Pas jy toe wat jy by die “Onderrigters van God se woord”-streekbyeenkoms geleer het?
1 Enigiemand wat die 2001/2002-streekbyeenkoms bygewoon het, kon sien dat Jehovah se volk vasbeslote is om hulle opdrag uit te voer om onderrigters van God se woord te wees (Matt. 28:19, 20). Toe jy huis toe gegaan het, watter spesifieke punte van onderrigting was jy vasbeslote om in jou eie lewe en in die veldbediening toe te pas?
2 Die geïnspireerde Skrif is nuttig om te onderrig: Die eerste dag se tema het die aandag gevestig op 2 Timoteus 3:16. Die programrede het getoon dat ons groot agting vir God se Woord moet hê, dit meer as enige menslike mening of oorlewering moet respekteer en dit getrou moet gebruik as ons “Ten volle toegerus as onderrigters van God se woord” wil wees. Ons moet ook daagliks bid vir heilige gees om ons in ons bediening te help en ons daarop toelê om die vernaamste vrug daarvan—liefde—aan te kweek. En ons moet toelaat dat Jehovah se aardse organisasie ons as bedienaars oplei deur middel van al die gemeentelike vergaderinge.
3 Vrydag se simposium, “Ons moet onsself onderrig terwyl ons ander onderrig”, het verduidelik dat ons voorbeeldig moet wees deur (1) in alle fasette van Christelike sedelikheid by God se wette te bly, (2) goeie studiegewoontes te handhaaf en (3) gesindhede en toestande van die hart en verstand uit te wis wat die Duiwel kan uitbuit. Toe het ons praktiese maniere geleer waarop ons ons gesin teen die wêreldse plaag van pornografie kan beskerm. Ouers is aangespoor om die voorbeeld te stel deur selfs ’n vlugtige kykie na ’n sekstoneel te vermy en om hulle kinders se gebruik van die Internet en hulle televisiekykery te kontroleer. Watter punte uit Vrydag se program het jy al begin toepas?
4 Die laaste toespraak van die dag het ons meer vasbeslote gemaak om Jehovah se lig te waardeer, om na aan God se getroue gesalfde klas te bly en om tot die vrede van Jehovah se volk by te dra. Het jy al die nuwe vrystelling Jesaja se profesie—Lig vir die hele mensdom II begin lees?
5 Voldoende bekwaam om ander te leer: Die temateks vir die tweede dag was 2 Timoteus 2:2. Het jy, terwyl jy na Saterdagoggend se simposium geluister het, gelet op die wenke oor hoe om (1) verdienstelikes te soek, (2) hulle belangstelling verder te kweek en (3) hulle te leer om alles te onderhou wat Christus beveel het? Pas jy toe wat jy geleer het—om huisbewoners ten minste een punt uit die Skrif te wys en om die grondslag te lê vir ’n toekomstige besoek?
6 Die middagprogram het beklemtoon hoe belangrik dit is om die Groot Leermeester, Jesus, na te volg. Op watter maniere probeer jy meer soos hy wees? Hoe dink jy kan jy ‘groter baat vind by teokratiese onderrigting’ uit wat jy in die tweede simposium van die dag geleer het? Watter wenke het jy toegepas om jou konsentrasietyd te verleng gedurende persoonlike studie en gemeentelike vergaderinge?
7 Die voorsiening Vind baat by opleiding in die Teokratiese Bedieningskool, wat ons eersdaags sal ontvang, sal ons ongetwyfeld help om ons vermoëns as sprekers en as onderrigters van God se woord te verbeter. Daar sal meer aandag geskenk word aan die spraakhoedanighede wat getroue knegte van God in Bybeltye gehad het. Elke les in die nuwe handboek het vensters wat kortliks wys wat ons moet doen, waarom dit belangrik is en hoe om dit te doen. Praktiese oefeninge is ingesluit. Susters sal 29 agtergronde hê waaruit hulle kan kies wanneer hulle ’n toespraak hou. Die veranderinge wat aangekondig is, sal later aan die skoolprogram aangebring word. Het jy ’n goeie roetine wat studie en voorbereiding betref sodat jy elke week ten volle by die Teokratiese Bedieningskool baat kan vind?
8 Wees onderrigters vanweë die tyd: Hebreërs 5:12 het die grondslag gelê vir Sondag se program. Die oggendsimposium, “Maleagi se profesie berei ons voor vir Jehovah se dag”, het ons aangespoor om God ons allerbeste te gee en om alle vorme van verraderlikheid te haat sodat ons die groot en vreesinboesemende dag van Jehovah kan oorleef. Die drama, “Respekteer Jehovah se gesag”, het op kragtige wyse getoon hoe die trots, ambisie, jaloesie en misplaaste lojaliteit van die eertydse Korag en sy metgeselle gelei het tot dade van openlike opstand teen Jehovah self. Die daaropvolgende toespraak het die aandag gevestig op die hedendaagse behoefte om ons in die gesin en die gemeente aan Goddelike gesag te onderwerp. Die openbare toespraak, “Wie leer al die nasies die waarheid?”, het bewys gelewer dat Jehovah se Getuies dit doen, in teenstelling met die Christendom, wat bloot voorgee dat hulle Bybelwaarheid aan ander leer.
9 Dit is duidelik dat Jehovah ons oplei om beter onderrigters van sy woord te wees. Laat ons toepas wat ons geleer het en ‘voortdurend op onsself en op ons onderrigting let, sodat ons onsself kan red sowel as dié wat na ons luister’.—1 Tim. 4:16.