Moenie ophou om te doen wat goed is nie

“HANDHAAF goeie gedrag onder die nasies”, het die apostel Petrus gemaan (1 Petrus 2:12). Die Griekse woord wat as “goeie” vertaal word, verwys na iets wat “mooi, edel, eerbaar, voortreflik” is. In ons tyd lyk dit dalk heeltemal onrealisties om edele of eerbare gedrag van mense oor die algemeen te verwag. Maar Jehovah se hedendaagse volk as ’n geheel het daarin geslaag om gehoor te gee aan Petrus se vermaning. Trouens, hulle is wêreldwyd bekend vir hulle goeie gedrag.

Dit is veral merkwaardig wanneer ’n mens dink aan die druk en probleme wat ons ondervind gedurende hierdie “kritieke tye . . . wat moeilik is om deur te kom” (2 Timoteus 3:1). Beproewinge is deel van ons daaglikse lewe, en teenkanting teen die Christelike lewenswyse is algemeen. Wat meer is, terwyl sommige beproewinge van korte duur is, is ander nimmereindigend en raak dit selfs hewiger. Nietemin het die apostel Paulus ons aangespoor: “Laat ons . . . nie ophou om te doen wat goed is nie, want op die regte tyd sal ons maai as ons nie moeg word nie” (Galasiërs 6:9). Maar hoe is dit vir ons moontlik om te doen—en aan te hou doen—wat goed is ten spyte van verskriklike beproewinge en meedoënlose teenkanting?

Hulp om te doen wat goed is

Om “edel, eerbaar, voortreflik” te wees, is klaarblyklik ’n toestand van die innerlike mens, ’n eienskap van die hart. Om goeie gedrag ten spyte van beproewinge en ontberinge te handhaaf, is dus nie ’n impulsiewe reaksie nie, maar die gevolg van die daaglikse toepassing van Bybelbeginsels in alle fasette van die lewe. Wat is party dinge wat in dié verband kan help? Kyk na die volgende.

Kweek die geestesgesindheid van Christus aan. Dit verg nederigheid om ’n situasie te verduur wat blykbaar onregverdig is. Dit is onwaarskynlik dat iemand wat baie van homself dink, slegte behandeling sal duld. Maar Jesus het “homself verneder en gehoorsaam geword tot in die dood” (Filippense 2:5, 8). As ons hom navolg, sal ons nie ‘moeg word of beswyk’ in ons heilige diens nie (Hebreërs 12:2, 3). Toon nederige gehoorsaamheid deur gewillig saam te werk met dié wat die leiding in julle plaaslike gemeente neem (Hebreërs 13:17). Leer om ander “hoër” as jouself te ag en hulle belange voor joune te stel.—Filippense 2:3, 4.

Onthou dat Jehovah jou liefhet. Ons moet daarvan oortuig wees dat Jehovah “is en dat hy die beloner word van dié wat hom ernstig soek” (Hebreërs 11:6). Hy gee werklik vir ons om en wil hê dat ons die ewige lewe moet beërf (1 Timoteus 2:4; 1 Petrus 5:7). As ons onthou dat niks God se liefde vir ons kan vernietig nie, sal dit ons help om nie onder beproewinge te swig nie.—Romeine 8:38, 39.

Vertrou volkome op Jehovah. Dit is noodsaaklik dat ons op Jehovah vertrou, veral wanneer dit lyk of beproewinge eindeloos voortduur of ons lewe bedreig. Ons moet onwrikbare vertroue hê dat Jehovah geen toets sal toelaat ‘bo wat ons kan verdra’ nie en dat hy altyd ‘die uitweg sal gee’ (1 Korintiërs 10:13). Ons kan selfs die dood moedig in die gesig staar as ons op Jehovah vertrou.—2 Korintiërs 1:8, 9.

Hou vol met gebed. Hartgrondige gebed is noodsaaklik (Romeine 12:12). Opregte gebed is een van die maniere waarop ons nader aan Jehovah kom (Jakobus 4:8). Ons leer uit persoonlike ondervinding dat “hy ons hoor, ongeag wat ons . . . vra” (1 Johannes 5:14). As Jehovah toelaat dat ons beproewing voortduur as ’n toets van ons onkreukbaarheid, bid ons vir sy hulp om te volhard (Lukas 22:41-43). Gebed leer ons dat ons nooit alleen is nie en dat ons, met Jehovah aan ons kant, altyd sal seëvier.—Romeine 8:31, 37.

Goeie werke—‘’n rede tot lof en eer’

Alle Christene word van tyd tot tyd “deur allerhande beproewinge bedroef”. Nietemin moet ons “nie ophou om te doen wat goed is nie”. Wanneer jy onder druk verkeer, kan jy krag put uit die wete dat jou getrouheid uiteindelik “’n rede tot lof en heerlikheid en eer” sal wees (1 Petrus 1:6, 7). Maak ten volle gebruik van alle geestelike voorsienings van Jehovah om jou op te bou. Gaan na diegene wat as herders, onderrigters en raadgewers in die Christengemeente dien wanneer jy persoonlike aandag nodig het (Handelinge 20:28). Woon alle gemeentelike vergaderinge gereeld by, wat ons ‘tot liefde en goeie werke aanspoor’ (Hebreërs 10:24). ’n Program van daaglikse Bybellees en persoonlike studie sowel as ’n gereelde deelname aan die Christelike bediening sal help om jou wakker en geestelik sterk te hou.—Psalm 1:1-3; Matteus 24:14.

Hoe meer jy Jehovah se liefde en sorg ondervind, hoe groter sal jou begeerte wees om “ywerig vir goeie werke” te wees (Titus 2:14). Onthou, “wie tot die einde toe volhard het, hy sal gered word” (Matteus 24:13). Ja, wees vasbeslote om ‘nie op te hou om te doen wat goed is nie’!

[Lokteks op bladsy 29]

Ons moet onwrikbare vertroue hê dat Jehovah geen toets sal toelaat ‘bo wat ons kan verdra’ nie en dat hy altyd ‘die uitweg sal gee’

[Prente op bladsy 30]

As ons besig bly met teokratiese bedrywighede, kan dit help om ons voor te berei om beproewinge te verduur