Twee nuwe lede van die Bestuursliggaam

OP 5 Oktober 2024 is ’n spesiale aankondiging by die jaarvergadering gemaak: Broer Jody Jedele en Jacob Rumph is aangestel as lede van die Bestuursliggaam van Jehovah se Getuies. Albei broers dien Jehovah al jare lank getrou.

Broer Jedele is in Missouri, VSA, gebore en is in die waarheid grootgemaak. Sy gesin het naby ’n gebied gebly waarin daar selde gewerk is. Daarom het hy baie broers van verskillende agtergronde ontmoet wat gekom het om te help om die goeie nuus te verkondig. Hulle liefde en eenheid het ’n groot indruk op hom gemaak. Hy is in sy vroeë tienerjare gedoop, op 15 Oktober 1983. Hy het die bediening geniet, en ná hoërskool het hy in September 1989 as ’n gewone pionier begin dien.

Toe broer Jedele jonk was, het sy ouers hom en sy suster geneem om Bethel te besoek. Hierdie besoeke het die kinders gemotiveer om Betheldiens as ’n doelwit te stel – ’n doelwit wat hulle albei bereik het. Broer Jedele het in September 1990 by die Bethel in Wallkill aangekom. Hy het eers in die Skoonmaakafdeling gewerk en later in Mediese Dienste.

Om en by daardie tyd was naburige Spaanse gemeentes besig om te groei en het hulle broers nodig gehad. So broer Jedele het by een van die gemeentes aangesluit en Spaans begin leer. Kort daarna het hy Damaris ontmoet, ’n suster wat in dieselfde kring gepionier het. Hulle het later getrou, en sy het by hom in Bethel aangesluit.

In 2005 het hulle Bethel verlaat om vir hulle getroue ouers te sorg. Gedurende daardie tyd het hulle as gewone pioniers gedien. Broer Jedele was ’n instrukteur by die Pionierdiensskool, en hy het op die plaaslike Hospitaalskakelkomitee en Streekboukomitee gedien.

In 2013 is broer en suster Jedele teruggenooi na Bethel vir die Warwick-bouprojek. Sedert daardie tyd het hulle ook by Patterson en Wallkill gedien. Broer Jedele het gewerk in die Plaaslike Kantoor vir Ontwerp en Konstruksie en in Hospitaalinligtingsdienste. In Maart 2023 is hy aangestel as ’n helper van die Dienskomitee. Wanneer hy aan al sy aanwysings dink, sê hy: “Wanneer jy nuwe aanwysings ontvang, kan jy soms oorweldig voel. Maar dit is wanneer jy moet onthou om op Jehovah te vertrou omdat hy die een is wat ons in staat stel om te doen wat ook al hy van ons vra.”

Broer Rumph is in Kalifornië, VSA, gebore. Gedurende sy kinderjare was sy ma onbedrywig, maar sy het probeer om hom Bybelwaarhede te leer. Hy het ook elke jaar vir sy ouma gaan kuier, ’n getroue Getuie. Sy het gehelp om sy belangstelling in die waarheid aan te wakker, en hy het op die ouderdom van 13 vir ’n Bybelstudie gevra. Op 2 7 September 1992, terwyl hy in sy tienerjare was, is hy gedoop. Ons is bly dat sy ma weer bedrywig geword het en dat al sy onmiddellike familie vordering begin maak het en gedoop is.

Toe hy jonk was, het broer Rumph gesien hoe gelukkig die pioniers is. So nadat hy hoërskool klaargemaak het, het hy in September 1995 begin pionier. In 2000 het hy na Ecuador getrek om te dien waar daar meer verkondigers nodig was. Daar het hy Inga ontmoet, ’n pioniersuster van Kanada, en hulle het later getrou. Hulle het hulle getroude lewe in ’n dorp in Ecuador begin wat ’n klein groep verkondigers gehad het. Vandag is daar ’n sterk gemeente.

Met verloop van tyd is broer en suster Rumph as spesiale pioniers aangestel en is hulle later gevra om op die kring te dien. In 2011 is hulle genooi na die 132ste klas van Gilead. Nadat hulle gegradueer het, het hulle in verskeie plekke regoor die wêreld gedien en verskillende vorme van diens geniet, soos Betheldiens, sendingwerk en kringwerk. Broer Rumph het ook die voorreg gehad om ’n instrukteur te wees vir die Skool vir Koninkrykspredikers.

As gevolg van die COVID-19-pandemie het broer en suster Rumph na die Verenigde State teruggekeer. Hulle is na die Bethel in Wallkill genooi, waar broer Rumph opleiding ontvang het in die Diensafdeling. Hulle is uiteindelik teruggestuur na die takkantoor in Ecuador, waar broer Rumph op die Takkomitee gedien het. In 2023 is hulle na Warwick toe gestuur. In Januarie 2024 is broer Rumph aangestel om as ’n helper van die Dienskomitee te dien. Wanneer hy dink aan waar hy gedien het, sê hy: “Wat ’n aanwysing spesiaal maak, is nooit die plek nie maar die mense met wie jy dien.”

Ons waardeer die harde werk van hierdie broers, en ons “respekteer en waardeer sulke manne”. – Fil. 2:29.