Oë word vir die goeie nuus geopen

“DIE lug is nie minder blou omdat die blinde man dit nie sien nie”, sê ’n Deense spreuk. Maar sien ons in ons besige daaglikse lewe as ’t ware dat die lug blou is? Beskou ons die toekoms met vertroue? Glo ons werklik die goeie nuus waarvan God se Woord, die Bybel, praat?

In die vorige artikel het ons na aspekte van letterlike blindheid gekyk. Laat ons nou ’n soort sig ondersoek wat veel belangriker is. Ons blywende geluk sowel as ons geliefdes se toekoms is daarby betrokke.

Ons lewe ongetwyfeld in “kritieke tye . . . wat moeilik is om deur te kom” (2 Timotheüs 3:1, NW). Wat gebeur wanneer mense worstel om ’n bestaan te maak, gesondheids- en gesinsprobleme moet verduur en maatskaplike ongeregtigheid en ’n gebrek aan liefde die hoof moet bied? Ongelukkig vind baie dat hulle vertroue in hulle medemens, godsdiens en regering afneem. Sommige besef dat daar geen uitweg is nie en kom tot die gevolgtrekking dat hulle probleme nooit op ’n normale manier opgelos sal word nie. In die Brasiliaanse koerant Jornal da Tarde sê Jacob Pinheiro Goldberg: “In die aangesig van die wrede werklikheid voel mense so gegrief oor foute dat hulle nie logies redeneer nie, en hulle vertrou op mistisisme, wat geen oplossing bied nie.” Maar selfs wanneer dinge skeef loop, moet ons goeie oordeel aan die dag lê, nie waar nie?

Stel jou vir ’n oomblik voor dat jy ’n huis vir jou gesin nodig het en geld nie ’n probleem is nie. Jy kyk dalk rond en gaan kyk na ’n hele paar huise in verskillende buurte. Hoewel eiendomsagente vir jou iets probeer vind wat in jou smaak val, kry jy eenvoudig nie die huis wat jy in gedagte het nie. Maar aangesien die tevredenheid en welsyn van jou gesin daarby betrokke is, gee jy nie moed op nie, of hoe? Stel jou nou die vreugde voor wanneer jy uiteindelik jou droomhuis vind.

Net soos jy tyd daaraan sal bestee om ’n nuwe huis te soek, kan jy gerus die Bybel ondersoek om ’n oplossing vir jou probleme te vind. Net soos ons die feite teen mekaar moet opweeg wanneer ons besluite oor ’n huis neem, moet ons logies redeneer oor wat ons in God se Woord lees. En as ons die waarheid aangaande Jehovah God en Jesus Christus insien en aanvaar, is dit selfs voordeliger as om ’n huis te vind. Jesus het gesê: “Dit is die ewige lewe, dat hulle U ken, die enige waaragtige God, en Jesus Christus wat U gestuur het.”—Johannes 17:3.

Maar waarom bly soveel mense blind vir die Bybel se goeie nuus as die boodskap daarvan so belangrik is? Een rede wat baie mense miskien sal verbaas, is dat “die hele wêreld in die mag van die Bose lê” (1 Johannes 5:19). Satan die Duiwel het gevolglik ‘die ongelowiges se sinne verblind, sodat die verligting van die evangelie van die heerlikheid van Christus, wat die beeld van God is, op hulle nie sou skyn nie’ (2 Korinthiërs 4:4). Hoewel ons met ons oë sien, is dit die brein wat die lig interpreteer wat die oog binnegaan. Blindheid kan gevolglik ook beteken dat iemand “nie in staat of bereid is om onderskeidingsvermoë of oordeel aan die dag te lê nie”. Dit herinner ons aan ’n gewilde gesegde: “Niemand is so blind as wie nie wil sien nie.”

’n Blinde kan nie sien wat voor hom is nie, en hy kan dus gevaar loop om hom te beseer. Die letterlike blindheid van baie kan nie nou genees word nie, maar niemand hoef geestelik blind te bly nie.

Hoe om geestelike blindheid te oorkom

Net soos swak higiëniese toestande die gesigsvermoë kan laat versleg, kan ’n sedelose omgewing tot sedelike blindheid bydra. Daarbenewens het Jesus Christus teen mensgemaakte leerstellings en tradisies gewaarsku. Hy het dit duidelik gestel dat die destydse godsdiensleiers hulle kudde mislei het: “Hulle is blinde leiers van blindes. En as ’n blinde ’n ander blinde lei, sal altwee in die sloot val.”—Mattheüs 15:14.

Hoe gelukkig is diegene tog wat hulle oë vir die goeie nuus van God se Koninkryk open, pleks van deur blinde leiers mislei te word! Jesus het verklaar: “Tot ’n oordeel het Ek in hierdie wêreld gekom, sodat die wat nie sien nie, mag sien” (Johannes 9:39). Maar hoe kan mense wat geestelik blind is weer begin sien? Wel, laat ons ons bespreking van letterlike blindheid voortsit.

