Hou aan om Jehovah se wonderlike werke te verkondig

1. Wat is van Jehovah se wonderlike werke wat jy veral waardeer?

¹ Niemand kan met ons groot God, Jehovah, vergelyk word nie! Dawid het geskryf: “Baie dinge het u gedoen, o Jehovah my God, ja, u wonderlike werke en u gedagtes teenoor ons; niemand kan met u vergelyk word nie” (Ps. 40:5). Jehovah se wonderlike werke sluit in die skepping van die heelal, die Messiaanse Koninkryk, dade van liefderyke goedhartigheid teenoor sy volk asook die wêreldwye predikingswerk (Ps. 17:7, 8; 139:14; Dan. 2:44; Matt. 24:14). Liefde vir Jehovah en waardering vir alles wat hy vir ons gedoen het, beweeg ons om ander van hom te vertel (Ps. 145:5-7). Gedurende Maart, April en Mei sal ons die geleentheid hê om dit in voller mate te doen. Gedurende die afgelope paar jaar het baie in Maart en April aan die hulppionierdiens deelgeneem, aangesien die dae, veral in Maart, nog redelik lank is. Vanjaar is daar vyf naweke in Mei, wat diegene sal help wat die meeste van hulle velddiens oor die naweek doen.

2. Hoe vind ons persoonlik by die hulppionierdiens baat?

² As ’n hulppionier: Kan jy jou sake só reël dat jy gedurende een of meer van hierdie maande van spesiale bedrywigheid 50 uur in die bediening kan deurbring? Enige aanpassings wat jy in jou roetine maak, sal sekerlik die moeite werd wees (Ef. 5:16). Baie het gevind dat hulppionierdiens hulle help om die gehalte van hulle bediening te verbeter. Hulle voel meer op hulle gemak by die deure en gebruik die Bybel meer dikwels. Omdat hulle meer tyd in die bediening deurbring, is dit makliker om terug te gaan na belangstellendes wat hulle vind, en party wat nie voorheen ’n Bybelstudie gehou het nie, het een begin terwyl hulle hulppionierdiens gedoen het. Hulppionierdiens is ’n vreugdevolle bedrywigheid omdat ons ons inspan om ander te help.—Hand. 20:35.

3. Hoe kon sommige selfs onder moeilike omstandighede hulppionierdiens doen?

³ Moenie gou tot die slotsom kom dat jou omstandighede jou nie toelaat om daaraan deel te neem nie. Een ouer man wat verlede jaar hulppionierdiens gedoen het, het twee kinders en ’n voltydse werk. Hoe het hierdie besige broer dit reggekry? Aangesien hy deur die week werk, het hy beplan om oor die naweke lank in die bediening uit te gaan en op Saterdae om 7:00 vm. met straatgetuieniswerk te begin. ’n Hele paar ander in die gemeente wat soortgelyke omstandighede gehad het, het ook aan die hulppionierdiens deelgeneem, en hulle het mekaar ondersteun en aangemoedig. In ’n ander gemeente het ’n 99-jarige suster besluit om in Mei hulppionierdiens te doen nadat haar dogter haar genooi het om by haar aan te sluit. Ander in die gemeente het hierdie bejaarde suster gehelp om van deur tot deur en na Bybelstudies te gaan deur haar rolstoel te stoot. Sy het ook telefoon- en straatgetuieniswerk gedoen en briewe geskryf. Sy is daarvan oortuig dat sy dit, nie in haar eie krag nie, maar net met Jehovah se hulp gedoen het.—Jes. 40:29-31.

