Bedienaars van die goeie nuus

JEHOVAH het vir ons ’n volmaakte voorbeeld gegee om na te volg – sy Seun, Jesus Christus (1 Pet. 2:21). Wanneer iemand ’n volgeling van Jesus word, verkondig hy die goeie nuus as een van God se bedienaars. Jesus het gewys dat ons geestelik nuwe krag sou kry toe hy gesê het: “Kom na my toe, almal wat uitgeput is en ’n swaar las dra, en ek sal julle nuwe krag gee. Neem my juk op julle en leer by my, want ek is saggeaard en nederig van hart, en julle sal nuwe krag kry” (Matt. 11:28, 29). Elkeen wat hierdie uitnodiging aanvaar het, het gesien dat hierdie belofte waar is!

² As God se Vernaamste Bedienaar het Jesus sekere persone geroep om sy volgelinge te word (Matt. 9:9; Joh. 1:43). Hy het hulle in die bediening opgelei en hulle uitgestuur om dieselfde werk te doen wat hy gedoen het (Matt. 10:1–11:1; 20:28; Luk. 4:43). Later het hy nog 70 uitgestuur om die goeie nuus oor God se Koninkryk bekend te maak (Luk. 10:1, 8-11). Toe Jesus hierdie dissipels uitgestuur het, het hy vir hulle gesê: “Wie na julle luister, luister ook na my. En wie julle verwerp, verwerp my ook. Wat meer is, wie my verwerp, verwerp ook die Een wat my gestuur het” (Luk. 10:16). Met hierdie woorde het Jesus beklemtoon hoe ernstig die verantwoordelikheid is wat aan die dissipels gegee is. Hulle sou Jesus en die Allerhoogste God verteenwoordig! Dit is vandag ook die geval met alle ander mense wat Jesus se uitnodiging aanvaar: “Kom word my volgeling” (Luk. 18:22; 2 Kor. 2:17). Almal wat gunstig hierop reageer, het ’n goddelike opdrag om die goeie nuus van die Koninkryk te verkondig en dissipels te maak. – Matt. 24:14; 28:19, 20.

³ Omdat ons Jesus se uitnodiging aanvaar het om hom te volg, is ons geseën om Jehovah God en Jesus Christus te “leer ken” (Joh. 17:3). Ons is Jehovah se weë geleer. Met sy hulp kon ons die manier waarop ons dink, verander, die nuwe persoonlikheid aantrek en ons gedrag in ooreenstemming met Jehovah se regverdige standaarde bring (Rom. 12:1, 2; Ef. 4:22-24; Kol. 3:9, 10). Ons opregte waardering het ons beweeg om ons lewe aan Jehovah toe te wy en om hierdie toewyding deur waterdoop te simboliseer. Toe ons gedoop is, is ons as bedienaars georden.

⁴ Hou altyd in gedagte dat diens aan God met onskuldige hande en ’n suiwer hart gedoen moet word (Ps. 24:3, 4; Jes. 52:11; 2 Kor. 6:14–7:1). Deur geloof in Jesus Christus het ons ’n rein gewete (Heb. 10:19-23, 35, 36; Op. 7:9, 10, 14). Die apostel Paulus het Christene aangemoedig om alles tot eer van God te doen sodat hulle ander nie laat struikel nie. Die apostel Petrus het beklemtoon hoe belangrik voorbeeldige gedrag is om ongelowiges te beweeg om die waarheid aan te neem (1 Kor. 10:31, 33; 1 Pet. 3:1). Hoe kan jy iemand help om te kwalifiseer om ook ’n bedienaar van die goeie nuus te wees?

NUWE VERKONDIGERS

⁵ Wanneer jy ’n Bybelstudie met ’n belangstellende hou, moet jy hom van die begin af aanmoedig om met ander te praat oor wat hy leer. Hy kan informeel met familielede, vriende, werksmaats en ander praat. Dit is ’n belangrike stap in die proses om nuwelinge te leer om Jesus Christus se voorbeeld as bedienaars van die goeie nuus te volg (Matt. 9:9; Luk. 6:40). Wanneer die nuweling geestelik groei en beter word met informele getuieniswerk, sal hy beslis die begeerte hê om aan die veldbediening deel te neem.

DIE VEREISTES

⁶ Voordat jy iemand nooi om vir die eerste keer saam met jou van huis tot huis te gaan, moet jy seker wees dat hy aan sekere vereistes voldoen. Iemand wat saam met ons in die veldbediening uitgaan, identifiseer hom in die openbaar met Jehovah se Getuies. Daarom word daar aangeneem dat hy reeds sy lewe in ooreenstemming gebring het met Jehovah se regverdige standaarde en ’n ongedoopte verkondiger kan wees.

