Hoe om vir die Diensvergadering voor te berei
1. Wat is die doel van die Diensvergadering, en hoe kan ons die meeste voordeel daaruit trek?
1 Die Diensvergadering is bedoel om ons toe te rus vir ’n produktiewe bediening. Dit fokus op die verkondiging van die goeie nuus van die Koninkryk, die dissipelmaakwerk en die bekendmaking van die feit dat God se oordeel naby is (Matt. 28:19, 20; Mark. 13:10; 2 Pet. 3:7). Ons trek die meeste voordeel uit hierdie belangrike vergadering wanneer ons goed voorbereid is en gereed is om daaraan deel te neem.
2. Hoe kan ons voorberei om na ’n toespraak te luister?
2 Toespraak: Die bronnemateriaal vir ’n toespraak word gewoonlik in die instruksies vir die spreker aangedui. Jy kan die toegewese materiaal deurgaan, insluitende die teksverwysings, en dink oor hoe jy die inligting in jou bediening kan toepas.
3. Wat kan ons doen om vir ’n vraag-en-antwoord-bespreking voor te berei?
3 Vraag-en-antwoord-bespreking: Hierdie deel sal baie soos die Wagtoring-studie behartig word, met ’n kort inleiding en slot. Onderstreep die sleutelgedagtes in elke paragraaf, en wees voorbereid om kort, betekenisvolle kommentare te lewer.
4. Hoe kan ons vir ’n gehoorbespreking voorberei?
4 Gehoorbespreking: Hierdie deel sal as ’n toespraak aangebied word, maar die spreker sal plek-plek vir gehoordeelname vra. As jy die sleutelgedagtes onderstreep en die teksverwysings naslaan, sal jy dalk kommentaar kan lewer wanneer vrae gevra word. Die broer wat hierdie deel behartig, sal sy bes doen om die gehoor te betrek wanneer die hoofpunte gedek word.
5. Wat sal ons help om die meeste voordeel uit demonstrasies te trek?
5 Demonstrasies: Party dele sal realistiese demonstrasies insluit om te toon hoe die inligting wat bespreek word, in die plaaslike gebied gebruik kan word. Ouer manne, ervare verkondigers of pioniers sal gevra word om hiermee te help. Jou voorbereiding vir hierdie deel sal dalk insluit dat jy vooraf nadink oor hoe die inligting aangebied sal word. Wanneer ’n voorgestelde aanbieding gedemonstreer word, kan jy dink oor hoe jy dit in jou eie woorde sal stel en dit by verskillende huisbewoners sal aanpas. Maak seker dat jy die publikasie of tydskrif by jou het wat in die demonstrasie gebruik sal word. Gedurende julle aand vir Gesinsaanbidding sal julle dit dalk nuttig vind om party van hierdie aanbiedings te oefen.
6. Wat is party redes om vir die Diensvergadering voor te berei?
6 Die Diensvergadering is aangenamer wanneer ons voorberei het en ’n idee het van die uitstekende onderrigting wat aangebied sal word. Dit sal meer wedersydse aanmoediging tot gevolg hê (Rom. 1:11, 12). As ons die tyd inruim om vir die Diensvergadering voor te berei, sal ons beter toegerus wees om ons opdrag uit te voer.—2 Tim. 3:17.