Volg Jesus voortdurend
1 By een geleentheid het Jesus gesê: “As iemand agter my aan wil kom, laat hy homself verloën en sy folterpaal opneem en my voortdurend volg” (Matt. 16:24). Ons wil beslis positief op Jesus se woorde reageer. Kom ons ondersoek sy uitnodiging om te sien wat elke frase behels.
2 “Laat hy homself verloën”: Wanneer ons ons lewe aan Jehovah toewy, verloën ons onsself. Die grondbetekenis van die Griekse woord wat met “verloën” vertaal word, is “om nee te sê”. Dit beteken dat ons ons eie strewes, begeertes, gerief en selfsugtige genietinge vrywillig prysgee—vasbeslote om Jehovah tot in alle ewigheid te behaag.—Rom. 14:8; 15:3.
3 ‘Neem sy folterpaal op’: Die Christen se lewe is ’n lewe waartydens hy die folterpaal van opofferende diens aan Jehovah dra. Een manier waarop ’n selfopofferende gees weerspieël kan word, is deur jou in die bediening in te span. Tot dusver het baie verkondigers vanjaar die hulppionierdiens geniet. Dalk tel jy onder hulle en kan jy bevestig dat die seëninge wat jy ontvang meer as vergoed vir die opofferinge wat jy maak. Diegene wat nie as hulppioniers kan dien nie, het dikwels hulle reëlings so getref dat hulle as gemeentelike verkondigers meer tyd in die predikingswerk kan bestee. Met dié doel voor oë reël sommige gemeentes dat hulle velddiensvergaderinge ’n paar minute vroeër as gewoonlik gehou word. Baie verkondigers waardeer hierdie ekstra tyd om velddiens te doen. Sommige het ook uitstekende resultate gehad toe hulle besluit het om aan ‘nog net een deur’ te klop of om ‘net ’n paar minute langer’ te werk.
4 Nog ’n manier waarop ’n selfopofferende gees getoon word, is deur persoonlike doelwitte te stel. Party het gewone pioniers geword deur deeglik te beplan en hulle rooster aan te pas. Vir ander was dit moontlik om hulle sake so te reël dat hulle hulle vir Betheldiens of sendingwerk beskikbaar kon stel. Party het na ’n gebied verhuis waar meer Koninkryksverkondigers nodig is.
5 ‘Volg my voortdurend’: Hoewel Jesus se dissipels baie beproewinge deurgemaak het, het sy ywer en volharding in die bediening hulle bemoedig (Joh. 4:34). Sy teenwoordigheid en sy boodskap het hulle besiel. Daarom het diegene wat hom gevolg het ware vreugde uitgestraal (Matt. 11:29). Laat ons eweneens mekaar aanmoedig om te volhard in die allerbelangrikste Koninkrykspredikings- en dissipelmaakwerk.
6 Mag ons almal positief reageer op Jesus se uitnodiging om hom voortdurend te volg deur ’n selfopofferende gees aan te kweek. Terwyl ons dit doen, sal ons nou groot vreugde smaak en kan ons uitsien na selfs groter seëninge in die toekoms.