‘Volg my voortdurend’
1 Baie mense lewe net vir hulleself, en tog is hulle dikwels ongelukkig. Daarenteen het Jesus ’n weg aanbeveel wat behels dat ons onselfsugtig gee, ’n weg wat ware geluk meebring (Hand. 20:35). Hy het gesê: “As iemand agter my aan wil kom, laat hy homself verloën . . . en my voortdurend volg” (Mark. 8:34). Dit behels meer as om ons net af en toe sekere genietinge te ontsê. Dit beteken dat ons elke dag op so ’n manier moet lewe dat ons Jehovah behaag, nie onsself nie.—Rom. 14:8; 15:3.
2 Dink aan die voorbeeld van die apostel Paulus. Weens “die oortreffende waarde van die kennis van Christus Jesus” het Paulus opgehou om persoonlike begeertes na te jaag en het hy hom daaraan gewy om Koninkryksbelange te bevorder (Fil. 3:7, 8). “Wat my betref”, het hy gesê, “ek sal my met die grootste genoeë uitstort en heeltemal uitgestort word” om ander te dien (2 Kor. 12:15). Ons moet elkeen ons afvra: ‘Hoe gebruik ek my tyd, energie, vermoëns en middele? Spits ek my daarop toe om my eie belange te bevorder, of probeer ek Jehovah behaag?’
3 Geleenthede om te gee: God se volk bestee elke jaar meer as ’n miljard uur aan die lewensreddende Koninkrykspredikingswerk. In die gemeente verrig jonk sowel as oud ’n verskeidenheid take wat ander tot voordeel strek. Daar word ook baie werk gedoen in verband met kring- en streekbyeenkomste sowel as die oprigting en instandhouding van geboue wat ter bevordering van ware aanbidding gebruik word. En dink aan die liefdevolle hulp wat voorsien word deur broers wat op Hospitaalskakelkomitees en Pasiëntbesoekgroepe dien. Al hierdie selfopofferende pogings is ’n seën vir ons Christenbroederskap!—Ps. 110:3.
4 Wanneer daar ’n ramp of ’n noodgeval is, kan geleenthede ontstaan om op verskeie maniere van onsself te gee. Maar meer dikwels sal ons dalk agterkom dat ’n mede-Christen net hulp of aanmoediging nodig het (Spr. 17:17). Wanneer ons ons met graagte inspan om ander te dien en Koninkryksbelange te bevorder, volg ons Jesus se voorbeeld (Fil. 2:5-8). Laat ons daarna streef om dit voortdurend te doen.