’n Getuienis sonder woorde
1 Sonder om ’n woord te sê, spreek Jehovah se fisiese skepping boekdele oor sy onsigbare eienskappe (Ps. 19:1-3; Rom. 1:20). Net so kan ons goeie gedrag, Christelike eienskappe en beskeie voorkoms ’n getuienis sonder woorde gee (1 Pet. 2:12; 3:1-4). Dit moet elkeen van ons se begeerte wees om “die leer van ons Redder, God, in alles [te] versier” deur die manier waarop ons ons gedra.—Tit. 2:10.
2 Hoe kan onvolmaakte mense Bybelleringe aantrekliker maak? Dit kan net gedoen word deur die leiding van God se Woord en die krag van die heilige gees (Ps. 119:105; 143:10). God se woord “is lewend en oefen krag uit en is skerper as enige tweesnydende swaard” (Heb. 4:12). Dit dring diep in ons in en stel ons in staat om ons met die nuwe persoonlikheid te beklee (Kol. 3:9, 10). Die heilige gees bring begeerlike eienskappe soos goedhartigheid, goedheid, sagmoedigheid en selfbeheersing in ons voort (Gal. 5:22, 23). Laat ons persoonlik toe dat God se woord en gees ’n invloed op ons lewe het?—Ef. 4:30; 1 Tess. 2:13.
3 Ander sien ons: Wanneer ons volgens Jehovah se standaarde lewe en sy eienskappe probeer weerspieël, sien ander dit. Beskou byvoorbeeld die geval van ’n man wat deur sy werksmaats bespot is omdat hy kort is. ’n Suster wat in dieselfde kantoor gewerk het, het hom altyd met waardigheid en respek behandel. Dit het hom beweeg om haar te vra waarom sy so anders is. Sy het verduidelik dat sy so beleefd is omdat sy Bybelbeginsels in haar lewe toepas. Sy het hom ook van die wonderlike Koninkrykshoop vertel. Die man het die Bybel begin studeer en uiteindelik tot doop gevorder. Toe hy na sy tuisland teruggekeer het, het sy goeie gedrag sy familielede beïndruk, en ’n hele paar van hulle het ook die waarheid aangeneem.
4 Ons kan deur ons goeie gedrag sowel as die getuienis wat ons gee by die werk, op skool of in ons handelinge met familielede en bure, ander beweeg om God te verheerlik.—Matt. 5:16.