Ons Streekbyeenkomste—Kragtige getuienis vir die waarheid
1. Watter belangrike geestelike waarhede het die seisoenfeeste die Israeliete die geleentheid gegee om te bepeins en te bespreek?
1 Die eertydse Israeliete het drie keer ’n jaar vir seisoenfeeste bymekaargekom. Hoewel net die mans verplig was om dit by te woon, was dit dikwels hele gesinne wat na Jerusalem gereis het om hierdie gelukkige byeenkomste te geniet (Deut. 16:15, 16). Sulke gebeurtenisse het persone die geleentheid gegee om belangrike geestelike waarhede te bepeins en te bespreek. Wat is sommige van hierdie waarhede? Een daarvan is dat Jehovah ’n vrygewige, liefdevolle Voorsiener is (Deut. 15:4, 5). Nog een van hierdie waarhede is dat ons op hom kan vertrou vir leiding en beskerming (Deut. 32:9, 10). Die Israeliete kon ook peins oor die feit dat hulle, as ’n volk vir Jehovah se naam, sy regverdigheid op gepaste wyse moet weerspieël (Deut. 7:6, 11). Vandag strek ons jaarlikse streekbyeenkomste ons op soortgelyke wyse tot voordeel.
2. Hoe sal die streekbyeenkomsprogram lig op die waarheid werp?
2 Die program werp lig op die waarheid: By ons streekbyeenkomste geniet ons toesprake, dramas, demonstrasies en onderhoude wat lig op lewensbelangrike Bybelwaarhede werp (Joh. 17:17). Baie werk is reeds gedoen om die komende streekbyeenkoms moontlik te maak. Jehovah se organisasie berei ’n program voor wat saamgestel is om in die huidige behoeftes van die wêreldveld te voorsien (Matt. 24:45-47). Is jy gretig om te sien en te hoor wat aangebied gaan word?
3. Wat moet ons doen om by die program baat te vind?
3 Ons sal natuurlik die meeste daarby baat vind as ons al drie dae teenwoordig is en aandagtig luister. As jy dit nie reeds gedoen het nie, moet jy met jou werkgewer praat om verlof te kry. Maak seker dat jy elke aand genoeg rus sodat jy gedurende die program wakker kan wees. Baie vind dat dit vir hulle makliker is om aandag te skenk as hulle hulle oë op die spreker gevestig hou en kort aantekeninge maak. Moenie toelaat dat jou selfoon of roepradio jou of ander steur nie. Moenie gedurende die program gesels, SMS’e stuur, eet of drink nie.
4. Hoe kan ouers hulle kinders help om gedurende die streekbyeenkoms by die program baat te vind?
4 Gedurende Sabbatjare, wanneer Israelitiese gesinne gedurende die Huttefees byeengekom het om na die voorlesing van Wet te luister, was hulle “kindertjies” saam met hulle ‘sodat hulle kon luister en sodat hulle kon leer’ (Deut. 31:12). Hoe aanmoedigend is dit tog om te sien hoe gesinne gedurende die streekbyeenkoms bymekaarsit en hoe die jonges wakker bly en aandagtig luister! Hersien gerus elke aand julle aantekeninge van die program en bespreek punte wat julle veral geniet het. “Dwaasheid sit vas in die hart van ’n seun”, en daarom sal dit goed wees as ouers gedurende die middagpouse en terwyl hulle by die hotel is, toesig hou oor hulle kinders, insluitende tienderjariges, eerder as om hulle aan hulleself ‘oor te laat’.—Spr. 22:15; 29:15.
5. Hoe sal ons goeie gedrag terwyl ons in ’n hotel bly die waarheid versier?
5 Ons goeie gedrag versier die waarheid: Ons goeie gedrag in die byeenkomsstad versier die waarheid (Tit. 2:10). Hotelpersoneel let op wanneer ’n groep mense hotelreëls gehoorsaam en geduldig en vriendelik teenoor die personeel is (Kol. 4:6). Toe verteenwoordigers van die takkantoor verlede jaar met ’n hotel onderhandel het, het die verkoopsdirekteur vir hulle gesê: “Ons is altyd bly om julle mense in ons hotel te laat tuisgaan weens die soort mense wat hulle is. Hulle is so goedgemanierd en vriendelik, en hulle behandel ons personeel en fasiliteite met soveel respek.”