⁷ Terwyl jy met iemand gestudeer en Bybelbeginsels met hom bespreek het, het jy heel moontlik sy omstandighede leer ken. Jy het moontlik gesien dat hy in ooreenstemming lewe met wat hy geleer het. Maar daar is sekere aspekte van die student se lewe wat die ouermanne met julle twee saam sal wil bespreek.

⁸ Die koördineerder van die liggaam van ouermanne sal reël dat twee ouermanne (waarvan een ’n lid van die dienskomitee is) hierdie sake met jou en die Bybelstudent bespreek. In gemeentes waar daar baie min ouermanne is, kan dit gedoen word deur ’n ouerman en ’n bekwame bedieningskneg. Die broers wat gekies is, moet hierdie bespreking so gou as moontlik probeer hou. As hulle by ’n gemeentelike vergadering uitvind van die student se begeerte, sal dit dalk vir hulle moontlik wees om ná die vergadering met jou en jou student te praat. Die atmosfeer moet ontspanne wees. Voordat die student as ’n ongedoopte verkondiger goedgekeur kan word, moet die volgende in sy geval waar wees:

1. (1) Hy glo dat die Bybel die geïnspireerde Woord van God is. – 2 Tim. 3:16.

2. (2) Hy ken en glo die basiese leerstellings van die Bybel sodat hy in ooreenstemming daarmee sal antwoord wanneer hy vrae gevra word, en nie volgens valse godsdiensleerstellings of sy eie idees nie. – Matt. 7:21-23; 2 Tim. 2:15.

3. (3) Hy gehoorsaam die Bybel se bevel om by gemeentelike vergaderinge met Jehovah se volk te assosieer as dit vir hom moontlik is. – Ps. 122:1; Heb. 10:24, 25.

4. (4) Hy weet wat die Bybel leer oor seksuele onsedelikheid, wat egbreuk, poligamie en homoseksualiteit insluit, en hy lewe in ooreenstemming met hierdie leringe. As die persoon saam met iemand van die teenoorgestelde geslag woon wat nie ’n familielid is nie, moet die twee wettig getroud wees. – Matt. 19:9; 1 Kor. 6:9, 10; 1 Tim. 3:2, 12; Heb. 13:4.

5. (5) Hy gehoorsaam die Bybel se verbod op dronkenskap en is vry van alle niemediese gebruik van natuurlike of sintetiese stowwe wat verslawend is of wat die normale werking van die brein belemmer. – 2 Kor. 7:1; Ef. 5:18; 1 Pet. 4:3, 4.

6. (6) Hy besef hoe belangrik dit is om slegte assosiasie te vermy. – 1 Kor. 15:33.

7. (7) Hy het definitief sy lidmaatskap van alle valse godsdiensorganisasies waaraan hy verbonde was, beëindig. Hy het opgehou om hulle dienste by te woon en hulle bedrywighede te ondersteun of daaraan deel te neem. – 2 Kor. 6:14-18; Op. 18:4.

8. (8) Hy is glad nie betrokke by die politieke sake van die wêreld nie. – Joh. 6:15; 15:19; Jak. 1:27.

9. (9) Hy glo wat Jesaja 2:4 sê en raak nie betrokke by die konflikte van die nasies nie.

10. (10) Hy wil werklik een van Jehovah se Getuies wees. – Ps. 110:3.

⁹ As die ouermanne nie seker is hoe die student oor enige van hierdie sake voel nie, moet hulle hom verder daaroor vra en dalk die tekste wat hier aangegee word, as ’n grondslag vir die bespreking gebruik. Dit is belangrik dat hy verstaan dat diegene wat saam met Jehovah se Getuies aan hulle predikingswerk deelneem, ’n lewe moet lei wat aan hierdie skriftuurlike vereistes voldoen. Wat hy sê, sal die ouermanne help om te bepaal of hy weet wat van hom verwag word en of hy in ’n redelike mate aan die vereistes voldoen om aan die veldbediening te begin deelneem.