4. Watter faktore kan ons in ag neem wanneer ons ’n rooster opstel om hulppionierdiens te doen?

⁴ Probeer om ’n rooster uit te werk wat die beste by jou omstandighede pas. Die roosters wat in hierdie Koninkryksbediening as voorbeelde voorsien is, sal jou moontlik help. Werk jy voltyds of gaan jy skool? ’n Rooster wat hoofsaaklik die naweke benut, sal moontlik vir jou die praktiesste wees. As jy gesondheidsprobleme het en nie genoeg energie het om elke dag ure lank in die bediening te werk nie, sal ’n rooster wat kort tye elke dag vereis, miskien die beste wees. Praat met ander oor jou begeerte om hulppionierdiens te doen. Miskien sal hulle dit ook as hulle doelwit stel.

5. Watter doelwitte kan jongmense vir Maart, April en Mei stel?

⁵ Maniere waarop jongmense kan deelneem: Jehovah is bly wanneer jongmense sy wonderlike werke verkondig (Ps. 71:17; Matt. 21:16). As jy jonk en gedoop is, kan jy moontlik hulppionierdiens doen gedurende ’n maand wat ’n skoolvakansie insluit. Kan jy, as jy nie as ’n hulppionier kan dien nie, spesifieke doelwitte stel om tydens hierdie maande meer te doen en die gehalte van jou bediening te verbeter? As jy saam met jou ouers aan die bediening deelneem maar nog nie ’n ongedoopte verkondiger is nie, sal dit nou ’n goeie tyd wees om aan die vereistes vir ’n verkondiger te probeer voldoen. Jy hoef nie te voel dat jy alle Bybelvrae moet kan beantwoord of dat jy soveel as gedoopte volwassenes moet weet nie. Verstaan jy die grondleerstellings van die Bybel? Bly jy by die Bybel se sedelike standaarde? Wil jy as een van Jehovah se Getuies geïdentifiseer word? Praat dan met jou ouers hieroor. Hulle kan reël om saam met jou na die ouer manne te gaan om te kyk of jy aan die vereistes voldoen.—Sien Ons bediening-boek, bladsye 98-9.

6. Hoe kan ons Bybelstudente help om verkondigers van die goeie nuus te word?

⁶ Help ander om die predikingswerk te doen: Progressiewe Bybelstudente voldoen miskien aan die vereistes om in die komende maande van spesiale bedrywigheid by ons as verkondigers aan te sluit. As jy ’n Bybelstudent het wat goeie vordering maak, kan jy die hulp van jou boekstudieopsiener of die diensopsiener vra. Een van hulle kan saam met jou na die studie gaan om die student se vordering te evalueer. Indien die student aan die vereistes voldoen en die begeerte het om ’n verkondiger te word, kan die presiderende opsiener reël dat twee ouer manne met jou en die student vergader. (Sien Die Wagtoring van 15 November 1988, bladsy 17.) Sodra die student goedgekeur word, moet jy hom onmiddellik in die bediening begin oplei.

7. Hoe kan ongereelde en onbedrywige verkondigers gehelp word?

⁷ Boekstudieopsieners moet spesiale aandag gee aan enigiemand in hulle groep wat onbedrywig of ongereeld is. Nooi hulle persoonlik uit om saam met jou in die bediening te werk. As hulle lank onbedrywig was, is dit raadsaam dat twee ouer manne eers met hulle praat om te sien of hulle nog aan die vereistes voldoen. (Sien die Vraebus in Ons Koninkryksbediening vir November 2000.) Die ywer van die gemeente gedurende hierdie maande van spesiale bedrywigheid spoor hulle dalk aan om weer gereeld aan die bediening deel te neem.

8, 9. Wat kan die ouer manne doen om geesdrif vir die spesiale bedrywigheid op te bou?

