Het jy “’n gehoorsame hart”?
TOE Salomo die koning van eertydse Israel geword het, het hy onbekwaam gevoel. Hy het God gevolglik om wysheid en kennis gevra (2 Kronieke 1:10). Salomo het ook gebid: “U moet aan u kneg ’n gehoorsame hart gee om oor u volk reg te spreek” (1 Konings 3:9, NW). As Salomo “’n gehoorsame hart” gehad het, sou hy God se wette en beginsels navolg en deur Jehovah geseën word.
’n Gehoorsame hart is nie ’n las nie, maar ’n bron van vreugde. Die apostel Johannes het geskryf: “Dít is wat die liefde vir God beteken, dat ons sy gebooie onderhou; en tog is sy gebooie nie swaar nie” (1 Johannes 5:3). Ons moet beslis aan God gehoorsaam wees. Jehovah is per slot van rekening ons Grootse Skepper. Aan hom behoort die aarde en alles daarop, selfs al die silwer en die goud. Ons kan dus nie werklik vir God enigiets materieel gee nie, hoewel hy ons toelaat om ons geldelike bates te gebruik om aan hom te toon dat ons hom liefhet (1 Kronieke 29:14). Jehovah verwag dat ons hom moet liefhê en nederig met hom moet wandel en sy wil moet doen.—Miga 6:8.
Toe Jesus Christus gevra is wat die grootste gebod in die Wet is, het hy gesê: “Jy moet Jehovah jou God liefhê met jou hele hart en met jou hele siel en met jou hele verstand. Dit is die grootste en eerste gebod” (Matteus 22:36-38). Een manier waarop ons daardie liefde kan betoon, is deur God te gehoorsaam. Dit behoort dus die bede van elkeen van ons te wees dat Jehovah ons ’n gehoorsame hart moet gee.
Hulle het ’n gehoorsame hart gehad
Die Bybel is vol voorbeelde van mense wat ’n gehoorsame hart gehad het. Jehovah het byvoorbeeld vir Noag gesê dat hy ’n reusagtige ark moet bou vir die behoud van lewe. Dit was ’n geweldige taak wat ongeveer 40 of 50 jaar geneem het. Selfs met al die moderne masjinerie en ander toerusting wat nou beskikbaar is, sou dit ’n ingenieursprestasie wees om so ’n reusagtige struktuur te bou wat kan dryf. Daarbenewens moes Noag mense waarsku wat hom ongetwyfeld gespot het. Maar hy was tot in die fynste besonderheid gehoorsaam. Die Bybel sê: ‘Net so het hy gedoen’ (Genesis 6:9, 22; 2 Petrus 2:5). Noag het sy liefde vir God getoon deur oor baie jare getrou en gehoorsaam te bly. Wat ’n goeie voorbeeld vir ons almal!
Dink ook aan die aartsvader Abraham. God het vir hom gesê om van die welvarende Ur van die Galdeërs na ’n onbekende land te trek. Abraham was gehoorsaam sonder om teë te praat (Hebreërs 11:8). Vir die res van sy lewe het hy en sy familie in tente gewoon. Ná baie jare as ’n vreemdeling in die land het Jehovah vir hom en sy gehoorsame vrou, Sara, met ’n seun genaamd Isak geseën. Hoe lief moes die 100-jarige Abraham tog vir hierdie seun van sy oudag gewees het! ’n Aantal jare later het Jehovah vir Abraham gevra om sy seun Isak as ’n brandoffer op te offer (Genesis 22:1, 2). Die blote gedagte daaraan moes Abraham bedroef het. Hy was nietemin gehoorsaam omdat hy Jehovah liefgehad het en geloof daarin gehad het dat die beloofde saad deur Isak sou kom, selfs al moes God hom uit die dode opwek (Hebreërs 11:17-19). Net toe Abraham op die punt gestaan het om sy seun dood te maak, het Jehovah hom egter gekeer en gesê: “Nou weet Ek dat jy God vrees en jou seun, jou enigste, van My nie teruggehou het nie” (Genesis 22:12). As gevolg van sy gehoorsaamheid het die godvresende Abraham as “Jehovah se vriend” bekend geraak.—Jakobus 2:23.
