“Om nader aan God te kom”, is goed vir ons!

1-2. (a) Wat moet ons doen om ’n sterk vriendskap met iemand op te bou? (b) Wat sal ons in hierdie artikel bespreek?

HET jy ’n goeie vriend? Hoe het julle vriende geword? Jy het sekerlik tyd saam met hom spandeer, uitgevind wat sy uitdagings is en geleer waarvan hy hou en nie hou nie. Jy het ontdek dat hy pragtige eienskappe het wat jy graag wil navolg. Jy het lief geword vir jou vriend.

² Om ’n sterk vriendskap met iemand op te bou, vereis tyd en moeite. Dit is ook die geval wanneer ons ’n sterk, persoonlike verhouding met Jehovah God wil opbou. Hierdie artikel sal bespreek hoe ons nader aan ons God kan kom en watter voordele dit inhou. Kom ons kyk eerstens hoekom dit goed is om nader aan ons beste Vriend, Jehovah, te kom.

3. Hoekom moet ons nadink oor die voordele wat dit inhou om nader aan Jehovah te kom? Gee ’n voorbeeld.

³ Jy stem sekerlik saam dat dit goed is om nader aan Jehovah te kom. Maar deur na te dink oor presies hoe goed dit is, kan ons motiveer om aan te hou om nader aan hom te kom (Ps. 63:​6-8). Byvoorbeeld, ons weet dat dit vir ons goed is om ’n gebalanseerde dieet te volg, aan fisiese aktiwiteite deel te neem, genoeg rus te kry en genoeg water te drink. Tog skenk baie nie veel aandag aan hierdie dinge nie, en hulle skeep hulle gesondheid af. Maar hoe meer ons dink aan hoe ons baat vind by gesonde gewoontes, hoe groter is die kans dat ons daarmee sal volhou. Net so weet ons dalk dat dit vir ons goed is om nader aan Jehovah te kom, maar wanneer ons nadink oor die voordele daarvan, kan dit ons motiveer om aan te hou om nader aan ons Vriend te kom. – Ps. 119:​27-30.

4. Hoe het die psalmis gevoel volgens Psalm 73:28?

⁴ Lees Psalm 73:28. Die skrywer van Psalm 73 was ’n Leviet wat aangestel is om as ’n musikant by Jehovah se tempel te dien. Hy het Jehovah heel moontlik al ’n ruk lank getrou gedien. Maar hy het nog steeds gevoel dat dit nodig is om homself en ander daaraan te herinner dat dit goed is vir hom en hulle “om nader aan God te kom”. Wat is ’n paar van die voordele wat dit inhou?

“OM NADER AAN GOD TE KOM”, MAAK ONS GELUKKIG

5. (a) Hoekom maak dit ons gelukkig om nader aan Jehovah te kom? (b) Gebaseer op Spreuke 2:​6-16, gee spesifieke voorbeelde van hoe Jehovah se wysheid jou persoonlik kan help en beskerm.

⁵ Hoe nader ons aan Jehovah kom, hoe gelukkiger sal ons wees (Ps. 65:4). Daar is baie redes hoekom dit die geval is. Om maar een ding te noem, ons vind daarby baat wanneer ons die praktiese wysheid in sy Woord, die Bybel, toepas. Sulke wysheid beskerm ons teen slegte invloede en help ons om nie ernstige foute te maak nie. (Lees Spreuke 2:​6-16.) Dit is hoekom die Bybel sê: “Gelukkig is die mens wat wysheid vind en die mens wat insig verkry.” – Spr. 3:13.

6. Wat het veroorsaak dat die psalmis sy vreugde verloor?

⁶ Selfs Jehovah se vriende voel natuurlik soms hartseer. Die skrywer van Psalm 73 het sy vreugde verloor toe hy op ’n negatiewe manier begin dink het. Hy het ontsteld en jaloers geword omdat dit vir hom gelyk het asof slegte mense wat nie oor God of Sy standaarde omgee nie, ’n goeie lewe gehad het. Hy het verkeerdelik gedink dat gewelddadige en hoogmoedige mense altyd ryker en gesonder is en dat hulle glad nie ly nie (Ps. 73:​3-7, 12). Die psalmis was so ontsteld dat hy op een stadium gewonder het of dit die moeite werd is om Jehovah te dien. Hy was baie hartseer en het gesê: “Ek het seker verniet my hart suiwer gehou en my hande in onskuld gewas.” – Ps. 73:13.

