Jong broers – Volg Markus en Timoteus na

1-2. Watter uitdagings kon gekeer het dat Markus en Timoteus ander in ’n groter mate dien?

JONG broers, wil julle meer in Jehovah se diens doen en dié in julle gemeente meer help? Julle wil dit sekerlik doen. Ons is baie bly om so baie jong mans te sien wat gewillig is om ander te dien! (Ps. 110:3). Maar jy ondervind dalk uitdagings. Huiwer jy om meer in jou bediening te doen as gevolg van vrees vir die onbekende? Het jy al ooit nie ’n toewysing aanvaar nie omdat jy te min selfvertroue gehad het? As dit die geval is, is jy nie die eerste persoon wat so voel nie.

² Markus en Timoteus het soortgelyke uitdagings ondervind. Maar hulle het nie toegelaat dat vrees vir die onbekende of hulle gebrek aan ondervinding hulle keer om ander te dien nie. Markus het moontlik saam met sy ma in ’n gemaklike huis gebly toe hy genooi is om saam met die apostel Paulus en Barnabas op hulle eerste sendingreis te gaan (Hand. 12:​12, 13, 25). Markus het daardie bekende omgewing verlaat om meer in sy bediening te doen. Eers het hy na Antiogië getrek. Toe het hy saam met Paulus en Barnabas na ander verafgeleë plekke gegaan (Hand. 13:​1-5). Net so het Timoteus moontlik saam met sy ouers gebly toe hy deur Paulus genooi is om saam met hom te preek. Omdat Timoteus jonk en onervare was, kon hy toegelaat het dat ’n gebrek aan selfvertroue hom terughou. (Vergelyk 1 Korintiërs 16:​10, 11 en 1 Timoteus 4:12.) Maar hy het Paulus se uitnodiging aanvaar en as gevolg daarvan baie seëninge geniet. – Hand. 16:​3-5.

3. (a) Hoe baie het Paulus Markus en Timoteus waardeer? (2 Timoteus 4:​6, 9, 11) (Sien ook prente.) (b) Watter vrae sal ons in hierdie artikel bespreek?

³ Markus en Timoteus het kosbare ondervinding opgedoen en geleer hoe om na belangrike verantwoordelikhede om te sien terwyl hulle jonk was. Paulus het hierdie jong mans so baie waardeer dat hy hulle later aan sy sy wou hê toe hy besef het dat hy binnekort sou sterf. (Lees 2 Timoteus 4:​6, 9, 11.) Watter goeie eienskappe het Markus en Timoteus gehad wat gemaak het dat Paulus hulle liefhet en vertrou? Hoe kan jong broers hulle gesindheid navolg? En hoe kan jong mans by Paulus se vaderlike raad baat vind?

VOLG MARKUS NA – WEES GEWILLIG OM TE DIEN

4-5. Hoe het Markus gewys dat hy gewillig is om ander te dien?

⁴ Om ander te dien, kan beteken dat ’n persoon hard werk om hulle te help en hulle te bly help selfs wanneer dit moeilik is om dit te doen. Markus het ’n goeie voorbeeld in hierdie opsig gestel. Toe Paulus geweier het om hom op ’n tweede sendingreis saam te neem, het Markus moontlik seergemaak en teleurgesteld gevoel (Hand. 15:​37, 38). Maar dit het nie gekeer dat Markus sy broers en susters dien nie.

⁵ Markus het saam met sy neef Barnabas gegaan om in ’n ander gebied te dien. Omtrent 11 jaar later was Markus onder dié wat Paulus ondersteun het gedurende sy eerste gevangenskap in Rome (Filem. 23, 24). Om die waarheid te sê, Paulus het sy ondersteuning so baie waardeer dat hy Markus beskryf het as “’n bron van groot vertroosting”. – Kol. 4:​10, 11.

