Hoe om die brosjure Wie doen vandag Jehovah se wil? te gebruik
’n Nuwe brosjure wat saamgestel is om Bybelstudente na die organisasie te rig
1. Wat is die drievoudige doel van die Jehovah se wil-brosjure?
1 Het jy al die nuwe brosjure Wie doen vandag Jehovah se wil? begin gebruik? Die doel daarvan is (1) om Bybelstudente met ons as ’n groep vertroud te maak (2) om hulle te help om van ons bedrywighede te leer en (3) om hulle te wys hoe ons organisasie werk. Die Jehovah se wil-brosjure bevat lesse van een bladsy elk wat in net vyf tot tien minute aan die einde van elke studie bespreek kan word.
2. Beskryf hoe hierdie brosjure saamgestel is en die kenmerke daarvan.
2 Hoe dit saamgestel is: Die brosjure is in drie dele verdeel; elke deel bespreek ’n ander faset van Jehovah se organisasie, soos vroeër gemeld is. Die titel van elk van die 28 lesse is in die vorm van ’n vraag, en die vetgedrukte onderhofies wat daarop volg, beantwoord hierdie vraag. Dit bevat foto’s uit meer as 50 lande, met byskrifte om die internasionale omvang van ons werk aan te dui. ’n Aantal lesse het “Vind meer uit”-vensters, wat wenke bevat wat jy jou student kan aanspoor om toe te pas.
3. Hoe kan ons die Jehovah se wil-brosjure gebruik?
3 Hoe jy dit kan gebruik: Begin deur die aandag te vestig op die vraag wat die titel van die les is. Beklemtoon dan die vetgedrukte onderhofies terwyl julle die les saam lees. Bespreek laastens die hersieningsvrae onderaan die bladsy. Julle kan die hele les lees of ’n gedeelte lees en dit bespreek. Besluit self watter van die teksverwysings gelees moet word. Moenie vergeet om die prente en “Vind meer uit”-vensters te bespreek nie. Oor die algemeen moet die lesse in volgorde bespreek word. Maar as ’n student in ’n onderwerp belangstel wat eers later bespreek word, kan jy natuurlik na daardie les gaan. As daar byvoorbeeld binnekort ’n byeenkoms gaan wees, kan jy dadelik les 11 bespreek.
4. Waarom is jy bly oor hierdie nuwe hulpmiddel?
4 Wanneer ons die Bybel met iemand studeer, help ons hom om ons hemelse Vader te leer ken. Maar ons moet hom ook oor Jehovah se organisasie leer (Spr. 6:20). Hoe bly is ons tog oor hierdie nuwe hulpmiddel wat dit vir ons maklik maak om dit te doen!