Help die blindes om van Jehovah te leer

1. Hoe het Jesus getoon dat hy medelye met die blindes het?

¹ Jesus sou oor ’n paar dae sterf. Terwyl hy uit die stad Jerigo uitgegaan het, het twee blinde bedelaars uitgeroep: “Here, wees ons barmhartig!” Hoewel die beproewinge wat op Jesus gewag het, swaar op sy gemoed gedruk het, het hy gaan staan, die mans geroep en hulle genees (Matt. 20:29-34). Hoe kan ons die medelye wat Jesus met die blindes gehad het, navolg?

2. Hoe kan ons vir ’n blinde persoon getuig wat ons in die openbaar teëkom?

² Wees behulpsaam: As jy ’n blinde persoon teëkom, dalk in die openbaar, kan jy jou aan hom voorstel en aanbied om hom te help. Aangesien die blindes dikwels uitgebuit word, sal die persoon dalk eers agterdogtig wees. Maar jou opregte vriendelikheid en belangstelling sal hom moontlik gerusstel. Hou ook in gedagte dat daar verskillende grade van blindheid is, en dit sal dalk bepaal hoeveel hulp die persoon nodig het. Nadat jy hulp verleen het, kan jy miskien meld dat jy mense help om meer omtrent die Bybel te leer. Bied aan om vir hom ’n teks te lees, soos Psalm 146:8 of Jesaja 35:5, 6. As hy braille kan lees, kan jy hom vra of hy ’n braillepublikasie wil hê wat hom sal help om meer van die Bybel te leer. Jy kan hom ook help om oudiolêers by jw.org af te laai. As sy rekenaar ’n skermleserprogram het wat teks hardop van die skerm af lees, sal hy dalk selfs die artikels op jw.org waardeer asook die publikasies wat in RTF (Rich Text Format) afgelaai kan word.—Sien die venster “Wanneer jy ’n blinde persoon help, moet jy . . .”

3. Hoe kan ons na blinde mense in ons gebied soek?

³ Soek na die blindes: Ons ontmoet selde blinde mense in die huis-tot-huis-bediening omdat baie van hulle nie gemaklik voel om met vreemdelinge te praat wat aan hulle deur klop nie. Dit verg dus inspanning om blindes te “soek” sodat ons vir hulle kan getuig (Matt. 10:11). Het jy ’n werksmaat of ’n skoolmaat wat blind is? Neem die inisiatief om met hom te praat. As daar ’n skool vir die blindes in julle gebied is, kan jy aanbied om van ons braillepublikasies vir hulle biblioteek te neem. Ken jy iemand wat ’n blinde gesinslid het? Is daar organisasies in jou gebied wat nuttige dienste aan die blindes voorsien of is daar ’n versorgingsoord waar daar blinde mense woon? Verduidelik vir die gesinslid, die ontvangsdame of die direkteur dat Jehovah se Getuies baie daarin belangstel om blinde mense te help, en bied aan om braillepublikasies of oudio-opnames te bring. Wys vir die persoon die Bybel se belofte dat God blindheid binnekort uit die weg sal ruim. Jy kan ook vir die persoon die video met die titel “Without It, I Would Feel Lost” op jw.org wys, waarin ’n blinde man sy ondervinding vertel en sê hoe hy daarby baat gevind het om die Bybel in braille te hê. As jy verduidelik wat die doel van jou besoek is, sal jy blinde mense dalk met die goeie nuus kan bereik.

4. Watter lesse leer ons uit Janet se ondervinding?

⁴ ’n Blinde suster met die naam Janet het ’n inrigting besoek waar daar blinde mense woon. Sy het ’n gesprek met ’n jong vrou begin. Janet het vir haar gesê: “Jesus het blinde mense genees om te toon wat hy vir alle blinde mense sal doen.” Hulle het Openbaring 21:3, 4 gelees, en Janet het verduidelik hoe hierdie belofte deur middel van God se Koninkryk bewaarheid sal word. Die vrou het ’n rukkie gedink en gesê: “Ek het dit nog nooit uit die oogpunt van ’n blinde persoon gesien nie. Die meeste mense wat kan sien, glo dat mense blind is as gevolg van iets wat hulle of hulle voorouers gedoen het.” Janet het per epos vir die vrou ’n skakel na die Leer Bybel-boek gestuur, en nou studeer hulle die Bybel twee keer ’n week saam.

5. Watter seëninge sal dit meebring as ons belangstelling toon in die blindes, al kan ons hulle nie genees soos Jesus gedoen het nie?

⁵ Ons kan mense natuurlik nie van hulle blindheid genees soos Jesus gedoen het nie, maar ons kan almal wie se verstande deur die god van hierdie stelsel van dinge verblind is, insluitende dié wat fisies blind is, help om die waarheid van God se Woord te verstaan (2 Kor. 4:4). Jesus het die twee mans naby Jerigo genees omdat hy “beweeg [is] deur innige jammerte” (Matt. 20:34). As ons soortgelyke belangstelling in die blindes toon, kan ons die voorreg geniet om party te help om te leer van Jehovah, die een wat blindheid vir ewig uit die weg sal ruim.