6. Hoe het Markus baat gevind by sy assosiasie met volwasse Christene? (Sien voetnoot.)

⁶ Markus het baat gevind by sy gereelde assosiasie met volwasse Christene. Nadat Markus ’n ruk lank saam met Paulus in Rome was, het hy by die apostel Petrus in Babilon aangesluit. Hulle het sulke goeie vriende geword dat Petrus hom “Markus, my seun” genoem het (1 Pet. 5:13). Terwyl hulle saamgewerk het, het Petrus moontlik sy jong vriend baie interessante besonderhede oor Jesus se lewe en bediening vertel wat Markus later in sy Evangelieverslag opgeteken het.a

7. Hoe het ’n jong broer met die naam Seoeng-Woo Markus se voorbeeld nagevolg? (Sien ook prent.)

⁷ Markus het besig gebly in sy diens en het na aan volwasse broers gebly. Hoe kan jy Markus navolg? As jy al ooit nie vir ’n diensvoorreg gekwalifiseer het nie, moet jy geduldig wees met jouself en aanhou soek na ander maniere om Jehovah en die gemeente te dien. Dit is wat gebeur het met Seoeng-Woo, wat nou as ’n ouerman dien. Toe hy jonger was, het hy homself met ander jong broers vergelyk. Party van hulle het voor hom voorregte ontvang. Seoeng-Woo het gevoel dat hy nie raakgesien word nie en het uiteindelik vir die ouermanne gesê hoe hy voel. Een ouerman het voorgestel dat hy doen wat hy kan om ander te dien, al beteken dit dat sy goeie dade soms nie raakgesien word nie. Daardie raad het Seoeng-Woo beweeg om homself beskikbaar te maak om die bejaardes te help, sowel as dié wat vervoer na die vergaderinge nodig gehad het. Wanneer hy oor daardie tyd dink, sê hy: “Ek het begin verstaan wat dit beteken om ander in ’n groter mate te dien. Dit het my baie bly gemaak omdat ek ander op praktiese maniere gehelp het.”

VOLG TIMOTEUS NA – WYS DAT JY REGTIG VIR ANDER OMGEE

8. Hoekom het Paulus Timoteus gekies om saam met hom te reis? (Filippense 2:​19-22)

⁸ Paulus het moedige broers nodig gehad om saam met hom te reis wanneer hy na die stede teruggegaan het waar hy teëgestaan is. Hy het eers ’n ervare Christen met die naam Silas gekies om saam met hom te gaan (Hand. 15:​22, 40). Paulus het later ook vir Timoteus gekies om by hom aan te sluit. Wat het uitgestaan omtrent Timoteus? Om maar een ding te noem, hy het ’n goeie reputasie gehad (Hand. 16:​1, 2). Hy het ook opreg vir mense omgegee. – Lees Filippense 2:​19-22.

9. Hoe het Timoteus gewys dat hy regtig vir sy broers en susters omgegee het?

⁹ Van die begin van sy bediening af saam met Paulus het Timoteus gewys dat hy meer vir ander omgee as vir homself. Daarom kon Paulus hom met vertroue in Berea agterlaat om die nuwe dissipels daar aan te moedig (Hand. 17:​13, 14). By daardie geleentheid het Timoteus sekerlik baat gevind by die voorbeeld van Silas, wat ook in Berea agtergebly het. Maar later het Paulus Timoteus op sy eie na Tessalonika gestuur om die Christene in daardie stad te versterk (1 Tess. 3:​2, vtn.). Oor die volgende 15 jaar of wat het Timoteus geleer om te “huil saam met mense wat [gehuil het]”, hy het gewys dat hy empatie het vir enige een wat gely het (Rom. 12:15; 2 Tim. 1:4). Hoe kan jong Christenmans Timoteus navolg?

10. Hoe het ’n broer met die naam Woo Djae geleer om meer persoonlike belangstelling in ander te toon?

¹⁰ ’n Broer met die naam Woo Djae het geleer om meer persoonlike belangstelling in ander te toon. Toe hy ’n jong volwassene was, het Woo Djae gesukkel om met ouer broers en susters te gesels. Daarom het hy hulle by die Koninkryksaal net gegroet en weggestap. ’n Ouerman het voorgestel dat Woo Djae gesprekke begin deur vir sy medegelowiges te sê wat hy omtrent hulle waardeer. Die ouerman het hom ook aangemoedig om te dink aan waarin die ander persoon dalk belangstel. Woo Djae het gedoen wat die ouerman gesê het. Nou is Woo Djae ’n ouerman. Hy sê: “Ek vind dit nou makliker om betekenisvolle gesprekke te hê met mense van verskillende ouderdomme. Ek voel goed omdat ek weet dat ek ander mense se bekommernisse beter verstaan. Dit help my om te weet wat my broers en susters regtig nodig het en wat ek kan doen om hulle te help.”