¹⁰ Die ouermanne moet dadelik vir die student sê of hy kwalifiseer. In die meeste gevalle kan hulle dit aan die einde van die bespreking doen. As hy kwalifiseer, kan die ouermanne die persoon hartlik as ’n verkondiger verwelkom (Rom. 15:7). Hy moet aangespoor word om so gou as moontlik aan die veldbediening te begin deelneem en aan die einde van die maand ’n velddiensrapport in te gee. Die ouermanne kan verduidelik dat wanneer ’n Bybelstudent kwalifiseer om ’n ongedoopte verkondiger te word en vir die eerste keer velddiens rapporteer, ’n Gemeente se verkondigerverslag in sy naam uitgeskryf en in die gemeente se lêer geplaas word. Die ouermanne maak hierdie persoonlike inligting van die verkondiger bymekaar sodat die organisasie vir die godsdiensbedrywighede van Jehovah se Getuies wêreldwyd kan sorg. So kan die verkondiger ook aan geestelike bedrywighede deelneem en geestelike ondersteuning kry. Die ouermanne kan die nuwe verkondiger ook daaraan herinner dat enige privaat inligting gebruik word in ooreenstemming met die Privaatheidsbeleid van Jehovah se Getuies wat op jw.org gevind kan word.

¹¹ As ons die nuwe verkondiger beter leer ken en persoonlik belangstel in wat hy bereik het, kan dit ’n goeie uitwerking op hom hê. Dit kan hom beweeg om gereeld ’n velddiensrapport in te gee en om selfs meer te doen in sy diens aan Jehovah. – Fil. 2:4; Heb. 13:2.

¹² Wanneer die ouermanne bepaal het dat die Bybelstudent kwalifiseer om aan die veldbediening deel te neem, kan hy sy eie eksemplaar van Georganiseer om Jehovah se wil te doen ontvang. Nadat hy vir die eerste keer velddiens gerapporteer het, moet ’n kort aankondiging aan die gemeente gemaak word dat hy ’n nuwe ongedoopte verkondiger is.

HULP AAN JONGMENSE

¹³ Jong kinders kan ook kwalifiseer om verkondigers van die goeie nuus te wees. Jesus het jong kinders vriendelik ontvang en geseën (Matt. 19:13-15; 21:15, 16). Hoewel kinders hoofsaaklik die verantwoordelikheid van hulle ouers is, sal ander in die gemeente dalk jongmense wil help wie se hart hulle beweeg om aan die Koninkrykspredikingswerk deel te neem. As jy ’n ouer is, sal jou goeie voorbeeld in die veldbediening ’n groot aansporing vir jou kinders wees om ywerig te wees in hulle diens aan God. Hoe kan ’n kind wie se gedrag voorbeeldig is en wat ’n opregte begeerte het om met ander oor sy geloof te praat, verder gehelp word?

¹⁴ Dit sou gepas wees vir die ouer om een van die ouermanne op die Gemeentelike Dienskomitee te nader om te bespreek of die kind kwalifiseer om ’n verkondiger te word. Die koördineerder van die liggaam van ouermanne sal reël dat twee ouermanne (waarvan een ’n lid van die dienskomitee is) saam met die kind en sy gelowige ouer(s) of voog bymekaarkom. As die kind ’n basiese kennis van Bybelwaarheid het en toon dat hy aan die bediening wil deelneem, sal dit wys dat hy goeie vordering gemaak het. Nadat die twee ouermanne hierdie en ander faktore oorweeg het wat soortgelyk is aan dié wat op volwassenes van toepassing is, kan hulle bepaal of die kind ’n ongedoopte verkondiger kan word (Luk. 6:45; Rom. 10:10). Wanneer hulle met ’n jong kind bymekaarkom, hoef hulle nie al die sake met hom te bespreek wat hulle gewoonlik met ’n volwassene deurgaan maar wat beslis nie op ’n kind van toepassing is nie.

¹⁵ Gedurende die bespreking moet die ouermanne die kind vir sy vordering prys en hom aanspoor om daarna te streef om gedoop te word. Aangesien die ouers ongetwyfeld hard gewerk het om die waarheid by hulle kind in te skerp, verdien hulle ook om geprys te word. Om die ouers te help om hulle kind verder by te staan, moet die ouermanne hulle verwys na “’n Boodskap aan Christenouers”, op bladsy 181-183.

TOEWYDING EN DOOP

¹⁶ As jy Jehovah leer ken het en wys dat jy hom liefhet deur aan goddelike vereistes te voldoen en aan die veldbediening deel te neem, moet jy jou persoonlike verhouding met hom hegter maak. Hoe? Deur jou lewe aan hom toe te wy en dit deur waterdoop te simboliseer. – Matt. 28:19, 20.

