Vraebus

◼ Wanneer sal dit gepas wees om nog ’n Gemeentelike Boekstudiegroep te vorm?

Die vorming van ’n nuwe groep moet, indien nodig, oorweeg word sodat die bywoningsyfer by elk van die boekstudies, insluitende die een by die Koninkryksaal, ongeveer 15 of minder is. Waarom word dit aanbeveel?

Wanneer die Gemeentelike Boekstudiegroepe klein gehou word, is dit makliker vir die studiehouer om aandag te skenk aan elkeen wat die boekstudie bywoon. Daarbenewens het almal ’n goeie geleentheid om kommentaar te lewer in ’n omgewing wat bevorderlik is vir die openbare bekendmaking van hulle geloof (Heb. 10:23; 13:15). As daar kleiner groepe op verskillende plekke in die gemeente se gebied is, is dit geriefliker om die Gemeentelike Boekstudie en velddiensvergaderinge by te woon. Gemeentes wat die aantal boekstudiegroepe vermeerder het, het gevind dat die gesamentlike bywoning van die boekstudie ook toegeneem het.

Daar is dalk spesiale omstandighede wat dit raadsaam maak om nog ’n groep te vorm, al sal dit redelik klein wees. Dit is dalk die geval in ’n afgesonderde gebied of waar die huidige boekstudiegroepe beknop is of nie genoeg sitplek het nie. Indien nodig, kan ’n groep gevorm word wat gedurende die dag bymekaarkom ter wille van die bejaardes, skofwerkers of susters wie se mans nie Getuies is nie.

Verskeie geestelike sterk en bedrywige verkondigers, asook ’n bekwame studiehouer en leser, moet na elke boekstudiegroep toegewys word. Broers moet daarna streef om hierdie behoeftes in die gemeente te vul.

Ouer manne kan die gemeente se vooruitgang bevorder deur seker te maak dat die Gemeentelike Boekstudiegroepe ’n redelike grootte is, geestelik goed na omgesien word en op gerieflike plekke bymekaarkom. Wanneer dit ook al prakties is, moet nuwe groepe gevorm word sodat almal ten volle baat kan vind by hierdie unieke geestelike reëling. Kan jy jou huis beskikbaar stel sodat ’n boekstudie daar gehou kan word? Baie wat dit gedoen het, het geestelike seëninge geniet.