11. Hoe kan jong broers persoonlike belangstelling ontwikkel in ander wat in hulle gemeente is? (Sien ook prent.)

¹¹ Net so kan julle jong broers leer om persoonlike belangstelling in ander te toon. Wanneer jy by die vergaderinge is, moet jy wys dat jy belangstel in individue van verskillende ouderdomme en agtergronde. Vra hulle hoe dit met hulle gaan en luister dan. Met verloop van tyd besef jy dalk hoe jy hulle kan help. Dalk sal jy uitvind dat ’n ouer paartjie hulp nodig het om die JW Library^®-app te gebruik. Of jy vind dalk uit dat hulle nie reëlings het om met enige iemand in die bediening te werk nie. Kan jy sulkes help met hulle elektroniese toestelle of reël om saam met hulle aan die predikingswerk deel te neem? Wanneer jy die inisiatief neem om ander te help, sal jy ’n goeie voorbeeld vir almal stel.

VIND BAAT BY PAULUS SE VADERLIKE RAAD

12. Hoe kan jong mans baat vind by Paulus se raad aan Timoteus?

¹² Paulus het Timoteus praktiese raad gegee om hom te help om ’n sukses van sy lewe en bediening te maak (1 Tim. 1:18; 2 Tim. 4:5). Julle jong broers kan ook baat vind by Paulus se vaderlike raad. Hoe? Lees Paulus se twee briewe aan Timoteus asof dit aan jou geskryf is, en kyk watter raad jy in jou lewe kan toepas. Kyk na ’n paar voorbeelde.

13. Wat sal jou help om lojaler aan Jehovah te wees?

¹³ “Werk . . . hard met toegewydheid aan God as jou doelwit” (1 Tim. 4:7b). Wat is toegewydheid aan God? Dit is wanneer ’n persoon lojaal is aan Jehovah en dinge doen wat hom gelukkig maak. Aangesien ons nie gebore word met hierdie eienskap nie, moet ons dit ontwikkel. Hoe? Toe Paulus gesê het: “Werk . . . hard”, het hy ’n woord gebruik wat die gedagte oordra van ’n atleet wat baie hard moes oefen om gereed te wees vir ’n kompetisie. Hierdie atlete het selfdissipline nodig gehad. Ons het ook selfdissipline nodig om gewoontes te ontwikkel wat ons nader aan Jehovah sal laat kom.

14. Wat moet ons doelwit wees wanneer ons die Bybel lees? Gee ’n voorbeeld.

¹⁴ Terwyl jy die gewoonte ontwikkel om die Bybel te lees, moet jy jou doelwit om nader aan Jehovah te kom in gedagte hou. Byvoorbeeld, wat kan jy leer uit die verslag van Jesus en die ryk jong heerser? (Mark. 10:​17-22). Die jong man het geglo dat Jesus die Messias is, maar het nie genoeg geloof gehad om hom te volg nie. Al was dit die geval, het Jesus “liefde vir hom gevoel”. Raak die manier hoe Jesus met hierdie jong man gepraat het nie jou hart nie? Dit is duidelik dat Jesus wou hê dat hy ’n wyse besluit moet maak. Jesus het ook Jehovah se liefde vir die jong man weerspieël (Joh. 14:9). Terwyl jy oor hierdie verslag en jou omstandighede dink, vra jou af: ‘Wat moet ek doen om nader aan Jehovah te kom en om ander in ’n groter mate te dien?’

15. Hoekom moet ’n jong broer aandag skenk aan die voorbeeld wat hy stel? Gee ’n voorbeeld. (1 Timoteus 4:​12, 13)

¹⁵ “Word . . . ’n voorbeeld vir die getroues.” (Lees 1 Timoteus 4:​12, 13.) Paulus het Timoteus aangemoedig om te leer hoe om goed te lees en ’n goeie onderrigter te wees, maar Paulus wou ook hê dat hy goeie eienskappe moet ontwikkel soos liefde, geloof en sedelike reinheid. Hoekom? ’n Goeie voorbeeld tel meer as woorde. Sê nou jy word gevra om ’n toespraak te gee oor hoe om ons ywer in die bediening te vergroot. Jy sal meer selfvertroue hê om oor hierdie onderwerp te praat as jy jou bes in die bediening doen. Jou voorbeeld sal jou woorde kragtiger maak. – 1 Tim. 3:13.