6. Hoe kan ons die waarheid versier deur ons kleredrag terwyl ons in die byeenkomsstad is?
6 Wanneer ons ons byeenkomslapelkaarte dra, adverteer ons nie net die streekbyeenkoms en stel ons nie net ander byeenkomsgangers in staat om ons te identifiseer nie, maar getuig ons ook vir mense. Mense in die byeenkomsstad sal sien dat dié wat byeenkomslapelkaarte dra, netjies en beskeie geklee is, nie soos die wêreld nie, wie se voorkoms dikwels onversorg en gewaagd is (1 Tim. 2:9, 10). Ons moet dus aandag skenk aan ons kleredrag en persoonsversorging terwyl ons in die byeenkomsstad is, asook wanneer ons by die hotel inteken. Dit sou nie waardigheid weerspieël as ons in ’n kortbroek en ’n T-hemp daar aankom nie. Selfs as die streekbyeenkoms in ’n opelugstadion gehou gaan word, moet ons kleredrag waardigheid weerspieël. As ons besluit om ná die program ander klere aan te trek en na ’n restaurant te gaan, moet ons onthou dat ons byeenkomsgangers is en moet ons nie te informeel aantrek nie.
7. Wat is een manier waarop ons Christelike eenheid gedurende die streekbyeenkoms kan geniet?
7 By die seisoenfeeste het die Israeliete opbouende omgang geniet met medeaanbidders wat van ander dele van die land en wêreld gekom het, en dit het eenheid bevorder (Hand. 2:1, 5). Gedurende streekbyeenkomste word ons unieke Christenbroederskap as ’t ware ten toon gestel. Hierdie aangename aspek van ons geestelike paradys beïndruk waarnemers dikwels (Ps. 133:1). Eerder as om die byeenkomsterrein gedurende middagete te verlaat om kos te koop, is dit soveel beter om ’n ligte ete saam te neem en van die geleentheid gebruik te maak om broers en susters wat naby ons sit, te ontmoet en met hulle te gesels!
8. Watter redes is daar om aan te bied om met die werk te help as ons omstandighede ons toelaat?
8 Waarnemers is dikwels beïndruk deur ons goed georganiseerde en ordelike streekbyeenkomste, veral wanneer hulle uitvind dat al die werk deur vrywilligers gedoen word. Kan jy jou “gewillig aanbied” om by die streekbyeenkoms te werk? (Ps. 110:3). Hele gesinne bied dikwels aan om met die werk te help in ’n poging om hulle kinders te leer om van hulleself te gee. As jy skaam is, is vrywilligerwerk ’n goeie manier om ander byeenkomsgangers te ontmoet. Een suster het gesê: “Behalwe my gesin en ’n handjie vol vriende het ek nie baie mense daar geken nie. Maar toe ek gehelp het om skoon te maak, het ek baie broers en susters ontmoet. Dit was groot pret!” Dit sal ons groot vreugde verskaf as ons ons vriendekring uitbrei deur by die streekbyeenkoms met die werk te help (2 Kor. 6:12, 13). As jy nog nooit aangebied het om met die werk te help nie, kan jy die ouer manne vra hoe jy daarvoor kan kwalifiseer.
9. Hoe sal ons ander nooi om die streekbyeenkoms by te woon?
9 Nooi ander om die waarheid te hoor: Drie weke voor ons streekbyeenkoms sal ons, soos in vorige jare, deelneem aan ’n kampanje om ander te nooi om die program by te woon. Gemeentes moet probeer om soveel as moontlik van hulle gebied tydens die verspreiding van die uitnodigings te dek. (Sien die venster “Hoe sal ons die uitnodiging aanbied?”) Enige uitnodigings wat oorbly, moet na die streekbyeenkoms gebring word. Dit sal deur byeenkomsgangers gebruik word om informeel te getuig terwyl hulle in die byeenkomsstad is.
