Spesiale wedersydse aanmoediging
1 Daar gaan nie ’n dag verby waarin Jehovah se volk nie voor toetse van geloof te staan kom nie. Omdat die Duiwel weet dat hy ’n kort tydjie het, loods hy ’n laaste aanval om ons onkreukbaarheid teenoor Jehovah te ondermyn (Op. 12:12). Dit is noodsaaklik dat ons ‘aanhou om krag te verkry in die Here en in die mag van sy sterkte’ sodat ons “in die bose dag weerstand kan bied en, nadat [ons] alles deeglik gedoen het, kan vasstaan”.—Ef. 6:10, 13.
2 Om saam met medegelowiges te vergader, is ’n voorsiening van Jehovah wat ons help om krag te verkry. Die apostel Paulus het dit besef. Hy het daarna verlang om saam met sy Christenbroers te wees sodat hulle “wedersydse aanmoediging” kon geniet en “standvastig gemaak” kon word (Rom. 1:11, 12). Om ons te versterk terwyl ons God se wil doen, het die Bestuursliggaam liefdevol gereël dat ons die geleentheid het om baat te vind by wedersydse aanmoediging by die komende “Ywerige Koninkryksverkondigers”-streekbyeenkoms.
3 Wees daar om baat te vind: Maak dit jou doelwit om al drie dae teenwoordig te wees. Ons ‘bevoordeel onsself’ deur te sorg dat ons daar is voordat die eerste lied begin en deur te bly totdat ons ná die slotgebed uit die hart “Amen” gesê het (Jes. 48:17, 18). Baie sal lank voor die tyd by die werk reëlings moet tref sodat hulle die tyd sal hê om al drie dae van die byeenkoms by te woon. Dit sal dalk nie maklik wees om jou werkgewer te oorreed om jou verlof te gee nie, maar ons het Jehovah se versekering dat hy ons sal help om sy wil te doen (1 Joh. 5:14, 15). As ons dit nog nie gedoen het nie, is dit nou die tyd om definitiewe reëlings vir vervoer en verblyf te tref sodat ons niks aan die toeval oorlaat nie. Ons kan seker wees dat Jehovah ons pogings sal seën om al drie dae van die byeenkoms by te woon.—Spr. 10:22.
4 Sien uit na die aanmoediging: Het jy al ooit ná ’n streekbyeenkoms gesê: “Dit was die beste byeenkoms wat ons nog gehad het!” Waarom het jy moontlik so gevoel? Dit is omdat ons as onvolmaakte mense geleidelik uitgeput kan raak en kan vind dat ons geestelike aanmoediging nodig het (Jes. 40:30). ’n Suster het gesê: “Hierdie stelsel put my uit, en die byeenkomste help my om weer my aandag op geestelike dinge toe te spits, wat my die geestelike hupstoot gee wat ek nodig het. Dit voel of die aanmoediging kom net wanneer ek dit die nodigste het.” Jy het waarskynlik al dieselfde gevoel.
5 Ons kry die nodige aanmoediging nie net deur toesprake en onderhoude nie, maar ook deur ander verrykende aspekte van ons byeenkomste. ’n Broer het gesê: “Dit is die duidelike, praktiese toepassing van Bybelbeginsels wat ek werklik waardeer. Die dramas is natuurlik van onskatbare waarde om te toon hoe ons baat kan vind by voorbeelde uit die verlede, goeies sowel as slegtes. Die vrystellings is iets waarna ek altyd uitsien, en ek geniet dit nog lank nadat ek terug is by die huis.”
6 Streekbyeenkomste is ’n noodsaaklike voorsiening van Jehovah gedurende hierdie “kritieke tye . . . wat moeilik is om deur te kom” (2 Tim. 3:1). Dit help ons om ag te slaan op die geïnspireerde raad: “Bly wakker, staan vas in die geloof, gedra julle soos manne, word sterk” (1 Kor. 16:13). Laat ons dus vasbeslote wees om elke sessie by te woon en oorvloedige wedersydse aanmoediging by ons “Ywerige Koninkryksverkondigers”-streekbyeenkoms te geniet!
[Venster op bladsy 3]
Tref reëlings om al drie dae teenwoordig te wees
■ Vra verlof by die werk.
■ Bespreek blyplek in die byeenkomsstad.
■ Reël vervoer na die byeenkoms.