Instruksies vir dié wat Diensvergaderingdele behartig
Die bewoording van die Diensvergaderingrooster word vanaf hierdie nommer van Ons Koninkryksbediening vereenvoudig. Die volgende instruksies en herinneringe sal dít wat gesê is in die artikel “Hoe om vir die Diensvergadering voor te berei”, in Ons Koninkryksbediening vir Mei 2009, op datum bring en verduidelik.
◼ Toespraak: Dit verwys na ’n bespreking wat op die toegewese inligting gebaseer is, sonder gehoordeelname. Die spreker moet die aandag vestig op dít wat vir die gemeente die nuttigste sal wees.
◼ Vrae en antwoorde: Soos die Wagtoring-studie het hierdie deel ’n baie kort inleiding en slot, en vrae word oor al die paragrawe gevra. Die broer wat dit behartig, moenie te veel opmerkings maak nie. Sleuteltekste kan na gelang van die tyd gelees word. Paragrawe moenie gelees word tensy die instruksies so sê nie.
◼ Bespreking: Dit is ’n toespraak wat gehoordeelname insluit. Dit is nie net ’n toespraak nie, en dit is ook nie net vrae en antwoorde nie.
◼ Demonstrasies en onderhoude: Instruksies om te demonstreer, beteken dat die broer wat die deel moet behartig, daarvoor verantwoordelik is om ’n demonstrasie in te sluit; hy hoef nie self die demonstrasie te doen nie. Diegene wat hy kies om hom te help, moet bekwaam en voorbeeldig wees, en indien moontlik moet hy lank voor die tyd reëlings met hulle tref. Nuwe en onervare verkondigers moet liewer nie gebruik word om te demonstreer hoe die werk gedoen moet word net sodat hulle die geleentheid kan kry om op die verhoog te wees nie, maar party kan as huisbewoners gebruik word. Verkondigers wat ’n aanbieding demonstreer, moet seker maak dat hulle na die gehoor kyk. Diegene met wie ’n onderhoud gevoer word, moet op die verhoog wees wanneer hulle kommentaar lewer, nie in hulle sitplek nie. Demonstrasies en onderhoude moet geoefen word. As die vergadering die tydgrens oorskry en ’n broer sy deel moet verkort, sal hy nie demonstrasies of onderhoude uitlaat nie. Bedieningsknegte moet die koördineerder van die liggaam van ouer manne of ’n ander ouer man raadpleeg voordat hulle deelnemers kies.
As ’n unieke deel spesiale instruksies het, moet dit noukeurig gevolg word. As broers Diensvergaderingdele behartig soos hierbo uiteengesit word, sal hulle daartoe bydra dat die Diensvergadering “welvoeglik en volgens reëling geskied”.—1 Kor. 14:40.