10. Vertel ondervindinge wat bewys dat ons jaarlikse kampanje resultate oplewer.
10 Reageer mense op hierdie jaarlikse kampanje? By een streekbyeenkoms het ’n saalwagter ’n egpaar gehelp om sitplekke te vind. Hulle het vir hom gesê dat hulle die uitnodiging ontvang het en “gedink het dat dit interessant lyk”. Hulle het meer as 320 kilometer ver gery om die streekbyeenkoms by te woon! In ’n ander geval het ’n suster wat van huis tot huis gewerk het die uitnodiging aan ’n man gegee wat gelyk het of hy nuuskierig was oor die streekbyeenkoms. Sy het dus tyd geneem om die uitnodiging met hom te bespreek. ’n Paar dae later het die suster die man saam met een van sy vriende by die streekbyeenkoms gesien, en hulle het een van die nuwe vrystellings gehad!
11. Waarom is dit belangrik om ons jaarlikse streekbyeenkoms by te woon?
11 Die seisoenfeeste was ’n liefdevolle voorsiening van Jehovah om die Israeliete te help om hom ‘in onberispelikheid en in waarheid te dien’ (Jos. 24:14). So ook help ons jaarlikse streekbyeenkomste ons om ‘voort te gaan om in die waarheid te wandel’ en is dit ’n noodsaaklike deel van ons aanbidding (3 Joh. 3). Mag Jehovah alle liefhebbers van die waarheid se pogings seën om die streekbyeenkoms by te woon en ten volle daarby baat te vind!
[Lokteks op bladsy 3]
Ons goeie gedrag terwyl ons in die byeenkomsstad is, versier die waarheid
[Lokteks op bladsy 4]
Ons sal drie weke voor ons streekbyeenkoms aan ’n kampanje deelneem om mense te nooi om dit by te woon
[Venster op bladsye 5]
Herinneringe vir die Streekbyeenkoms Vir 2012
◼ Programtye: Die program sal al drie dae om 9:00 vm. begin. Wanneer die inleidende musiek aangekondig word, moet ons almal by ons sitplekke wees sodat die program op ’n waardige wyse kan begin. Die program sal Vrydag en Saterdag om 4:35 nm. en Sondag om 3:20 nm. eindig.
◼ Parkering: By al die byeenkomsterreine waar ons beheer oor die parkeerterreine het, sal die parkering gratis wees; dié wat eerste kom, sal die eerste parkeerplekke kry. Aangesien parkering gewoonlik beperk is, moet byeenkomsgangers sover moontlik met vol motors ry.
◼ Huisvesting: Special Needs Room Request-vorms (CO-5-E) is beskikbaar vir verkondigers wat huisvesting nodig het. Die Gemeentelike Dienskomitee moet kyk of die verkondiger hiervoor kwalifiseer deur gebruik te maak van die riglyne op die vorm sowel as die brief van 14 Desember 2010 aan alle liggame van ouer manne. Hierdie voorsiening is slegs vir verkondigers wat ’n goeie naam in die gemeente het, asook hulle goedgemanierde kinders.
◼ Die hou van sitplekke: Sitplekke mag net gehou word vir dié wat saam met jou in dieselfde huis woon of saam met jou in dieselfde voertuig ry, asook dié met wie jy tans ’n Bybelstudie hou.—1 Kor. 13:5.
◼ Middagete: Bring asseblief middagete saam eerder as om tydens die middagpouse die byeenkomsterrein te verlaat om iets te ete te kry. ’n Klein koelhouer wat onder ’n sitplek pas, kan gebruik word. Groot piekniekkoelhouers moet in ooreenstemming met die saalwagters se instruksies geberg word. Glashouers en alkohol word nie op die byeenkomsterrein toegelaat nie.