Verskeie hulpmiddels is nou beskikbaar vir mense met gesigsgebreke. Dit was nie altyd die geval nie. Voor Valentin Haüy in 1784 ’n spesiale skool vir blindes gestig het, is daar nie werklik ernstige pogings aangewend om blindes te help nie. Later het Louis Braille die stelsel ontwikkel wat sy naam dra; hy het dit gedoen om mense met gesigsgebreke te help lees.

Wat van geestelik blinde mense? In onlangse jare is ernstige pogings aangewend om die goeie nuus selfs in die mees afgeleë dele van die aarde te verkondig (Mattheüs 24:14). Dit verskaf Jehovah se Getuies genot om mense wat figuurlik sowel as letterlik blind is hoop te gee.

’n Brasiliaanse vrou het geskryf: “Ek wil net sê dat ek ten spyte van my fisiese gebrek kan sien—geestelik. Wat ’n wonderlike God! Dit verskaf ons vreugde om te weet dat ‘Jehovah sy hand sal oopmaak en alles wat lewe met welbehae sal versadig’” (Psalm 145:16). En Jorge, wat fisies blind is, sê: “My lewe kan in werklikheid in twee dele verdeel word: voor en ná die Getuies. . . . Met hulle hulp het ek die wêreld helder en duidelik begin sien. Ek geniet ’n uitstekende verhouding met almal in die gemeente.” Hoewel dit verblydend is, gee die Bybel ons die versekering dat daar binnekort geen blinde—letterlik of geestelik—op aarde sal wees nie. Hoe so? Hoe sal dit wêreldwyd gebeur dat ‘Jehovah die oë van die blindes open’?—Psalm 146:8.

Die enigste blywende oplossing—God se Koninkryk

Ten spyte van groter mediese kundigheid is daar steeds ’n magdom siektes wat blindheid, pyn en die dood veroorsaak. Wat is dan nodig om ’n einde te maak aan wanvoeding, swak higiëniese toestande en die ellende wat ’n mens jou gesigsvermoë sowel as lewensvreugde ontneem? Jesus se genesing van blindes en ander het op klein skaal getoon wat in die toekoms gaan gebeur. Sy onderrigtings- en genesingswerk het gelukkig seëninge voorafgeskadu wat onder God se Koninkryksregering oor die aarde gaan kom.

Genesing op ’n wêreldwye skaal is naby.a Hierdie Goddelike genesingsprogram word pragtig deur die apostel Johannes toegelig: “Hy het my getoon ’n suiwer rivier van die water van die lewe, helder soos kristal, wat uitstroom uit die troon van God en van die Lam. In die middel van sy straat en weerskante van die rivier was die boom van die lewe wat twaalf maal vrugte dra en elke maand sy vrugte gee, en die blare van die boom is tot genesing van die nasies.”—Openbaring 22:1, 2.

Uitdrukkings soos “water van die lewe” en “boom van die lewe” lig toe dat genesende voorsienings van God se Koninkryk die mensdom geleidelik tot volmaaktheid sal verhef nadat die hedendaagse bose stelsel geëindig het. Trouens, die voordele van Jesus se losprysofferande (met inbegrip van algehele vergifnis van sondes), asook kennis van Jesus Christus en sy Vader, sal volmaakte gesondheid en die ewige lewe teweegbring.—Johannes 3:16.

Geluk in God se nuwe wêreld

Stel jou dan die aarde sonder misdaad, besoedeling of armoede voor. Sien met jou geestesoog hoe jou gesin ’n vreedsame lewe in die herstelde Paradys geniet (Jesaja 32:17, 18). Wat ’n vreugde sal dit tog wees om die verskeidenheid van kleur met ’n volmaakte verstand en volmaakte sintuie waar te neem!

“Die natuurlike toestand vir die mens is om in ’n omgewing te woon wat gedurig verander—wat lig, kleur en vorms betref. Daar bestaan nie in die natuur iets soos ’n eentonige omgewing nie”, sê Faber Birren. “Kleur is een van die natuurlike dinge in hierdie wêreld wat ons plesier verskaf. Kleur is eerder die reël as die uitsondering in die natuur en dit dra baie tot ’n genotvolle lewe by.”

Hoe kosbaar is die gawe van sig tog! Watter vreugde sal daar tog wees wanneer oë wat voorheen blind was—letterlik of geestelik—sal sien!

Ja, in die komende herstelde Paradys sal blindheid en ander gebreke nie meer ongelukkigheid veroorsaak nie! Niemand sal meer mislei word nie. Aangesien ware liefde sal seëvier, sal almal geestelik verlig wees. Dít, en veel meer, lê voor die deur, maar dit is nou die tyd om die goedkeuring te verkry van die Een wat sy profetiese belofte sal vervul: ‘Dan sal die oë van die blindes geopen word’!—Jesaja 35:5.

[Voetnoot]

[Prent op bladsy 7]

Dan sal die oë van die blindes geopen word!