⁸ Berei nou al voor om meer te doen: Ouer manne, begin nóú om geesdrif vir die hulppionierdiens in die gemeente op te bou. Julle kan baie doen deur julle positiewe kommentare en goeie voorbeeld (1 Pet. 5:3). Wat is die gemeente se vorige hoogtepunt in hulppioniers? Kan dit vanjaar oortref word? Boekstudieopsieners en hulle assistente moet soek na maniere waarop hulle almal in die groep kan aanspoor om meer te doen. Diensopsieners kan bykomende velddiensvergaderinge reël. Lig die gemeente vooraf in oor die reëlings. Maak seker dat bekwame verkondigers aangewys word om die leiding te neem en dat velddiensvergaderinge op tyd begin en eindig. (Sien die Vraebus in Ons Koninkryksbediening vir September 2001.) Die diensopsiener moet ook reël dat daar genoeg gebied, tydskrifte en lektuur is.

⁹ Verlede jaar het die ouer manne in een gemeente die verkondigers lank voor die tyd geesdriftig begin aanmoedig om hulppionierdiens te doen, en ’n hele paar van hulle het aansoeke ingedien. Hulle het bykomende velddiensvergaderinge gereël—een om 5:30 vm. vir straatgetuieniswerk, nog een om 3:00 nm. vir skoliere en ’n derde om 6:00 nm. vir diegene wat van die werk af kom. Daarbenewens was daar drie velddiensreëlings op Saterdae. Die gemeente het goed gereageer, en 66 het in April as hulppioniers gedien!

10. Hoe kan gesinne hulle voorberei om meer te doen?

¹⁰ Sit gerus gedurende julle volgende gesinstudie tyd opsy om realistiese doelwitte vir die komende maande te stel. Met goeie samewerking en beplanning kan party of almal in die gesin miskien hulppionierdiens doen. As dit nie moontlik is nie, stel doelwitte om meer te doen deur langer velddiens te doen of op bykomende geleenthede uit te gaan. Bid saam as ’n gesin hieroor. Julle kan daarvan seker wees dat Jehovah julle pogings sal seën.—1 Joh. 3:22.

11. (a) Watter wonderlike dinge het Christus se offerande tot stand gebring? (b) Hoe laat en waar sal die plaaslike Gedenkmaalviering gehou word?

¹¹ God se wonderlikste werk: Jehovah se grootste blyk van liefde is die feit dat hy sy Seun as ’n losprys vir ons gegee het (1 Joh. 4:9, 10). Die losprysoffer voorsien die wetlike grondslag om die mensdom van sonde en die dood los te koop (Rom. 3:23, 24). Jesus se vergote bloed het die nuwe verbond bekragtig en dit moontlik gemaak vir onvolmaakte mense om as God se seuns aangeneem te word met die vooruitsig om in die hemelse Koninkryk te heers (Jer. 31:31-34; Mark. 14:24). Van die allergrootste belang is dat Jesus se lewe van volmaakte gehoorsaamheid Jehovah se naam geheilig het (Deut. 32:4; Spr. 27:11). Die herdenking van Christus se dood sal op Sondag, 4 April, ná sononder, oor die hele wêreld gevier word.

12. Hoe kan belangstellendes daarby baat vind as hulle die Here se Aandmaal bywoon?

¹² Die viering van die Here se Aandmaal verheerlik Jehovah se wonderlike werke. Die toespraak sal waardering opbou vir wat Jehovah gedoen het toe hy die losprys voorsien het. Belangstellendes wat dit bywoon, sal ander wonderlike werke van God kan waarneem. Hulle sal die eenheid en innige liefde kan sien wat Jehovah sy knegte geleer het om te betoon (Ef. 4:16, 22-24; Jak. 3:17, 18). Dit kan ’n groot impak op ’n mens se denke hê as jy hierdie belangrike geleentheid bywoon, en daarom wil ons hê dat soveel moontlik daar teenwoordig moet wees.—2 Kor. 5:14, 15.

13, 14. Wie moet ons na die Gedenkmaal toe nooi, en hoe?

¹³ Nooi ander om dit by te woon: Begin dadelik voorberei deur ’n lys te maak van diegene wat jy wil nooi. Jou lys moet ongelowige gesinslede, bure, kennisse by die werk of skool, huidige en voormalige Bybelstudente en al jou herbesoeke insluit. Boekstudieopsieners moet alle onbedrywige verkondigers op hulle lys insluit.