◼ Bydraes: Ons kan ons waardering vir die byeenkomsreëlings toon deur vrywillige bydraes vir die wêreldwye werk by die byeenkoms te maak. Alle tjeks moet aan die “Christian Congregation of Jehovah’s Witnesses of South Africa” uitgemaak word. Buiten om kontant of per tjek by te dra, sal bydraes ook met ’n debiet- of kredietkaart by verskeie byeenkomste gemaak kan word.
◼ Ongelukke en noodgevalle: As ’n mediese noodgeval op die byeenkomsterrein ontstaan, moet die naaste saalwagter daaroor ingelig word, en hy sal die Noodhulpafdeling onmiddellik in kennis stel sodat ons gekwalifiseerde noodhulppersoneel kan bepaal hoe ernstig die situasie is en hulp kan verleen.
◼ Medisyne: As jy voorskrifmedisyne gebruik, moet jy asseblief seker maak dat jy genoeg saambring, aangesien dit nie by die byeenkoms beskikbaar sal wees nie. Spuitnaalde wat deur diabete gebruik word, moet as gevaarlike afval beskou word en daar moet op gepaste wyse daarvan ontslae geraak word. Dit moenie in asblikke op die byeenkomsterrein en by hotelle gegooi word nie.
◼ Skoene: Elke jaar is daar ’n aantal beserings as gevolg van die soort skoene wat byeenkomsgangers dra. Dit is raadsaam om skoene te kies wat beskeie is en goed pas, sodat jy veilig op skuinstes, trappe, traliewerk, ensovoorts kan loop.
◼ Kinderwaentjies: Kinderwaentjies moenie na die byeenkomsterrein gebring word nie. Babastoeltjies wat op stoele langs die ouers vasgemaak kan word, is egter toelaatbaar.
◼ Parfuums: Die meeste streekbyeenkomste word in geboue met meganiese lugversorging gehou. Dit sal dus liefdevol van ons wees om die gebruik van skerp naskeermiddels en parfuums te beperk wat diegene met asemhalings- of verwante probleme kan aantas.—1 Kor. 10:24.
◼ Volg asseblief op-vorms (S-43): ’n Volg asseblief op-vorm moet gebruik word om inligting te voorsien aangaande enigiemand wat tydens informele getuieniswerk gedurende die byeenkoms belangstelling toon. Verkondigers moet een of twee van hierdie vorms na die byeenkoms saambring. Voltooide vorms kan by die boekekamer ingedien word of aan die gemeentelike sekretaris gegee word nadat jy van die streekbyeenkoms teruggekeer het.—Sien Ons Koninkryksbediening vir Mei 2011, bl. 3.
◼ Restaurante: Verheerlik Jehovah se naam deur jou goeie gedrag by restaurante. Dit is gebruiklik om ’n fooitjie van 10 tot 15 persent te gee.
◼ Vrywilligerdiens: Enigiemand wat wil aanbied om te help, moet na die Vrywilligerafdeling by die byeenkoms gaan. Kinders onder 16 kan onder die toesig van ’n ouer of ’n voog of ’n ander volwassene werk wat deur die ouer of die voog goedgekeur is.
◼ Liedere: Gemeentes sal moontlik die byeenkomsliedere voor die tyd wil oefen. Liedere vir Vrydag: 52, 57, 113, 106, 116 en 98. Liedere vir Saterdag: 96, 68, 58, 67, 95 en 89. Liedere vir Sondag: 110, 61, 134, 73, 36 en 49.
[Venster op bladsy 4]
Hoe sal ons die uitnodiging aanbied?
Ons sal dalk die aanbieding kort moet hou sodat ons ons gebied kan dek. Ons kan iets sê soos: “Hallo. Ons neem deel aan ’n wêreldwye poging om hierdie uitnodigings te versprei. Hier is jou eksemplaar. Jy sal meer besonderhede op die uitnodiging vind.” Wees entoesiasties. Wanneer ons die uitnodiging oor die naweke versprei, moet ons ook die tydskrifte aanbied wanneer dit gepas is.