Jesus Christus is ons beste voorbeeld van gehoorsaamheid. Gedurende sy voormenslike bestaan, het hy behae daarin geskep om sy Vader in die hemel gehoorsaam te dien (Spreuke 8:22-31). As ’n mens was Jesus in alles gehoorsaam aan Jehovah, en dit was altyd vir hom ’n vreugde om Sy wil te doen (Psalm 40:9; Hebreërs 10:9). Jesus kon dus in alle eerlikheid sê: “Ek [doen] niks op eie inisiatief . . . nie; maar net soos die Vader my geleer het, spreek ek hierdie dinge. En hy wat my gestuur het, is met my; hy het my nie aan myself oorgelaat nie, omdat ek altyd die dinge doen wat hom behaag” (Johannes 8:28, 29). Jesus het uiteindelik sy lewe gewillig gegee en ’n uiters vernederende en pynlike dood gesterf om Jehovah se soewereiniteit te regverdig en die gehoorsame mensdom los te koop. Trouens, “toe hy hom in gestalte as ’n mens bevind het, het hy homself verneder en gehoorsaam geword tot in die dood, ja, die dood aan ’n folterpaal” (Filippense 2:8). Wat ’n voorbeeld is hy tog van iemand wat bewys gelewer het van ’n gehoorsame hart!
Gedeeltelike gehoorsaamheid is nie genoeg nie
Nie almal wat beweer het dat hulle aan God gehoorsaam is, het hom werklik gehoorsaam nie. Dink aan koning Saul van eertydse Israel. God het hom beveel om die goddelose Amalekiete uit te roei (1 Samuel 15:1-3). Hoewel Saul hulle as ’n nasie vernietig het, het hy hulle koning en van hulle skape en beeste gespaar. Samuel het gevra: “Waarom het jy dan nie na die stem van die HERE geluister nie?” In antwoord hierop het Saul gesê: “Ek het na die stem van die HERE geluister . . . Die manskappe [van Israel] het van die buit kleinvee en beeste geneem, die beste . . . om aan die HERE . . . te offer.” Samuel het die belangrikheid van absolute gehoorsaamheid beklemtoon en geantwoord: “Het die HERE behae in brandoffers en slagoffers soos in gehoorsaamheid aan die stem van die HERE? Kyk, om gehoorsaam te wees is beter as slagoffer, om te luister beter as die vet van ramme. Want wederstrewigheid is ’n sonde van waarsêery, en eiesinnigheid is afgodery en beeldediens. Omdat jy die woord van die HERE verwerp het, het Hy jou as koning verwerp” (1 Samuel 15:17-23). Hoeveel het Saul tog verloor omdat hy nie ’n gehoorsame hart gehad het nie!
Selfs die wyse koning Salomo, wat vir ’n gehoorsame hart gebid het, het nie daarmee volgehou om Jehovah te gehoorsaam nie. Hy het in stryd met God se wil met vreemde vroue getrou wat hom beïnvloed het om teen God te sondig (Nehemia 13:23, 26). Salomo het God se guns verloor omdat hy nie’n gehoorsame hart behou het nie. Dit moet as ’n waarskuwing vir ons dien!
Dit beteken nie dat Jehovah volmaaktheid van sy menseknegte vereis nie. Hy is “gedagtig dat ons stof is” (Psalm 103:14). Almal van ons sal weliswaar by tye foute begaan, maar God kan sien of ons werklik ’n opregte begeerte het om hom te behaag (2 Kronieke 16:9). As ons ’n fout begaan as gevolg van menslike onvolmaaktheid maar berou het, kan ons vergifnis vra op grond van Christus se losprysofferande, vol vertroue dat Jehovah ‘menigvuldiglik vergeef’ (Jesaja 55:7; 1 Johannes 2:1, 2). Die hulp van liefdevolle Christen- ouer manne sal dalk ook nodig wees sodat ons geestelik kan herstel en ’n gesonde geloof en ’n gehoorsame hart kan hê.—Titus 2:2; Jakobus 5:13-15.
Hoe gehoorsaam is jy?
