Jehovah help diegene wat op hom vertrou
1 Baie mense beskou geld, mag en menslike vermoëns as sleutels tot sukses (Ps. 12:4; 33:16, 17; 49:6). Maar diegene wat Jehovah vrees en op hom vertrou, het die Bybel se versekering dat “hy . . . hulle hulp en hulle skild” is (Ps. 115:11). Kom ons kyk na twee gebiede waarop ons vertroue in Jehovah moet openbaar.
2 As Christenbedienaars: Wanneer ons ook al toewysings in die gemeente behartig of mense in die veldbediening onderrig, moet ons op ons God vertrou. Dink aan Jesus se voorbeeld. Hoewel hy God se Seun was, het hy nie op sy eie wysheid of vermoëns staatgemaak nie, maar volkome op sy hemelse Vader vertrou (Joh. 12:49; 14:10). Hoeveel te meer moet óns dit doen! (Spr. 3:5-7). Slegs met Jehovah se seën sal ons nederige pogings hom vereer en ander tot voordeel strek.—Ps. 127:1, 2.
3 Ons openbaar ons vertroue in Jehovah deur te bid vir sy leiding en die hulp van sy heilige gees (Ps. 105:4; Luk. 11:13). Verder toon ons dat ons op God vertrou deur ons onderrigting te grond op sy Woord, die Bybel. Die boodskap daarvan het die krag om harte te raak en lewens te verander (Heb. 4:12). Wanneer ons “dien as afhanklik van die krag wat God verskaf”, word Jehovah verheerlik.—1 Pet. 4:11.
4 Wanneer ons probleme hanteer: Ons moet ons ook tot Jehovah wend om hulp wanneer ons met druk en probleme te kampe het (Ps. 46:1). Byvoorbeeld, ’n werkgewer huiwer dalk om ons tyd af te gee om ’n byeenkoms by te woon, of ons kom dalk te staan voor ’n moeilike situasie in ons gesinslewe. Ons toon ons vertroue in Jehovah deur hom ernstig om hulp te smeek en die leiding te volg wat hy deur sy Woord en organisasie voorsien (Ps. 62:8; 119:143, 173). Wanneer Jehovah se knegte dit doen, sien hulle sy helpende hand in hulle lewe.—Ps. 37:5; 118:13, 16.
5 Jehovah self verseker ons: “Geseënd is die man wat op Jehovah vertrou, en wie se vertroue Jehovah geword het” (Jer. 17:7). Mag ons in alles wat ons doen, ons vertroue in hom openbaar!—Ps. 146:5.