Loof Jehovah deur informeel te getuig
1 Jehovah se lojale knegte soek na geleenthede om hom elke dag te loof (Ps. 96:2, 3; Heb. 13:15). Een manier waarop ons dit kan doen, is deur informeel te getuig. Baie aanbidders van Jehovah is vandag dankbaar dat iemand die Koninkryksboodskap deur informele getuienis aan hulle bekend gemaak het.
2 As ons informeel vir iemand getuig, gee dit dikwels ander die geleentheid om die Koninkryksboodskap te hoor. Jesus se gesprek met ’n Samaritaanse vrou by Jakob se fontein het daartoe gelei dat baie meer mense in die goeie nuus begin belangstel het (Joh. 4:6-30, 39-42). Terwyl Paulus en Silas in Filippi in die gevangenis was, het hulle vir die tronkbewaarder getuig, en die man se hele huishouding het die waarheid aangeneem.—Hand. 16:25-34.
3 Geleenthede: Watter geleenthede het jy om informeel te getuig? Party getuig wanneer hulle inkopies doen, van openbare vervoer gebruik maak of wanneer hulle in ’n spreekkamer moet wag. Ander weer getuig gedurende etensure by die werk of tydens skoolpouses. Deur bloot een van ons Bybelpublikasies te hê waar mense dit kan sien, kan ander aangespoor word om ons oor ons oortuigings uit te vra.—1 Pet. 3:15.
4 Hoe om te begin: ’n Skaam sewejarige dogtertjie het by die vergadering gehoor hoe belangrik dit is dat almal moet getuig. Toe sy dus saam met haar ma gaan inkopies doen het, het sy twee brosjures in haar sak gesit. Terwyl haar ma by die toonbank besig was, het die dogtertjie ’n brosjure vir ’n vrou aangebied, wat dit met graagte geneem het. Toe sy gevra is waar sy die moed gekry het om die vrou te nader, het hierdie skaam dogtertjie gesê: “Ek het net gesê: Een, twee, drie, weg is jy! En toe gaan ek!”
5 Ons moet almal dieselfde gesindheid as hierdie dogtertjie hê as ons informeel wil getuig. Wat kan ons help? Bid vir vrymoedigheid om te getuig (1 Tess. 2:2). Dink vooraf aan ’n vraag of ’n interessante onderwerp wat jy kan gebruik om ’n gesprek aan te knoop. Vertrou dan dat Jehovah jou pogings sal seën.—Luk. 12:11, 12.
6 As ons informeel getuig vir die mense wat ons elke dag ontmoet, verheerlik dit Jehovah en verskaf dit ons vreugde. Dit kan iemand help om op die weg na die ewige lewe te kom.