“Streef altyd na wat goed is”
1 Die Christelike lewenswyse behels dat ons ‘altyd streef na wat goed is teenoor alle mense’ (1 Tess. 5:15). Wanneer ons ons streekbyeenkomste bywoon, het ons baie geleenthede om iets goeds vir ander te doen. By hierdie geleenthede trek ons mense se aandag, en almal wat met ons in aanraking kom, vorm opinies van ons op grond van hoe ons hulle behandel. As ons ’n goeie reputasie as Getuies van Jehovah wil behou, moet ons deur ons dade toon dat ons ‘alle soorte mense eer’ (1 Pet. 2:17). Dit sluit in dat ons “nie uit persoonlike belangstelling ’n oog op net [ons] eie sake hou nie, maar ook uit persoonlike belangstelling op dié van die ander” (Fil. 2:4). Kyk hoe dit op die huisvestingreëling vir die byeenkoms van toepassing is.
2 Het jy al reëlings vir verblyf getref? Indien nie, kan jy ’n Kameraansoekvorm by julle gemeente se sekretaris kry, dit invul en aan hom teruggee sodat hy dit kan aanstuur. Ongeag watter soort verblyf jy nodig het, hou asseblief die volgende punte in gedagte, waar dit van toepassing is: (1) Wees geduldig met die personeel of huishoudster en toon respek vir hulle. (2) Hou by die reëls wat die gebruik van die perseel betref. (3) Laat die gebruiklike fooitjie vir die huishoudster of skoonmaakspan.
3 Leer kinders hoe om goed te doen: Dit het al in die verlede gebeur dat kinders wat sonder behoorlike volwasse toesig by hulle blyplek gelaat is, probleme veroorsaak het (Spr. 29:15). In party gevalle was ouers besig met ander bedrywighede en het hulle hulle kinders sonder toesig in die kamer, by die swembad of iewers anders op die perseel gelaat. Party kinders het so luidrugtig geraak dat hulle ander gaste, Getuies sowel as mense wat nie Getuies is nie, gepla en verontrief het.
4 Ouers, dit sal goed wees as julle voor die byeenkoms ’n bietjie tyd neem om met julle kinders te hersien watter soort Christelike gedrag te alle tye en op alle plekke van hulle verwag word (Ef. 6:4). Wys hulle byvoorbeeld daarop dat ware Christelike liefde ‘hom nie onwelvoeglik gedra nie, nie sy eie belang soek nie, nie ergerlik raak nie’ (1 Kor. 13:5). Volwassenes kan meer krag aan hierdie woorde verleen deur vir almal die regte voorbeeld te stel. Kinders, julle kan streef na wat goed is deur julle ouers te gehoorsaam, die hoteleiendom te respekteer en diegene om julle in ag te neem (Kol. 3:20). Terwyl ons eendragtig aan almal probeer goed doen, ‘versier ons die leer van ons Redder, God, in alles’.—Tit. 2:10.
5 Ons goeie gedrag het nie net ’n positiewe uitwerking op die meeste mense wat ons sien nie, maar ook op diegene wat om die een of ander rede krities teenoor ons was. In alles wat ons by die byeenkoms en in die byeenkomsstad doen—hetsy ons op straat loop, in ’n restaurant eet, by ons blyplek ontspan of van geleenthede gebruik maak om informeel te getuig—moet ons Christelike spraak en optrede bewys dat ons wil streef na wat goed is.
[Venster op bladsy 4]
Onthou asseblief:
■ Wees geduldig met die personeel en toon respek vir hulle.
■ Hou by die reëls van die blyplek tot voordeel van al die gaste.
■ Moenie die voorsienings van ’n komplimentêre ontbyt misbruik nie.
■ Hou behoorlik toesig oor jou kinders.