Skep geleenthede om te getuig
1 Die Christengemeente bestaan uit mense met verskillende omstandighede. En tog is ons almal vasbeslote om Jehovah te loof (Ps. 79:13). Hoe kan ons geleenthede skep om te getuig as swak gesondheid en ander moeilike omstandighede ons aandeel aan die verkondiging van die goeie nuus beperk?
2 Tydens jou daaglikse bedrywighede: Jesus het van die geleentheid gebruik gemaak om vir mense te getuig wanneer hy ook al met hulle in aanraking gekom het. Hy het met Matteus gepraat toe hy verby ’n belastingkantoor gestap het, met Saggeus terwyl hy gereis het en met die Samaritaanse vrou terwyl hy gerus het (Matt. 9:9; Luk. 19:1-5; Joh. 4:6-10). Ons kan ook ’n gewone gesprek in ’n getuienis verander terwyl ons met ons daaglikse bedrywighede besig is. As ons ’n Bybel asook traktate of brosjures byderhand het, sal dit ons help om gereed te wees om oor ons hoop te praat.—1 Pet. 3:15.
3 Word jou deelname aan die deur-tot-deur-werk beperk omdat dit vir jou moeilik is om rond te beweeg? Wees dan op die uitkyk na geleenthede om te getuig vir mediese personeel en ander met wie jy in aanraking kom (Hand. 28:30, 31). As jou omstandighede jou dikwels by die huis hou, kan jy probeer om oor die telefoon of deur middel van briewe te getuig. Een suster skryf gereeld vir familielede wat nie Getuies is nie. Haar briewe bevat aanmoedigende gedagtes uit die Bybel asook ondervindinge wat sy tydens haar bediening gehad het.
4 By die werk of by die skool: Ons begeerte om Jehovah te loof, sal ons ook beweeg om geleenthede by die werk of by die skool te skep om saadjies van waarheid te saai. ’n Agtjarige verkondiger het vir sy klas vertel wat hy oor die maan in die Ontwaak! gelees het. Nadat sy onderwyseres uitgevind het waar hy die inligting gekry het, het sy Die Wagtoring en die Ontwaak! gereeld begin neem. As ons by die werk eenvoudig een van ons publikasies laat waar ander dit kan sien, kan dit hulle vrae laat vra wat tot ’n getuienis kan lei.
5 Kan jy aan maniere dink waarop jy geleenthede kan skep om te getuig terwyl jy met jou daaglikse bedrywighede besig is? Mag ons daarna streef om elke dag “aan God ’n lofoffer [te] bring” deur ons omstandighede ten volle te benut.—Heb. 13:15.