Bereik soveel mense as moontlik
1. Wat het die vroeë Christene gedoen om soveel mense as moontlik met die goeie nuus te bereik?
1 Jesus se vroeë volgelinge het ’n ywerige poging aangewend om die Koninkryksboodskap te verkondig. Hulle het praktiese stappe geneem om soveel mense as moontlik met die goeie nuus te bereik. Die Christenbybelskrywers het hulle geïnspireerde geskrifte in gewone Grieks geskryf, wat die internasionale taal van die Romeinse Ryk was. Daarbenewens was ywerige predikers van die tweede en derde eeu G.J. en daarna moontlik pioniers wat die gebruik van die kodeks betref, waarin verwysings makliker opgesoek kon word as in ’n boekrol.
2, 3. (a) Hoe word Jesaja 60:16 in hedendaagse tye vervul? (b) Hoe word tegnologie gebruik om rein aanbidding te bevorder?
2 Gebruik van tegnologie: Jehovah het deur middel van die profeet Jesaja voorspel: “Jy sal die melk van nasies suig” (Jes. 60:16). In die hedendaagse vervulling van hierdie profesie gebruik Jehovah se knegte waardevolle hulpbronne van die nasies om die predikingswerk te bevorder. In 1914, jare voordat klankrolprente kommersiële sukses behaal het, het die Bybelstudente byvoorbeeld die “Fotodrama van die Skepping” begin vertoon. Hierdie agt uur lange rolprent- en skyfievertoning, in kleur en met klank, het vir miljoene ’n kragtige getuienis gegee.
3 Vandag maak God se volk van hoëspoeddrukperse en gerekenariseerde masjiene gebruik om Bybels en Bybellektuur in honderde tale te druk. Vervoermiddels word gebruik om Bybellektuur vinnig na afgeleë wêrelddele te vervoer, en sodoende word mense in 235 lande bereik. Jehovah het sy knegte deur sy gees beweeg om sulke tegnologie op ’n praktiese manier te gebruik en Bybelwaarheid aan meer mense as ooit tevore in die geskiedenis beskikbaar te stel.
4. Watter aanpassings het sommige in hulle lewe gemaak om meer mense met die goeie nuus te bereik?
4 Persoonlike aanpassings: Ware aanbidders word ook beweeg om persoonlike aanpassings te maak sodat hulle meer mense met die goeie nuus kan bereik. Baie het hulle lewe vereenvoudig sodat hulle meer in die predikingswerk kan doen. Party het verhuis na waar daar meer Koninkryksverkondigers nodig is. Ander het hulle bediening uitgebrei deur ’n ander taal te leer.
5, 6. Wat kan gedoen word om soveel mense as moontlik in die plaaslike gebied te bereik?
5 Daarbenewens kan ons meer mense met die goeie nuus bereik deur te getuig wanneer mense tuis is en waar mense gevind kan word. Kan jy, as baie mense gedurende die dag in julle gebied nie tuis is nie, jou rooster aanpas om in die vroeë aandure te getuig? Is daar openbare plekke waar ’n getuienis gegee kan word? Het jy al telefoongetuieniswerk probeer doen of in sakegebied probeer werk? Soek jy na geleenthede om informeel te getuig?
6 Hoe bevoorreg is ons tog om ’n aandeel te hê aan die groot getuienis wat oor Jehovah se naam en Koninkryk gegee word! Laat ons voortgaan om die lewegewende waarheid uit God se Woord aan soveel mense as moontlik bekend te maak.—Matt. 28:19, 20.