7. Wat kan ons doen wanneer ons hartseer voel? (Sien ook prent.)

⁷ Al het die psalmis baie hartseer gevoel, het hy iets gedoen om sy denkwyse te verander. Hy het “in die groot heiligdom van God ingegaan”, waar Jehovah sy denkwyse reggestel het (Ps. 73:​17-19). Wanneer ons hartseer voel, weet Jehovah, ons beste Vriend, daarvan. As ons tot hom bid vir leiding en die hulp aanvaar wat hy deur middel van sy Woord en die gemeente voorsien, sal ons die innerlike krag kry om te volhard wanneer ons hartseer is. Selfs wanneer sorge ons oorweldig, sal Jehovah ons vertroos en kalmeer. – Ps. 94:19.a

“OM NADER AAN GOD TE KOM”, GEE ONS ’N DOEL EN ’N HOOP

8. Op watter ander belangrike maniere is dit goed vir ons om nader aan God te kom?

⁸ Om nader aan God te kom, is goed vir ons op twee ander belangrike maniere. Eerstens, dit gee ons ’n betekenisvolle doel in die lewe. Tweedens, dit gee ons ’n vaste hoop vir die toekoms (Jer. 29:11). Kom ons ondersoek nou hierdie voordele.

9. Hoe maak dit ons lewe betekenisvol wanneer ons nader aan Jehovah kom?

⁹ Om nader aan Jehovah te kom, gee ons lewe ’n doel. Vandag dink baie wat God se bestaan ontken, dat die lewe geen betekenis het nie en dat alle mense uiteindelik sal ophou bestaan. Maar uit ons studie van God se Woord het ons oortuig geword dat God “bestaan en dat hy die beloner word van dié wat hom ernstig soek” (Heb. 11:6). Ons is selfs vandag gelukkiger omdat ons doen wat ons ontwerp is om te doen – om ons hemelse Vader, Jehovah, te dien. – Deut. 10:​12, 13.

10. Wat sê Psalm 37:29 oor die toekoms van dié wat op Jehovah hoop?

¹⁰ Baie mense se hoop is beperk tot hierdie lewe – om werk toe te gaan, ’n gesin groot te maak en vir aftrede te spaar. God is nie in die prentjie nie. Aan die ander kant plaas Jehovah se knegte hulle hoop op hom (Ps. 25:​3-5; 1 Tim. 6:17). Ons vertrou ons God en Vriend, en ons vertrou wat hy ons belowe het. Ons toekoms sluit die vooruitsig in om hom vir ewig in die Paradys te aanbid. – Lees Psalm 37:29.

11. Hoe raak dit ons wanneer ons nader aan God kom, en hoe raak dit hom?

¹¹ Om nader aan God te kom, is goed vir ons op baie ander maniere. Byvoorbeeld, Jehovah belowe om die sondes te vergewe van berouvolle mense wat na aan hom is (Jes. 1:18). Daarom hoef ons nie die gewig te dra van ’n skuldige gewete as gevolg van sondes van die verlede nie (Ps. 32:​1-5). En dit maak ons bly wanneer ons Jehovah se hart bly maak (Spr. 23:15). Jy kan sekerlik aan ander seëninge dink wat ons kry as gevolg van ’n goeie vriendskap met God. Maar hoe kan jy aanhou om nader aan God te kom?

HOE OM AAN TE HOU “OM NADER AAN GOD TE KOM”

12. Wat het jy gedoen om nader aan God te kom?

¹² As jy ’n gedoopte Christen is, het jy alreeds tot ’n groot mate nader aan Jehovah gekom. Jy het baie waarhede oor Jehovah God en Christus Jesus geleer, oor jou sondes van die verlede berou getoon, sterk geloof in God beoefen en jou bes probeer om in ooreenstemming met sy wil op te tree. Maar om selfs nader aan God te kom, moet ons aanhou om hierdie dinge te doen. – Kol. 2:6.

13. Watter drie dinge kan ons help om aan te hou om nader aan Jehovah te kom?

¹³ Wat sal ons help om aan te hou om nader aan Jehovah te kom? (1) Ons moet aanhou om die Bybel te lees en te studeer. Terwyl ons dit doen, moet ons meer doen as om net die basiese feite oor God te leer. Ons moet probeer om God se denkwyse te verstaan en wat hy wil hê ons moet doen en lewe op die manier wat hy wil hê ons moet lewe (Ef. 5:​15-17). (2) Ons moet ons geloof versterk deur na te dink oor die baie bewyse van sy liefde vir ons. (3) Ons moet aanhou om die dinge te haat wat Jehovah haat en om vriendskappe te vermy met mense wat sulke dinge doen. – Ps. 1:1; 101:3.

