Doen goed en ontvang lof!
1 “Hulle het ’n kalmte wat ek nog nooit by enige ander mense gesien het nie.” “Dit is ’n plesier om hierdie groep hier te hê.” Dit is voorbeelde van die talle positiewe kommentare wat ons ná verlede jaar se streekbyeenkomste van mense gekry het, wat die aandag vestig op die goeie reputasie wat ons as ’n organisasie het (Spr. 27:2; 1 Kor. 4:9). Uiteindelik is dit Jehovah wat geloof word (Matt. 5:16). Nog ’n uitstekende geleentheid om God te loof, wag op ons by vanjaar se “Onderrigters van God se woord”-streekbyeenkoms.
2 Ons ontvang elke jaar vriendelike herinneringe in verband met gepaste gedrag by die byeenkoms. Waarom? Want terwyl die gesindheid, kleredrag en gedrag van die wêreld al hoe meer versleg, weier ons om ons daardeur te laat beïnvloed. Ons wil nie hê dat ons goeie reputasie geskend moet word nie (Ef. 2:2; 4:17). Laat ons die volgende vermanings in gedagte hou.
3 Doen goed—by hotelle, karavaanstaanplekke of chalets: Ons is bekend vir ons eerlikheid (Heb. 13:18). Ons moet derhalwe eerlik wees oor die aantal mense wat by ons bly. Ons moenie in die kamer kosmaak as dit nie toegelaat word nie. Een bestuurder het gesê dat hy kamerpryse laag kon hou vir Jehovah se Getuies omdat hy nooit vermiste handdoeke moes vervang nie. Hy weet dat hulle goed na die eiendom sal omsien. Ons sal beslis nie “aandenkings” neem nie. Waar dit gebruiklik is, sal ons eerder ’n gepaste fooitjie laat om waardering te toon vir dienste wat gelewer is. En wees altyd beleef en geduldig wanneer jy met die personeel te doen het.
4 Waarnemers is beïndruk wanneer hulle sien dat ons jongmense hoflik en gehoorsaam is (Ef. 6:1, 2). Ouers, hou asseblief toesig oor julle kinders sodat hulle nie ’n steurnis vir ander word nie, en dit sluit in wanneer hulle die swembad of ander ontspanningsgeriewe gebruik. Niemand moet deure toeslaan of raas nie, veral nie laat in die aand nie.
5 Ons kan goed doen deur bedagsaam te wees teenoor gaste wat nie Getuies is nie en ook die perseel gebruik. Dit is onvanpas om kos by komplimentêre maaltye vir latere gebruik te neem. Ons moet nooit dink dat die reëls by die verblyfplek nie op ons van toepassing is nie.
6 Doen goed—by die byeenkomsterrein: Daar is opgelet dat party byeenkomsgangers geweier het om die saalwagters hulle samewerking te gee en selfs op ’n onchristelike manier met hulle gepraat het. Omdat party byeenkomsgangers nie die instruksies van die broers gevolg het nie en op verbode plekke geparkeer het, is hulle motors weggesleep. ’n “Ek eerste”-gesindheid identifiseer ’n mens beslis nie as iemand wat goed doen nie en dit bring ook nie lof aan Jehovah God nie. Laat ons dus liefde betoon, geduldig wees en ons samewerking gee.—Gal. 5:22, 23, 25.
7 Wanneer die deure om 7:00 vm. oopgemaak word, hardloop party broers en susters en stamp en stoot mekaar om die “beste” sitplekke te kry. Mense is al beseer weens hierdie soort gedrag. Hoewel daar voorgestel is dat ons ’n ligte ete bring om gedurende die middagpouse te eet, is dit nie gepas om tafels in die parkeerterrein te sit om ’n groot maaltyd te bedien nie. Dit sou die indruk gee dat ons die soort pieknieks hou wat by sportgebeurtenisse algemeen is.
8 Doen goed—deur ons kleredrag en persoonsversorging: Ná een van verlede jaar se streekbyeenkomste het die redakteur van ’n groot metropolitaanse koerant geskryf: “Dit was bowenal die gedrag van die Getuies wat die treffendste was. Hoe verkwikkend was dit tog om soveel mense te sien wat hulle met soveel waardigheid en respek gedra. Honderde gesinne, wat in hulle Sondagsklere geklee was en alle rasse en etniese agtergronde verteenwoordig het, het sonder ’n geraas in die stadion ingestroom. Hulle gedrag was in skrille teenstelling met dié van die meeste skares wat in die stadion inkom. Trouens, die Getuies verskil grootliks van die meeste skares. Dit het veels te algemeen geword om ongeskikte openbare gedrag te sien. . . . Ja, die skare Getuies is verkwikkend.” Mag ons nooit toelaat dat ons kleredrag en persoonsversorging of ons gedrag op enige manier afbreuk doen aan die geestelike atmosfeer van die streekbyeenkoms nie.—Fil. 1:10; 1 Tim. 2:9, 10.
9 Doen goed—by die doopplegtigheid: Doopkandidate moet tydens hierdie geleentheid met die grootste waardigheid optree. As hulle beskeie swemklere dra, sal dit waardering toon vir die heiligheid van die geleentheid. Dit sal baie nuttig wees as Bybelstudiehouers die “Vrae van lesers” in Die Wagtoring van 1 April 1995 met hulle studente hersien voordat hulle die streekbyeenkoms bywoon.
10 Ons goeie maniere en godvrugtige gedrag getuig van ons Christelike oortuigings en maak dit vir opregtes van hart makliker om die waarheid te herken. Laat ons derhalwe ‘aanhou om goed te doen’ en lof ontvang terwyl ons die “Onderrigters van God se woord”-streekbyeenkoms bywoon.—Rom. 13:3.