir ons gedrag in die openbaar. Dit toon dat ons as ’n groep ‘al ons aangeleenthede in liefde laat geskied’ (1 Kor. 16:14). Terselfdertyd is daar ’n paar sake van belang wat, as ons nie aandag daaraan skenk nie, afbreuk sal doen aan die goeie reputasie van God se volk.
2 Kamerbesprekings: In elke byeenkomsstad is ’n Huisvestingsafdeling daargestel om met hotelle, koshuise en privaat individue oor redelike tariewe te onderhandel sodat almal dit kan bekostig om die byeenkoms by te woon. Party word selfs in Koninkryksale gehuisves. Ons broers bestee heelwat tyd en doen baie moeite ter wille van ons. Daarom moet ons die huisvesting waardeer wat voorsien word.
3 Hou asseblief in gedagte dat die kos wat ’n hotel in die oggend vir sy gaste voorsien as sodanig beskou moet word—’n komplimentêre ontbyt vir diegene wat daar bly. Ons is nie veronderstel om hierdie kositems te neem om later te eet of met vriende by die byeenkoms te deel nie.
4 Laat ons aan almal goed doen: Goeie maniere en voorbeeldige gedrag word gemotiveer deur liefde vir Jehovah en vir ons naaste (Matt. 22:37-39; Jak. 3:13). Die Bybel spoor ons aan om liefdevol en bedagsaam teenoor alle mense te wees (Gal. 6:10). Hierdie beginsel is beslis van toepassing wanneer ons in ’n hotel bly. ’n Onwillige gesindheid om ons samewerking te gee, skend ons reputasie, benadeel ons reëling om verminderde tariewe te kry en skep slegte gevoelens onder broers.
5 Die Getuies is bekend vir hulle uitsonderlike standaard van netheid. ’n Byeenkomskomitee het berig: “By een koshuis was die man in beheer aanvanklik nie baie tegemoetkomend nie. Weens die gedrag van die broers en susters het sy gesindheid geleidelik verander. In die oggend het hy met ’n span gekom om die koshuis skoon te maak omdat hy verwag het dat dit vuil en vol rommel sou wees, soos ander groepe dit gelaat het. Hoe verbaas was hy om te vind dat die broers die geboue skoon en netjies gelaat het. Sy kommentaar was: ‘Ek het nog nooit sulke mense gesien nie. Ek wil asseblief hê dat julle ’n aankondiging by julle byeenkoms moet maak om hulle te bedank vir die wonderlike mense wat hulle is.’” Mag ons almal seker maak dat ons hierdie hoë standaard van netheid handhaaf by die byeenkomsterrein, asook by ons huisvesting.
6 Die sekretaris in elke gemeente moet kameraansoekvorms van die Genootskap bestel, as hy dit nog nie gedoen het nie. Die verkondiger moet hierdie vorms voltooi en aan die sekretaris teruggee, wat dit dan na die spesifieke byeenkoms sal stuur. Die brief “Aan alle gemeentes” van 31 Julie 2000 bevat die nodige besonderhede.
7 Ons sien met afwagting uit na die “Daders van God se Woord”-streekbyeenkoms. Is al jou reëlings getref, met inbegrip van dié vir huisvesting en vervoer? Mag ons gedrag waar ons gehuisves word en in die byeenkomsstad altyd die waarheid wat in ons hart is en ons liefde vir ons Skepper weerspieël.