Deel 3: Hou progressiewe Bybelstudies
Doeltreffende gebruik van die Skrif
1. Waarom moet ons die aandag op die Skrif vestig wanneer ons Bybelstudies hou?
1 Ons doel wanneer ons Bybelstudies hou, is om ‘dissipels te maak’ deur mense te help om die leringe van God se Woord te verstaan, aan te neem en in hulle lewe toe te pas (Matt. 28:19, 20; 1 Tess. 2:13). Daarom moet die Skrif die middelpunt van die studie vorm. Aan die begin sal dit dalk nuttig wees om studente te wys hoe hulle spesifieke tekste in hulle eie Bybel kan vind. Maar hoe kan ons die Skrif gebruik om hierdie mense te help om geestelike vooruitgang te maak?
2. Hoe besluit ons watter Bybeltekste ons moet lees en bespreek?
2 Kies die tekste wat gelees moet word: Kyk in jou voorbereiding hoe elke teksverwysing in die les verband hou met die gedagte wat bespreek word, en besluit watter tekste julle tydens die studie sal naslaan en bespreek. Dit is gewoonlik goed om dié te lees wat die skriftuurlike grondslag vir ons opvattings toon. Tekste wat agtergrondinligting gee, hoef moontlik nie gelees te word nie. Neem die behoeftes en omstandighede van elke student in ag.
3. Wat is die nut daarvan om vrae te gebruik, en hoe kan ons dit doen?
3 Gebruik vrae: Laat die student eerder die Bybeltekste aan jou verduidelik as dat jy dit aan hom verduidelik. Jy kan hom aanspoor om dit te doen deur vrae op bekwame wyse te gebruik. As die toepassing van ’n teks duidelik is, kan jy eenvoudig vra hoe die teks bevestig wat die paragraaf sê. In ander gevalle moet jy dalk ’n meer spesifieke vraag of reeks vrae vra sodat die student tot die regte gevolgtrekking kan kom. As verdere verduidelikings nodig is, kan dit gegee word nadat die student geantwoord het.
4. In watter mate moet ons die tekste verduidelik wat ons lees?
4 Hou dit eenvoudig: ’n Bekwame boogskutter het dikwels net een pyl nodig om ’n teiken te tref. Net so het ’n bekwame onderrigter nie baie woorde nodig om ’n punt te stel nie. Hy kan inligting op ’n eenvoudige, duidelike en juiste manier oordra. Soms moet jy dalk in Christelike publikasies navorsing doen om ’n teks te verstaan en dit reg te verduidelik (2 Tim. 2:15). Maar moenie elke aspek van elke teks in die studie probeer verduidelik nie. Sluit net in wat nodig is om die punt onder bespreking duidelik te stel.
5, 6. Hoe kan ons studente help om God se Woord in hulle lewe toe te pas, maar wat moet ons nie doen nie?
5 Gee ’n praktiese toepassing: Wanneer dit gepas is, kan jy die student help om te sien hoe Bybeltekste op hom van toepassing is. As jy Hebreërs 10:24, 25 met ’n student bespreek wat nog nie Christelike vergaderinge bywoon nie, kan jy byvoorbeeld een van die vergaderinge bespreek en hom nooi om dit by te woon. Maar moenie druk op hom uitoefen nie. Laat God se Woord hom beweeg om die nodige stappe te doen om Jehovah te behaag.—Heb. 4:12.
6 Mag ons die Skrif doeltreffend gebruik om ‘gehoorsaamheid deur geloof te bevorder’ terwyl ons ons opdrag uitvoer om dissipels te maak.—Rom. 16:26.