¹⁴ Gebruik die gedrukte Gedenkmaaluitnodigings en tik of skryf netjies daarop die tyd en plek waar die Gedenkmaal gehou gaan word. Of jy wil dalk die uitnodiging gebruik wat op die agterblad van Die Wagtoring van 15 Maart 2004 of die Ontwaak! van 22 Maart 2004 verskyn. Wanneer 4 April nader kom, moet jy diegene op jou lys persoonlik of per telefoon weer daaraan herinner.

15. Hoe kan ons gasvryheid by die Gedenkmaal betoon?

¹⁵ By die Gedenkmaal: Probeer om die aand van die Gedenkmaal vroeg op te daag. Betoon gasvryheid deur nuwelinge hartlik te groet (Rom. 12:13). Jy het ’n spesiale verantwoordelikheid teenoor die gaste wat jy nooi. Laat hulle welkom voel en stel hulle aan ander in die gemeente voor. Jy kan hulle miskien help om ’n sitplek naby jou te kry. En as enigeen van hulle nie ’n Bybel of ’n liedereboek het nie, moet jy reël dat hulle saam met jou of iemand anders kyk. Ná die viering moet jy beskikbaar wees om enige vrae te beantwoord wat hulle moontlik het. As sommige vir die eerste keer teenwoordig is, moet jy hulle vra of hulle meer oor God se Woord en voorneme wil leer. Bied aan om ’n tuisbybelstudie met hulle te hou.

16. Wat kan gedoen word om diegene wat die Gedenkmaal bygewoon het, te help om geestelike vooruitgang te maak?

¹⁶ Hou aan om diegene te help wat dit bygewoon het: In die weke ná die Gedenkmaal sal diegene wat dit bygewoon het, moontlik verdere hulp nodig hê. Dit sluit diegene in wat voorheen vergaderinge gereeld bygewoon het, maar wat nou slegs beperkte omgang met die gemeente het. Die ouer manne sal seker maak dat hierdie mense nie oor die hoof gesien word nie, en probeer vasstel waarom hulle nie meer geestelike vooruitgang maak nie. Beklemtoon hoe dringend die tye is (1 Pet. 4:7). Help almal om te sien watter voordeel dit inhou om die skriftuurlike vermaning te gehoorsaam om gereeld saam met God se volk bymekaar te kom.—Heb. 10:24, 25.

17. Waarom moet ons Jehovah se wonderlike werke aanhou verkondig?

¹⁷ Jehovah se werke is te wonderlik vir ons om ten volle te begryp, selfs al lewe ons vir ewig (Job 42:2, 3; Pred. 3:11). Ons sal dus altyd iets hê waarvoor ons hom kan loof. Ons kan in hierdie Gedenkmaalseisoen ons waardering vir Jehovah se wonderlike werke toon deur ’n spesiale poging aan te wend om ons bediening uit te brei.

[Tabel op bladsy 5]

Kan jy een van hierdie roosters gebruik om hulppionierdiens te doen?

Maart So. Ma.* Di.* Wo.* Do. Vr. Sa. Maand Totaal

Elke dag 2 1 1 1 1 1 5 51

Twee dae 0 5 0 5 0 0 0 50

Slegs naweke 5 0 0 0 0 0 8 52

April So. Ma. Di. Wo. Do.* Vr.* Sa. Maand Totaal

Elke dag 2 1 1 1 1 1 5 50

Twee dae 0 0 0 0 5 5 0 50

Slegs naweke 5 0 0 0 0 0 8 52

Mei So.* Ma.* Di. Wo. Do. Vr. Sa.* Maand Totaal

Elke dag 2 1 1 1 1 1 4 51

Twee dae 0 5 0 0 0 0 5 50

Slegs naweke 3 0 0 0 0 0 7 50

* Vyf in die maand