14. Wat is ’n paar van die dinge wat ons in ons daaglikse lewe kan doen om Jehovah gelukkig te maak volgens 1 Korintiërs 10:31? (Sien ook prente.)

¹⁴ Lees 1 Korintiërs 10:31. Dit is baie belangrik vir ons om die dinge te doen wat ons weet Jehovah gelukkig sal maak. Dit behels meer as wat ons in die bediening en by gemeentelike vergaderinge doen. Goeie dade wat Jehovah gelukkig maak, sluit in wat ons in ons daaglikse lewe doen. Byvoorbeeld, wanneer ons eerlik is in alle dinge en met ander deel wat ons het, maak ons Jehovah gelukkig (2 Kor. 8:21; 9:7). Hy wil ook hê dat ons moet wys dat ons dankbaar is vir die lewe wat hy vir ons gegee het. Ons kom nader aan die Lewegewer deur gebalanseerd te bly in ons eet- en drinkgewoontes en deur op ander redelike maniere na ons gesondheid te kyk. Wanneer Jehovah sien dat ons probeer om hom gelukkig te maak in alles wat ons doen, word hy selfs liewer vir ons. – Luk. 16:10.

15. Hoe verwag Jehovah moet ons ander behandel?

¹⁵ Jehovah is liefdevol teenoor die regverdiges en die onregverdiges (Matt. 5:45). Hy verwag dat ons ook liefdevol teenoor ander moet wees. Byvoorbeeld, ons moet ‘niks slegs van enigiemand sê nie, nie stryerig wees nie en sagmoedigheid openbaar teenoor alle mense’ (Tit. 3:2). Met dit in gedagte sien ons nie neer op ander net omdat hulle nie dieselfde oortuigings as ons het nie (2 Tim. 2:​23-25). Ons kom nader aan Jehovah deur altyd liefdevol en bedagsaam teenoor almal te wees.

ONS KAN “NADER AAN GOD” KOM SELFS WANNEER ONS STRUIKEL

16. Hoe het die skrywer van Psalm 73 later begin voel?

¹⁶ Maar wat as jy later begin voel dat jy nie Jehovah se liefde verdien nie? Soos ons vroeër bespreek het, het iets soortgelyks met die skrywer van Psalm 73 gebeur. Hy het gesê: “My voete het amper afgedwaal. My voete het amper gegly” (Ps. 73:2). Hy het erken dat hy “soos ’n verstandelose dier” “verbitterd” en “onverstandig” voor Jehovah geword het (Ps. 73:​21, 22). Het hy tot die gevolgtrekking gekom dat hy ’n verlore saak is en nie Jehovah se liefde verdien nie as gevolg van sy fout?

17. (a) Wat het die psalmis gedoen selfs toe hy baie mismoedig was? (b) Watter les kan ons uit sy ondervinding leer? (Sien ook prente.)

¹⁷ As die psalmis gevoel het dat Jehovah hom verwerp het, het hy seker nie lank so gevoel nie. Selfs toe hy regtig sleg gevoel het, het hy geweet dat hy nader aan God moet kom, soos ons kan sien aan sy woorde: “Maar nou is ek heeltyd by u [Jehovah]. U het my regterhand gevat. U lei my met u raad, en daarna sal u my tot heerlikheid lei” (Ps. 73:​23, 24). Ons moet ook op Jehovah vertrou as ’n stabiliserende rots wanneer ons swak of mismoedig voel (Ps. 73:26; 94:18). Selfs as ons voete net tydelik afdwaal, kan ons terugkeer na Jehovah met die versekering dat hy ‘vryelik vergewe’ (Ps. 86:5). Wanneer ons baie mismoedig voel, is dit baie belangrik om nader aan ons God te kom. – Ps. 103:​13, 14.

KOM VIR EWIG “NADER AAN GOD”

18. Hoekom kan ons vir ewig nader aan Jehovah kom?

¹⁸ Ons kan vir ewig nader aan Jehovah kom, en ons sal nooit ophou oor hom leer nie. Die Bybel sê dat ons nooit Jehovah se dade, sy wysheid en sy kennis “ten volle [kan] begryp nie”. – Rom. 11:33.

19. Watter versekering gee Psalms ons?

¹⁹ Psalm 79:13 sê: “Ons, u volk en die skape van u weiding, [sal] u vir ewig bedank, en ons sal u lof van geslag tot geslag bekend maak.” Terwyl jy aanhou om nader aan God te kom, kan jy ook daarvan seker wees dat jy ewige seëninge sal ontvang en met vertroue sê: “God is vir ewig die rots van my hart en my deel.” – Ps. 73:26.