Word die vaevuur in die Bybel genoem?

Die Bybel se antwoord

Nee, dit word nie genoem nie. Die Bybel bevat nie die woord “vaevuur” nie. Dit leer ook nie dat die siele van dié wat gesterf het, in die vaevuur gereinig word nie.a Kyk na wat die Bybel oor sonde en die dood leer en hoe dit die leerstelling van die vaevuur weerspreek.

• Geloof in die bloed van Jesus reinig ’n persoon van sonde, nie ’n sogenaamde vaevuur nie. Die Bybel sê: “Die bloed van Jesus, [God se] Seun, reinig ons van alle sonde”. Dit sê ook dat “Jesus Christus . . . ons deur middel van sy eie bloed van ons sondes losgemaak het” (1 Johannes 1:7; Openbaring 1:5). Jesus het “sy lewe [gegee] as ’n losprys vir baie” om vir hulle sondes te betaal.—Matteus 20:28, Ou Afrikaanse Bybelvertaling.

• Mense wat gesterf het, is in ’n toestand van onbewustheid. “Die lewendes weet dat hulle moet sterwe, maar die dooies weet glad niks nie” (Prediker 9:5, OAB). ’n Mens wat gesterf het, kan niks voel nie, en daarom kan hy nie in ’n vaevuur gereinig word nie.

• Daar is nie straf vir sondes nadat ’n persoon gesterf het nie. Die Bybel sê: “Die loon wat die sonde gee, is die dood” en “iemand wat gesterf het, is . . . vry van die mag van die sonde” (Romeine 6:7, 23, Nuwe Afrikaanse Bybelvertaling). Die enigste straf vir die sonde is die dood.