Benut jou geleenthede om die Koninkryksboodskap te verkondig!

1. Watter les kan ons uit Dawid se voorbeeld leer?

¹ Koning Dawid was iemand wat nie toegelaat het dat sy omstandighede hom onderkry nie. Byvoorbeeld, Dawid wou ’n huis vir Jehovah bou. Toe Dawid verhinder is om dit te doen, het hy sy doelwitte aangepas en gehelp om dinge reg te kry sodat Salomo die tempel kon bou (1 Kon. 8:17-19; 1 Kron. 29:3-9). Dawid het nie getob oor wat hy nie kon doen nie, maar het eerder gefokus op wat hy kon doen. Hoe kan ons Dawid se voorbeeld navolg terwyl ons kyk na maniere waarop ons die Koninkryksboodskap kan verkondig?

2. Watter selfondersoek kan ons doen?

² Doen wat jy kan: Baie het hulle lewe vereenvoudig sodat hulle hulp- of gewone pionierdiens kan doen (Matt. 6:22, vtn. in NW). Kan jy dit ook doen? As jy jou omstandighede biddend ondersoek, sal jy dalk sien dat “’n groot deur wat tot bedrywigheid lei”, vir jou oop is. As dit die geval is, moet jy die geleentheid aangryp!—1 Kor. 16:8, 9.

3. Watter geleenthede kan ons gebruik om te getuig, al laat ons omstandighede ons nie toe om te pionier nie?

³ Maar sê nou jou omstandighede laat jou nie toe om te pionier nie? Moenie ander geleenthede wat aan jou beskikbaar is, oor die hoof sien nie. Byvoorbeeld, as jy by jou sekulêre werk met ongelowiges in aanraking kom, kan jy gerus ’n gepaste geleentheid gebruik om vir hulle te getuig. Of as jy gesondheidsprobleme het, kan jy gebruik maak van geleenthede om vir jou gesondheidsorgvoorsieners te preek. Onthou dat diegene wat weens hulle ouderdom of ’n ernstige gesondheidsprobleem nie veel kan doen nie, velddienstyd in eenhede van 15 minute kan rapporteer. Wanneer jy jou maandelikse velddiensrapport invul, moet jy seker maak dat jy die tyd insluit wat jy aan die informele getuieniswerk bestee het, sowel as enige lektuur wat jy geplaas het, insluitende traktate en uitnodigings vir die Gedenkmaal en die streekbyeenkoms. Jy sal dalk verbaas wees hoeveel tyd jy aan die einde van die maand sal hê as jy al hierdie klein geleenthede gebruik!

4. Wat is jy vasbeslote om te doen?

⁴ Wat ons persoonlike omstandighede ook al is, laat ons elke geleentheid aangryp om die goeie nuus te verkondig. Sodoende sal ons tevrede wees in die wete dat ons alles in ons vermoë doen om die Koninkryk te bevorder.—Mark. 14:8; Luk. 21:2-4.