Getuig deur goeie gedrag
1 In vandag se permissiewe samelewing is talle jongmense onverskillig en verwoes hulle hulle lewe deur dwelms, onsedelikheid, opstandigheid en geweld. Daarenteen is die voorbeeldige gedrag van ordentlike jongmense in die Christengemeente verkwikkend om te aanskou en beslis iets moois vir Jehovah. Dit dien as ’n kragtige getuienis wat ander tot die waarheid kan aantrek.—1 Pet. 2:12.
2 Baie ondervindinge toon dat die goeie gedrag van jong Christene ’n positiewe uitwerking op waarnemers het. ’n Onderwyseres het na ’n jong Getuie verwys wat een van haar leerlinge was en vir die hele klas gesê dat hierdie meisie se God, Jehovah, die ware God is. Sy het dit gesê omdat die meisie se gedrag altyd eerbiedig is. ’n Ander onderwyser het aan die Genootskap geskryf en gesê: “Ek wil julle graag prys vir die goeie jongmense wat julle in julle kerk het. ... Julle jongmense is werklik voorbeeldig. Hulle respekteer ouer mense, is hoflik en trek beskeie aan. En hoe goed ken hulle hulle Bybel! Dit is mos wat ’n mens van godsdiens verwag!”
3 Nog ’n onderwyseres was beïndruk deur die voortreflike gedrag van ’n sewejarige Getuie in haar klas. Sy het gehou van die seuntjie se saggeaarde en aangename persoonlikheid, wat hom opvallend anders as die ander seuns gemaak het. Sy is geraak deur sy ernstige gesindheid ten opsigte van sy godsdiensoortuigings—hy was nie skaam om weens sy geloof anders te wees nie. Sy kon sien dat sy gewete opgelei is en dat hy kon “onderskei wat reg sowel as verkeerd is” (Heb. 5:14). Uiteindelik het die seuntjie se ma die onderwyseres gaan besoek, en ’n Bybelstudie is begin. Mettertyd is die onderwyseres gedoop en later het sy ’n gewone pionier geword!
4 Een jong man is beïnvloed deur die goeie gedrag van ’n Getuie in hulle skool. Sy was werklik anders—baie hoflik, vlytig en altyd beskeie in haar kleredrag; verder het sy, anders as die ander meisies, nooit met die seuns geflankeer nie. Hy kon sien dat sy volgens Bybelbeginsels lewe. Die jong man het haar vrae oor haar godsdiensoortuiging gevra en was beïndruk deur wat hy geleer het. Hy het begin studeer, is kort daarna gedoop en het uiteindelik die pionierdiens en Betheldiens betree.
5 As jy ’n jong Christen is wat graag ’n voortreflike getuienis aan ander wil gee, moet jy in elke opsig op jou gedrag let. Moet nooit jou waaksaamheid verswak deur die wêreld se permissiewe gesindhede, beskouings of lewenswyses goed te keur nie. Wees voorbeeldig in jou spraak, kleredrag en persoonsversorging, nie net wanneer jy aan die veldbediening deelneem en by gemeentelike vergaderinge is nie, maar ook terwyl jy by die skool is en wanneer jy ontspan (1 Tim. 4:12). Jy sal ware vreugde ervaar wanneer iemand belangstelling in die waarheid begin toon omdat jy deur jou goeie gedrag ‘jou lig laat skyn het’.—Matt. 5:16.