’n Bybelstudiehulp wat baie anders is

In Januarie 2021 het die Bestuursliggaam die vrystelling van ’n nuwe Bybelstudiehulp, Geniet die lewe vir ewig!, aangekondig.a Hoe het die aankondiging jou laat voel? Matthew, van Kanada, sê: “Ek was opgewonde! En ek het al hoe meer opgewonde geraak gedurende die toesprake en video’s wat verduidelik het hoekom die publikasie geskryf is en hoe dit getoets was. Ek kon nie wag om dit te sien nie en om dit te begin gebruik nie.”

Ons kan nou Bybelstudies op ’n nuwe manier hou met behulp van Geniet die lewe vir ewig! Maar dit is nie die enigste verskil tussen die nuwe boek en vorige Bybelstudiehulpe nie. As jy ’n gedrukte kopie van Geniet die lewe vir ewig! gebruik, het jy dalk opgelet dat dit ook anders voel. Om te sien hoekom dit so is, kom ons vind uit hoe die boek gemaak is.

’n Nuwe boek wat anders voel

Dikker papier. Hoekom was dit nodig? Geniet die lewe vir ewig! het meer as 600 kleurvolle prente, amper tien keer meer as die Leer ons-boek! Die nuwe boek het ook meer wit spasie – dele sonder teks of prente – op die bladsye. Hierdie twee dinge het ’n probleem veroorsaak: Wanneer die papier dun is, slaan die prente deur op die volgende bladsy. Om te keer dat dit gebeur, het broers in die Internasionale Drukkery-afdeling (IPD) in Wallkill, New York, VSA, vier soorte papier getoets wat ons op die oomblik in ons drukkerye gebruik. Die Skryfkomitee van die Bestuursliggaam het na elke soort papier gekyk en die papier gekies wat die minste deurskynend is. Hierdie papier kos omtrent 16 persent meer as die papier wat ons vir die meeste van ons ander publikasies gebruik. Maar dit help Bybelstudente om elke bladsy van Geniet die lewe vir ewig! te lees sonder dat hulle aandag afgelei word deur die prente op die ander kant van die bladsy.

’n Buiteblad wat anders is. Die buiteblad van die nuwe boek voel anders as die buiteblad van ons ander boeke omdat dit bedek is met ’n ander soort beskermende lagie. In plaas van die normale blink lagie het die nuwe boek ’n dowwe afwerking, wat die prent op die voorblad meer laat uitstaan. Hierdie afwerking help ook om die boek te beskerm sodat dit langer sal hou wanneer dit baie gebruik word. Maar die dowwe afwerking kan tot vyf keer meer kos as die blink afwerking. Daarom het ’n hele paar takkantore saamgewerk om ’n goedkoper opsie van die dowwe afwerking te kry.

Hoekom is hierdie duurder opsies gekies? ’n Broer wat saam met IPD werk, verduidelik: “Ons verwag dat die boek netjies moet lyk selfs al gebruik ’n persoon dit baie.” Eduardo, wat in die Drukkery-kantoor by die takkantoor in Brasilië werk, sê: “Ons is baie bly om te sien hoe Jehovah se organisasie materiaal van goeie gehalte gekies het om hierdie pragtige en sterk boek te maak wat lekker is om te gebruik. Hulle het ook die bydraes op die beste manier gebruik.”

Drukwerk gedurende die COVID-19-pandemie

Ons het Geniet die lewe vir ewig! in Maart 2021 begin druk. Omdat dit gedurende die COVID-19-pandemie plaasgevind het, het dit uitdagings veroorsaak. As gevolg van die inperking by Bethelhuise kon ons nie gebruik maak van pendelaars by ons drukkerye nie en ook nie broers nooi om as Betheliete te dien nie. Party drukkerye het toe nie genoeg werkers gehad nie, en die werk by ander drukkerye moes tydelik gestop word as gevolg van beperkings deur regerings.

Hoe het ons hierdie uitdagings oorkom? Toe daar weer werk by die drukkerye gedoen kon word, is broers en susters van ander Bethelafdelings tydelik toegewys om met die drukwerk te help. Joel, wat saam met IPD werk, sê: “Omdat hulle ’n selfopofferende gees het en bereid was om te leer om ’n nuwe toewysing te doen, was dit vir ons moontlik om die nodige werk te doen.”

Ten spyte van die uitdagings het ons alreeds miljoene kopieë van Geniet die lewe vir ewig! gedruk. Om dit te druk, het ons ’n groot verskeidenheid materiale nodig, insluitende drukplate, materiaal wat nodig is vir die beskermende lagie, papier, ink en gom. In die eerste vyf maande van drukwerk is meer as R34 400 000 net aan materiale spandeer. Om geld te spaar, het ons probeer om net die aantal boeke te druk wat gemeentes regtig nodig het.

“Dit is ’n ongelooflike skat”

Hoe voel Bybelonderrigters en hulle studente oor hierdie nuwe Bybelstudiehulp? Paul, ’n broer in Australië, sê: “Dit is so lekker om Geniet die lewe vir ewig! te gebruik dat ek sommer opgewonde raak om Bybelstudies te hou. Die boek se uitleg is baie aantreklik en regtig interaktief. Dit is ’n uitstekende kombinasie van duidelike inligting, vrae wat die hart raak, video’s, prente, tabelle, kaarte en doelwitte vir die student. Dit is ’n ongelooflike skat wat my motiveer om my onderrigting te verbeter.”

’n Bybelstudent in die Verenigde State sê: “Ek hou regtig van die nuwe boek. Die prente help my om die hoofgedagtes te verstaan. Die video’s raak my hart en motiveer my om toe te pas wat ek leer.” Hierdie student studeer die Bybel twee keer ’n week en woon die vergaderinge gereeld by.

Miljoene kopieë van Geniet die lewe vir ewig! moet nog in baie tale gedruk word. Om die waarheid te sê, tot nou toe het die Bestuursliggaam goedkeuring gegee dat hierdie boek in 710 tale gedruk word. Dit is 340 meer tale as wat goedgekeur was vir die Leer ons-boek!

Hoe betaal ons vir hierdie drukwerk? Deur donasies aan die wêreldwye werk, waarvan baie deur middel van donate.jw.org gemaak word. Ons waardeer julle vrygewige gesindheid, wat ons help om Bybelstudiehulpe te maak vir diegene wat oor Jehovah wil leer en die lewe vir ewig wil geniet. – Psalm 22:26.