16. (a) Op watter vyf gebiede kan ’n jong Christen as ’n voorbeeld dien? (b) Hoe kan ’n jong broer ’n voorbeeld word “in woord”?

¹⁶ In 1 Timoteus 4:12 noem Paulus vyf gebiede waarop ’n jong broer as ’n voorbeeld kan dien. Hoekom maak jy dit nie ’n persoonlike studieprojek om na te dink oor elkeen van daardie gebiede nie? Byvoorbeeld, sê nou jy wil ’n beter voorbeeld wees “in woord”. Dink aan die maniere hoe jy jou spraak kan gebruik om ander op te bou. As jy nog steeds by die huis saam met jou ouers bly, kan jy gereelder vir hulle dankie sê vir wat hulle vir jou doen? Kan jy ná die vergaderinge vir iemand wat ’n deel op die program gehad het, sê wat jy omtrent sy aanbieding waardeer het? Jy probeer dalk ook om antwoorde in jou eie woorde by die vergaderinge te gee. Wanneer jy hard werk om ’n voorbeeld te wees in jou spraak sal jy wys dat jy geestelike vordering maak. – 1 Tim. 4:15.

17. Wat sal ’n jong broer help om sy geestelike doelwitte te bereik? (2 Timoteus 2:22)

¹⁷ “Vlug . . . vir die begeertes van die jeug, maar streef na regverdigheid.” (Lees 2 Timoteus 2:22.) Paulus het Timoteus aangemoedig om te stry teen begeertes wat sy aandag van sy geestelike doelwitte kon aftrek en sy verhouding met Jehovah kon beskadig. Jy besef dalk ook dat sekere aktiwiteite, al is dit op sigself nie verkeerd nie, jou dalk met min tyd laat vir geestelike dinge. Byvoorbeeld, dink aan hoeveel tyd jy daaraan spandeer om aan sport deel te neem, op die internet te wees of videospeletjies te speel. Kan jy van daardie tyd gebruik vir teokratiese aktiwiteite? Dalk kan jy help met die instandhouding van jou Koninkryksaal of trollie-getuieniswerk doen. As jy aan sulke aktiwiteite deelneem, sal jy moontlik nuwe vriende maak wat jou sal help om geestelike doelwitte te stel en te bereik.

OM ANDER TE DIEN, BRING SEËNINGE

18. Hoekom kan ons sê dat Markus en Timoteus vol en bevredigende lewens gelei het?

¹⁸ Markus en Timoteus het opofferinge gemaak om ander in ’n groter mate te dien, en hulle het vol en bevredigende lewens gelei (Hand. 20:35). Markus het na verskillende dele van die wêreld gereis om sy medegelowiges te dien. Hy het ook ’n opwindende verslag van Jesus se lewe en bediening geskryf. Timoteus het Paulus gehelp om gemeentes te vorm en om die broers en susters op te bou. Dit is duidelik dat die selfopofferende gees wat Markus en Timoteus geopenbaar het, Jehovah gelukkig gemaak het.

19. Hoekom moet jong broers Paulus se raad aan Timoteus toepas, en wat sal die resultaat wees?

¹⁹ Paulus se liefde vir Timoteus kan duidelik gesien word in die briewe wat hy aan sy jong vriend geskryf het. Hierdie geïnspireerde briewe openbaar ook dat Jehovah julle jong mans baie liefhet. Hy wil hê dat julle suksesvol moet wees. So doen jou bes om Paulus se raad toe te pas, en ontwikkel jou begeerte om ander in ’n groter mate te dien. As jy dit doen, sal jy nou ’n wonderlike lewe geniet en sal jy “’n stewige houvas [kry] op die werklike lewe” wat kom. – 1 Tim. 6:​18, 19.