Lewens is op die spel!
1 Die Bybel toon duidelik dat dit Jehovah se wil is “dat alle soorte mense gered moet word”. Maar dit is ook waar dat die lewensvooruitsigte van die miljarde mense op aarde afhang van hulle gesindheid teenoor Jehovah God en sy Koninkryk deur Jesus Christus. ’n Regte gesindheid kan slegs uit “juiste kennis van die waarheid” voortspruit (1 Tim. 2:3, 4). Hoewel ons die mensdom waarsku dat die aarde binnekort van alle goddeloosheid gereinig gaan word om plek te maak vir God se nuwe wêreld van regverdigheid, is ons ook beveel om ’n noodsaaklike lewensreddende werk uit te voer.—Matt. 24:14; 28:19, 20; Rom. 10:13-15.
2 Waarom so dringend? Jesus het gewaarsku dat daar ’n “groot verdrukking [gaan] wees soos daar sedert die begin van die wêreld . . . nie plaasgevind het nie” (Matt. 24:21). Daardie verdrukking sal sy klimaks by Armageddon bereik (Op. 16:16). Die massa mense wat deur vernietiging in die gesig gestaar word as hulle nie op die goeie nuus reageer nie, sluit ons ongelowige familielede, bure, werksmaats, skoolmaats en kennisse in. Ons wil egter “alle soorte mense” bereik in navolging van God, wat sy liefde vir die ganse mensdom geopenbaar het deur sy Seun, Jesus Christus, as ’n losprys vir almal te gee (Joh. 3:16). Ons moet ons ywerig inspan om almal aan te spoor om na God se plek van veiligheid te vlug. As ons die predikingswerk ten volle uitvoer, kan ons bloedskuld vermy.—Eseg. 33:1-7; 1 Kor. 9:16.
3 Wat is ons doel? Die belangrikheid van die predikingswerk word regdeur God se Woord beklemtoon. Soos die apostel Paulus gesê het, ‘dring die liefde wat die Christus het ons’ om in ooreenstemming met God se weë te lewe (2 Kor. 5:14). Daarbenewens beklemtoon Die Wagtoring dikwels die verpligting wat ons het om te getuig. Ons Koninkryksbediening voorsien altyd riglyne oor hoe om die predikingswerk gedoen te kry. Die ouer manne organiseer die werk en moedig ons aan om daaraan deel te neem. Medeverkondigers nooi ons om saam met hulle aan die bediening deel te neem. Ons hoor dikwels hoe ons aanbiedings moet voorberei, tydskrifte en ander lektuur moet aanbied, herbesoeke moet doen, Bybelstudies moet hou en elke geleentheid moet gebruik om te getuig. Al hierdie dinge help ons om ons doel te bereik, naamlik om lewens te red.—1 Kor. 9:22, 23; Ef. 1:13.