Help ander om “uit die hart gehoorsaam” te word
1. Wat vereis Jehovah van sy aanbidders?
1 Gehoorsaamheid is grondliggend aan aanneemlike aanbidding van Jehovah (Deut. 12:28; 1 Pet. 1:14-16). Binnekort sal God se oordeel kom oor “dié wat God nie ken nie en dié wat die goeie nuus . . . nie gehoorsaam nie” (2 Tess. 1:8). Hoe kan ons ander help om ‘uit die hart gehoorsaam te word’ aan die leringe van God se Woord?—Rom. 6:17.
2. Waarom is dit belangrik om ander te help om sterk geloof op te bou?
2 Deur ander te help om geloof en liefde op te bou: In die Skrif word gehoorsaamheid ten nouste met geloof verbind. Die apostel Paulus het gepraat van “die bevel van die ewige God ter bevordering van gehoorsaamheid deur geloof” (Rom. 16:26). Hebreërs hoofstuk 11 haal talle voorbeelde van geloof aan, waarvan baie in ooreenstemming met Jehovah se geopenbaarde wil opgetree het (Heb. 11:7, 8, 17). Aan die ander kant word ongehoorsaamheid met gebrek aan geloof verbind (Joh. 3:36; Heb. 3:18, 19). Ons moet leer om God se Woord goed te gebruik sodat ons ander kan help om die soort geloof op te bou wat gehoorsaamheid voortbring.—2 Tim. 2:15; Jak. 2:14, 17.
3. (a) Hoe hou gehoorsaamheid verband met liefde? (b) Hoe kan ons Bybelstudente help om ’n liefde vir Jehovah aan te kweek?
3 Gehoorsaamheid hou ook verband met liefde vir God (Deut. 5:10; 11:1, 22; 30:16). “Dít is wat die liefde vir God beteken”, sê 1 Johannes 5:3, “dat ons sy gebooie bewaar; en tog is sy gebooie nie swaar nie.” Hoe kan ons Bybelstudente help om liefde vir Jehovah aan te kweek? Wees op die uitkyk na geleenthede tydens die studie om waardering vir Jehovah se eienskappe op te bou. Spreek jou eie diep gevoelens vir God uit. Help die student om te dink aan hoe hy ’n persoonlike verhouding met Jehovah kan opbou. Meer as enigiets anders sal liefde vir Jehovah ander—sowel as onsself—beweeg om hom uit die hart te gehoorsaam.—Matt. 22:37.
4. (a) Waarom is ons voorbeeld belangrik? (b) Wat moet ons doen om “’n gehoorsame hart” aan te kweek?
4 Deur ons voorbeeld: ’n Kragtige manier waarop ons ander kan aanmoedig om die goeie nuus te gehoorsaam, is deur ons voorbeeld. Ons moet ons egter voortdurend inspan om “’n gehoorsame hart” aan te kweek (1 Kon. 3:9; Spr. 4:23). Wat behels dit? Voed jou hart deur gereelde Bybelstudie en vergaderingbywoning (Ps. 1:1, 2; Heb. 10:24, 25). Gaan met diegene om wie se harte in ware aanbidding verenig is (Spr. 13:20). Gaan gereeld in die veldbediening uit met ’n opregte begeerte om mense in jou gebied te help. Bid vir Jehovah se hulp om ’n goeie hart te kry (Ps. 86:11). Vermy dinge wat jou hart kan besoedel, soos onsedelike of gewelddadige vermaak. Streef dinge na wat jou nader aan God bring en wat jou verhouding met hom versterk.—Jak. 4:7, 8.
5. Hoe word gehoorsames geseën?
5 Jehovah het sy eertydse volk verseker dat seëninge hulle sal inhaal as hulle na sy stem luister (Deut. 28:1, 2). Vandag stort Jehovah eweneens ryk seëninge uit op “dié . . . wat hom as heerser gehoorsaam” (Hand. 5:32). Mag ons ander dus deur ons onderrigting en voorbeeld help om uit die hart gehoorsaam te word.