My man kon nie ophou lees nie!

IN 1989 het ek en my man die Getuies by ons bure se huis ontmoet. Broer Giwi Barnadze, wat die Bybel met ons buurman gestudeer het, het nie ’n Bybel gehad nie omdat dit destyds moeilik was om Bybels in Georgië in die hande te kry.

Ons het gehou van wat ons gehoor het en wou graag ons eie Bybel hê. Toe my man sy vleeslike broer gesien het, het hy vir hom gesê dat hy op soek is na ’n Bybel. Hy was verbaas toe sy broer vir hom sê dat hy onlangs ’n nuwe weergawe van die Bybel in Georgies gekoop het en dat hy hierdie Bybel graag vir hom as ’n geskenk wil gee.

Toe Badri by die huis kom, het hy by die tafel gaan sit en tot die aand toe Bybel gelees. Die volgende dag het hy opgestaan en verder gelees. Toe ek ná werk by die huis kom, het hy nog steeds by die tafel gesit en Bybel lees. Hy kon nie ophou lees nie! Ek het toe voorgestel dat hy ’n paar dae verlof neem om klaar te lees. Kort voor lank het hy die hele Bybel deurgelees.

Toe ons later die boek Die waarheid wat lei tot die ewige lewe saam met broer Barnadze begin studeer het, was ons baie bly dat ons ’n Bybel gehad het. Dit het goed uitgewerk, want ons het nie ’n Waarheid-boek gehad nie, en ons onderrigter het nie ’n Bybel gehad nie! Omtrent ’n jaar later is ek en Badri gedoop.