Koninkryksverkondigers berig

Voortreflike werke wat Jehovah verheerlik

JESUS het in sy Bergpredikasie vir sy dissipels gesê: “Laat julle lig . . . voor die mense skyn, sodat hulle julle voortreflike werke kan sien en heerlikheid kan gee aan julle Vader wat in die hemele is” (Matteus 5:16). Ware Christene wat vandag leef, verrig eweneens “voortreflike werke” wat Jehovah verheerlik.

Wat is hierdie voortreflike werke? Dit sluit die verkondiging van die goeie nuus in, maar ons voorbeeldige gedrag is ook ’n belangrike deel daarvan. Dit is dikwels ons goeie gedrag wat mense aanvanklik na die Christengemeente trek. Die volgende ondervindinge lig toe hoe Jehovah se Getuies in Martinique ‘hulle lig voor die mense laat skyn’.

◻ Terwyl hulle aan die predikingswerk van huis tot huis deelgeneem het, het een van Jehovah se Getuies ’n Katolieke vrou besoek. Hierdie vrou het al 25 jaar met ’n man saamgeleef met wie sy nie getroud was nie. Sy was vertroud met die leringe van Jehovah se Getuies, aangesien sy die boek Jy kan vir ewig in die Paradys op aarde lewe ongeveer sewe jaar vantevore ontvang het.a Die vrou het vir die Getuie gesê: “Daar is te veel godsdienste. Met hierdie deurmekaarspul weet ek nie wie om te glo nie.” Die Getuie het aan haar verduidelik dat die waarheid net in die Bybel gevind kan word en dat sy die Skrif noukeurig moet bestudeer en tot God om sy gees en leiding moet bid as sy die waarheid wil vind.

Hoewel die vrou daarin belanggestel het om die Bybel te bestudeer, het sy ’n tyd lank verskeie uitnodigings om Christelike vergaderinge by die Koninkryksaal van Jehovah se Getuies by te woon van die hand gewys. Waarom? Sy was baie skaam. Maar nadat sy ’n uitnodiging na die herdenking van Christus se dood ontvang het, het sy haar skaamheid oorkom en dit bygewoon.

Wat haar die meeste omtrent die vergadering beïndruk het, was die liefdevolle atmosfeer wat in die Koninkryksaal geheers het. Sy het nooit sulke opregte vriendskap in haar kerk ondervind nie! Ná daardie vergadering het sy al die vergaderinge van die plaaslike Getuies begin bywoon, en kort daarna is sy met die man getroud met wie sy saamgeleef het. Sy is nou ’n gedoopte gemeentelid.

◻ Die voortreflike werke van ’n ander Getuie het goeie vrugte opgelewer. Sy het ’n verantwoordelike pos in ’n kantoor beklee. Nadat ’n man van die eiland Réunion in diens geneem is, het party van die werkers die spot met hom begin dryf omdat hy kort is. Hy het ’n voorwerp van bespotting geword. Die Getuie het die man daarenteen altyd vriendelik en beleefd behandel. Kort voor lank het hy haar gevra waarom sy so anders is.

Die Getuie het aan hom verduidelik dat haar beleefdheid te danke is aan die Bybelbeginsels wat sy by Jehovah se Getuies geleer het. Sy het ook vir hom gewys wat die Skrif oor God se voornemens en die hoop op ’n nuwe wêreld sê. Die man het tot ’n Bybelstudie ingestem, Christelike vergaderinge begin bywoon en het met die vrou getrou met wie hy saamgeleef het.

Hy het uiteindelik na Réunion teruggekeer. In die verlede het hy probleme met sy familie, veral met sy vrou se familie, gehad. Maar nou was hulle baie beïndruk deur sy voortreflike Christelike gedrag. Die man is gedoop en is tans ’n bedieningskneg. Verskeie familielede, onder meer sy vrou en twee dogters, dien ook in die Christengemeente as verkondigers van die goeie nuus van God se Koninkryk.

[Voetnoot]