As Jehovah se knegte voel die meeste van ons ongetwyfeld dat ons ’n gehoorsame hart het. Ons redeneer dalk: Neem ek nie aan die Koninkrykspredikingswerk deel nie? Neem ek nie ferm standpunt in wanneer groot geskille soos dié oor neutraliteit ontstaan nie? En woon ek nie Christelike vergaderinge gereeld by soos die apostel Paulus ons aangespoor het nie? (Matteus 24:14; 28:19, 20; Johannes 17:16; Hebreërs 10:24, 25). Dit is waar dat Jehovah se volk in die geheel hartgrondige gehoorsaamheid in sulke belangrike sake openbaar.
Maar wat van ons gedrag in alledaagse aangeleenthede, miskien in skynbare kleinighede? Jesus het gesê: “Hy wat in die geringste getrou is, is ook in baie getrou, en hy wat in die geringste onregverdig is, is ook in baie onregverdig” (Lukas 16:10). Elkeen van ons sal derhalwe goed doen as ons onsself afvra: Het ek ’n gehoorsame hart wat klein dingetjies betref of sake waarvan ander nie eers weet nie?
Die psalmis het getoon dat hy selfs in sy huis, waar ander hom nie gesien het nie, ‘in die opregtheid van sy hart gewandel het’ (Psalm 101:2). Terwyl jy in jou huis sit, skakel jy dalk die televisie aan en begin jy om na ’n rolprent te kyk. Net hier kan jou gehoorsaamheid op die proef gestel word. Die rolprent kan onsedelik raak. Sal jy aanhou kyk, en rasionaliseer dat dit die soort rolprent is wat deesdae vertoon word? Of sal jou gehoorsame hart jou beweeg om ag te slaan op die skriftuurlike opdrag: ‘Laat hoerery en onreinheid onder julle selfs nie genoem word nie’? (Efesiërs 5:3-5). Sal jy die TV afskakel, al is die verhaal boeiend? Of sal jy van kanaal verander as ’n program gewelddadig raak? “Die HERE toets die regverdige”, het die psalmis gesing, “maar sy siel haat die goddelose en die wat geweld liefhet.”—Psalm 11:5.
’n Gehoorsame hart bring seëninge mee
Daar is natuurlik baie gebiede in die lewe waar ons met vrug selfondersoek kan doen om te sien of ons God werklik uit die hart gehoorsaam. Ons liefde vir Jehovah moet ons beweeg om hom te behaag en te doen wat hy in sy Woord, die Bybel, vir ons sê. ’n Gehoorsame hart sal ons help om ’n goeie verhouding met Jehovah te handhaaf. Ja, as ons in alles gehoorsaam is, ‘sal die woorde van ons mond en die oordenking van ons hart welbehaaglik wees voor Jehovah’.—Psalm 19:15.
Omdat Jehovah ons liefhet, leer hy ons gehoorsaamheid vir ons eie beswil. En ons word grootliks daardeur bevoordeel as ons heelhartig ag slaan op Goddelike onderrigting (Jesaja 48:17, 18). Laat ons dus die hulp wat ons hemelse Vader deur sy Woord, sy gees en sy organisasie voorsien blymoedig aanvaar. Ons word so goed onderrig dat dit is asof ons ’n stem agter ons hoor wat sê: “Dit is die weg, wandel daarop!” (Jesaja 30:21). Mag ons, namate Jehovah ons onderrig deur die Bybel, Christelike publikasies en gemeentelike vergaderinge aandag skenk, toepas wat ons leer en ‘in alles gehoorsaam wees’.—2 Korintiërs 2:9.
’n Gehoorsame hart sal groot vreugde en baie seëninge tot gevolg hê. Dit sal vir ons gemoedsrus meebring, want ons sal weet dat ons vir Jehovah God welgevallig is en dat ons sy hart verbly (Spreuke 27:11). ’n Hart wat gehoorsaam is, sal vir ons ’n beskerming wees wanneer ons in die versoeking kom om verkeerd te doen. Ons moet dus beslis ons hemelse Vader gehoorsaam en bid: ‘Gee aan u kneg ’n gehoorsame hart.’
[Foto-erkenning op bladsy 29]
Uit die Self-Pronouncing Edition of the Holy Bible, wat die King James en die Revised versions bevat