Onthou getroue bejaardes
1 Hoewel die 84-jarige Anna ’n weduwee was en ondanks haar gevorderde jare was sy “nooit van die tempel afwesig . . . nie”. Haar getrouheid het Jehovah beweeg om haar op ’n spesiale manier te seën (Luk. 2:36-38). Vandag openbaar baie broers en susters ondanks moeilike omstandighede ’n soortgelyke gees as dié van Anna. Wanneer hierdie getroues met gesondheidsprobleme of beperkings weens bejaardheid worstel, kan hulle soms ontmoedig voel. Kom ons kyk na ’n paar praktiese maniere waarop ons hulle kan aanmoedig en hulle kan help om ’n goeie geestelike roetine te handhaaf.
2 Vergaderinge en die bediening: Wanneer ander liefdevol aanbied om met vervoer te help, is dit vir talle getroue bejaardes dalk makliker om Christelike vergaderinge gereeld by te woon. Sodoende word hierdie getroue knegte wat al jare lank dien, geestelik opgebou en word die gemeente ook bevoordeel. Het jy al ’n aandeel aan hierdie goeie werk gehad?—Heb. 13:16.
3 Gereelde deelname aan die bediening is vir ware Christene ’n bron van vreugde en tevredenheid. Maar vir die bejaardes en siekes kan dit ’n uitdaging wees. Kan een van hierdie liewe broers of susters jou moontlik as ’n “medewerker” in die een of ander aspek van die getuieniswerk vergesel? (Rom. 16:3, 9, 21). Miskien kan jy hom of haar nooi om saam met jou telefoongetuieniswerk te doen of na ’n herbesoek of ’n Bybelstudie te gaan. Kan ’n Bybelstudent vir studies na die bejaarde se huis toe kom as die bejaarde aan sy huis gekluister is?
4 Studie en assosiasie: Van tyd tot tyd nooi party ’n bejaarde of siek persoon om hulle gesinstudie by te woon en hou selfs die studie in die bejaarde se huis. Een moeder het haar twee jong kinders na ’n bejaarde suster se huis toe geneem vir hulle studie in My boek met Bybelverhale, en almal is deur die assosiasie aangemoedig. Hierdie broers en susters waardeer dit ook as hulle na ’n ete of ander geselligheid genooi word. As die siekes te swak is vir ’n lang besoek, kan jy hulle dalk bel of hulle ’n kort rukkie besoek om vir hulle te lees, saam met hulle te bid of ’n opbouende ondervinding te vertel.—Rom. 1:11, 12.
5 Getroue bejaardes is vir Jehovah baie kosbaar (Heb. 6:10, 11). Ons kan hom navolg deur ons waardering vir hulle uit te spreek en hulle te help om ’n goeie geestelike roetine te handhaaf.