Hou aan “doen wat voortreflik is”
1 Jy het iets voortrefliks gedoen toe jy ’n kneg van Jehovah God geword het. Maar nou is die uitdaging in hierdie kritieke tye om aan te hou “doen wat voortreflik is” (Gal. 6:9). Hoewel dit ware inspanning verg, kan jy dit doen. Hoe?
2 Kweek Jesus se geestesgesindheid aan: Soos Jesus kan jy beproewinge verduur as jy jou aandag op die Koninkrykshoop gevestig hou (Heb. 12:2, 3). Wees daarvan verseker dat Jehovah jou liefhet en dat hy wil hê dat jy suksesvol moet wees (2 Pet. 3:9). Stel jou volle vertroue in hom, en wees seker dat hy jou sal help (1 Kor. 10:13). Hou vol met gebed en vra Jehovah om jou te help om te volhard (Rom. 12:12). Verheug jou in die oortuiging dat jou volharding tot ’n goedgekeurde toestand voor God sal lei (Rom. 5:3-5). As jy getrou “dieselfde geestesgesindheid” aankweek “as wat Christus Jesus gehad het”, sal dit vir jou persoonlike tevredenheid meebring en Jehovah se hart verbly.—Rom. 15:5; Spr. 27:11.
3 Hou aan om die regte dinge te doen: Maak ten volle gebruik van die voorsienings wat Jehovah vir sy volk gemaak het om hulle te help om aan te hou doen wat voortreflik is. Volg ’n goeie persoonlike roetine waarin jy God se Woord lees en die Bybelpublikasies van die “getroue en verstandige slaaf”-klas bestudeer. Berei getrou voor vir al die gemeentelike vergaderinge, woon dit by en neem daaraan deel. Geniet voor en ná die Christelike vergaderinge noue omgang met jou geestelike broers en susters. Stel realistiese doelwitte vir jou bediening sodat jy ’n betekenisvolle deelname aan die velddiens kan hê en sodat jy jou vaardighede om die goeie nuus vir ander aan te bied, kan verbeter.
4 Dít is hoe jy kan aanhou doen wat voortreflik is en terselfdertyd groot vreugde kan ervaar. In hierdie verband het ’n broer in Italië gesê: “Wanneer ek teen die aand se kant huis toe gaan ná ’n dag in Jehovah se diens, voel ek wel moeg. Maar ek is gelukkig, en ek dank Jehovah dat hy my ’n vreugde gegee het wat niemand my kan ontneem nie.” Hou dus aan doen wat voortreflik is, en jy sal ook groot vreugde ervaar.