Werk wat verkwik
1 Die Bybel se boodskap verkwik almal wat dit aanneem en in hulle lewe toepas (Ps. 19:7, 8). Dit help hulle om weg te breek van valse leerstellings en skadelike gebruike en bied ’n betroubare hoop vir die toekoms. Maar dié wat die goeie nuus ontvang, is nie die enigstes wat daarby baat vind nie. Diegene wat verkwikkende Bybelwaarhede aan ander verkondig, word self ook verkwik.—Spr. 11:25.
2 Deur die bediening versterk: Jesus het gesê dat diegene wat die juk van Christendissipelskap aanvaar, wat die predikings- en dissipelmaakwerk insluit, ‘verkwikking vir hulle siele sal vind’ (Matt. 11:29). Hy self het gevind dat dit hom versterk om vir ander te getuig. Dit was soos voedsel vir hom (Joh. 4:34). Toe hy die 70 dissipels uitgestuur het om te preek, was hulle verheug om te sien hoe Jehovah hulle pogings seën.—Luk. 10:17.
3 Baie Christene van vandag word eweneens versterk deur hulle deelname aan die predikingswerk. Een suster het gesê: “Die bediening is verkwikkend, want dit maak my lewe doelgerig en sinvol. Persoonlike probleme en die druk van die daaglikse lewe vervaag wanneer ek aan die bediening deelneem.” Nog ’n ywerige bedienaar het gesê: “Die bediening . . . herinner my daagliks daaraan dat Jehovah ’n werklike persoon is, en dit gee my gemoedsrus en innerlike vreugde wat op geen ander manier verkry kan word nie.” Wat ’n voorreg is dit tog om “God se medewerkers” te wees!—1 Kor. 3:9.
4 Christus se juk is sag: Hoewel Christene gemaan word om ‘hulle kragtig in te span’, vereis Jesus nie meer van ons as wat ons kan gee nie (Luk. 13:24). Trouens, hy nooi ons liefdevol uit om ‘saam met hom onder sy juk te kom’ (Matt. 11:29, voetnoot in NW). Diegene wat moeilike omstandighede verduur, kan vol vertroue wees dat hulle heelhartige diens, al is dit beperk, vir God welbehaaglik is.—Mark. 14:6-8; Kol. 3:23.
5 Hoe verkwikkend is dit tog om ’n God te dien wat waardering toon vir alles wat ons ter wille van sy naam doen! (Heb. 6:10). Laat ons altyd daarna strewe om hom ons beste te gee.