Vraebus

◼ Watter gevare hou dit in om die Internet te gebruik om met iemand te assosieer wat ons nie ken nie?

’n Aantal webwerwe is ontwerp sodat mense mekaar deur middel van die Internet kan ontmoet en met mekaar kan korrespondeer. Baie van hierdie webwerwe laat mense toe om hulle eie profiel te skep, wat prente en ander persoonlike inligting kan insluit, en dit dan op die webwerf te plaas. Ander wat na die profiel kyk, kan dan met hulle kontak maak. Sulke webwerwe is baie gewild onder jongmense, en party jongmense in die gemeente het dit al gebruik om interaksie te hê met ander wat sê dat hulle Jehovah se Getuies is.

Dit is maklik vir iemand wat ons oor die Internet ontmoet, om oneerlik te wees oor sy identiteit, sy geestelikheid of sy beweegredes (Ps. 26:4). Iemand wat sê dat hy een van Jehovah se Getuies is, kan in werklikheid ’n ongelowige, ’n uitgesette persoon of selfs ’n bedrywige afvallige wees (Gal. 2:4). Volgens berig gebruik baie pedofiele sulke webwerwe om hulle slagoffers te vind.

Al is ons daarvan oortuig dat dié met wie ons korrespondeer, ’n goeie naam in die gemeente het, kan gesprekke wat oor die Internet gevoer word, maklik in ’n onheilsame rigting dryf. Dit is omdat mense geneig is om minder terughoudend te wees teenoor dié wat hulle nog nie persoonlik ontmoet het nie. Hulle beskou dalk ook aanlyn-kommunikasie as privaat en meen dalk dat wat hulle ook al sê, nie onder die aandag van ander, soos hulle ouers of die ouer manne, sal kom nie. Ongelukkig is ’n aantal jongmense uit Christengesinne hierdeur verstrik, en hulle het by onwelvoeglike spraak betrokke geraak (Ef. 5:3, 4; Kol. 3:8). Ander het seksueel prikkelende foto’s van hulleself, suggestiewe skuilname of skakels na seksueel eksplisiete musiekvideo’s in hulle profiel ingesluit.

In die lig van die voorafgaande moet ouers ’n ogie hou oor wat hulle kinders op die rekenaar doen (Spr. 29:15). Dit sal gevaarlik wees om ’n vreemdeling in ons huis in te nooi of om hom toe te laat om alleen saam met ons kinders te wees. Net so is dit gevaarlik vir ons of ons kinders om vriende te maak met vreemdelinge oor die Internet, al sê hulle dat hulle Jehovah se Getuies is.—Spr. 22:3.