Hoe sal jy antwoord?
1. Waarom moet ons Jesus se voorbeeld in gedagte hou wanneer iemand ons ’n vraag vra?
1 Mense verwonder hulle tot vandag toe oor die doeltreffende wyse waarop Jesus op vrae en versoeke gereageer het. Wanneer ons in ons bediening verskillende soorte vrae gevra word, sal dit goed wees as ons Jesus in hierdie verband navolg.—1 Pet. 2:21.
2. Wat kan ons help om ’n doeltreffende antwoord op ’n vraag te gee?
2 Luister eers: Jesus het die beskouing van die persoon wat die vraag gevra het, in ag geneem. Partykeer vereis dit dat ons vrae vra om vas te stel wat die persoon werklik bedoel. Iemand wat vra: “Glo jy in Jesus?” wonder dalk eintlik waarom jy nie Kersfees vier nie. As jy weet wat die persoon werklik pla, kan jy op doeltreffender wyse met hom redeneer.—Luk. 10:25-37.
3. Wat het ons tot ons beskikking om ons te help om bevredigende skriftuurlike antwoorde te vind?
3 Gee antwoorde uit God se Woord: Dit is gewoonlik die beste om te wys hoe die Bybel die vraag beantwoord (2 Tim. 3:16, 17; Heb. 4:12). Die Redenering-boek en “Bybelonderwerpe vir bespreking” in die Nuwe Wêreld-vertaling van die Heilige Skrif is nuttig om presies die regte antwoord te gee. Selfs as die persoon wat die vraag vra, nie die Bybel as ’n gesag aanvaar nie, kan jy op ’n taktvolle wyse vir hom wys wat die Skrif leer. Spoor hom aan om ernstig na te dink oor die beproefde wysheid wat in die Bybel gevind word. As jy Jesus navolg, sal jou antwoorde “soos goue appels in silwersnywerk” wees—waardig, mooi en kosbaar.—Spr. 25:11.
4. Wanneer is dit die beste om nie elke vraag te probeer beantwoord nie?
4 Moet ons elke vraag beantwoord? As jy nie die antwoord op ’n vraag ken nie, moet jy nie verleë voel nie om te sê: “Ek weet nie, maar ek kan navorsing oor jou vraag doen en terugkom met wat ek gevind het.” Sulke beskeidenheid en persoonlike belangstelling beweeg die huisbewoner dalk om jou te nooi om terug te kom. As jy agterkom dat ’n vraag deur teenstanders gevra word wat dalk ’n stryery probeer begin, moet jy Jesus navolg deur jou antwoord te beperk (Luk. 20:1-8). En as iemand wat nie werklik in die waarheid belangstel nie, jou by ’n woordestryd probeer betrek, moet jy vriendelik die gesprek beëindig en jou tyd gebruik om na opregtes te soek.—Matt. 7:6.
5. Watter voorbeeld het Jesus daarin gestel om vrae te beantwoord?
5 Jesus het geweet dat hy op Jehovah moet vertrou om sy toewysing uit te voer om “van die waarheid te getuig”, wat ingesluit het dat hy die vrae van opregte mense moes beantwoord (Joh. 18:37). Wat ’n voorreg is dit tog om Jesus na te volg wanneer ons ’n antwoord gee aan dié wat “die regte gesindheid vir die ewige lewe . . . het”!—Hand. 13:48.