¹⁷ Toewyding beteken ’n afsondering vir ’n heilige doel. Om jou aan God toe te wy, beteken dat jy hom in gebed nader en plegtig belowe om jou lewe in sy diens te gebruik en om in sy weë te wandel. Dit beteken dat jy hom vir ewig uitsluitlike toegewydheid sal gee (Deut. 5:9). Dit is ’n persoonlike, private saak. Niemand kan dit vir jou doen nie.

¹⁸ Maar jy moet meer doen as om net privaat vir Jehovah te sê dat jy aan hom wil behoort. Jy moet vir ander wys dat jy jou aan God toegewy het. Jy maak dit bekend deur, soos Jesus, in water gedoop te word (1 Pet. 2:21; 3:21). Wat moet jy doen as jy besluit het om Jehovah te dien en gedoop wil word? Jy moet die koördineerder van die liggaam van ouermanne van jou begeerte vertel. Hy sal reël dat verskeie ouermanne met jou praat om seker te maak dat jy aan die goddelike vereistes vir doop voldoen. Vir verdere inligting, hersien asseblief “’n Boodskap aan die ongedoopte verkondiger”, op bladsy 184-186 van hierdie publikasie, en “Vrae vir dié wat gedoop wil word”, op bladsy 187-209.

VERSLAE OOR DIE VOORUITGANG VAN DIE BEDIENING

¹⁹ Verslae oor die wêreldwye uitbreiding van rein aanbidding was oor die jare ’n bron van aanmoediging vir Jehovah se volk. Vandat Jesus Christus die eerste keer vir sy dissipels gesê het dat die goeie nuus oor die hele aarde verkondig sou word, stel ware Christene intens daarin belang om te weet hoe dit gedoen sou word. – Matt. 28:19, 20; Mark. 13:10; Hand. 1:8.

²⁰ Vroeë volgelinge van Jesus het dit geniet om te luister na verslae oor die sukses wat in die predikingswerk behaal is (Mark. 6:30). Die Bybelboek Handelinge sê vir ons dat omtrent 120 persone teenwoordig was toe die heilige gees op Pinkster 33 HJ op die dissipels uitgestort is. Die aantal dissipels het gou toegeneem tot omtrent 3 000 en toe tot ongeveer 5 000. Daar is berig dat “Jehovah voortgegaan [het] om elke dag mense by hulle te voeg wat gered gaan word” en dat “’n groot groep priesters . . . gelowiges geword” het (Hand. 1:15; 2:5-11, 41, 47; 4:4; 6:7). Watter wonderlike aanmoediging moes die nuus van hierdie vermeerdering tog vir die dissipels gewees het! Hoe moes hierdie opwindende verslae hulle tog aangespoor het om met hulle godgegewe werk voort te gaan, al is hulle erg vervolg as gevolg van die Joodse godsdiensleiers!

²¹ Omtrent 60-61 HJ het Paulus in sy brief aan die Kolossense geskryf dat die goeie nuus “groei en versprei in die hele wêreld,” en dat dit “verkondig is in die hele skepping wat onder die hemel is” (Kol. 1:5, 6, 23). Die vroeë Christene was gehoorsaam aan die Woord, en die heilige gees het hulle die krag gegee om ’n ontsaglike predikingswerk voor die einde van die Joodse stelsel van dinge in 70 HJ uit te voer. Hoe aanmoedigend was dit tog vir daardie getroue Christene om verslae te hoor van wat gedoen is!

²² Vandag probeer Jehovah se organisasie ook om verslae te hou van die werk wat gedoen word in vervulling van Matteus 24:14, wat sê: “Hierdie goeie nuus van die Koninkryk sal oor die hele bewoonde aarde verkondig word as ’n getuienis vir al die nasies, en dan sal die einde kom.” As toegewyde knegte van God het ons ’n dringende werk om te doen. Ons moet persoonlik daarin belangstel om te sien dat die predikingswerk deeglik uitgevoer word voordat die einde kom. Jehovah sal seker maak dat hierdie werk voltooi word, en as ons ’n aandeel daaraan het, sal ons Jehovah se hart bly maak. – Eseg. 3:18-21.

JOU PERSOONLIKE VELDDIENSRAPPORT

²³ Presies wat moet ons rapporteer? Die Velddiensrapport-vorm wat deur die organisasie voorsien word, wys watter inligting ingesluit moet word. Maar miskien sal die volgende inligting verder help.

²⁴ In die kolom “Plasings (gedruk en elektronies)” moet jy rapporteer hoeveel publikasies jy gedeel het met persone wat nie gedoopte Getuies is nie. Dit sluit gedrukte en elektroniese publikasies in. Onder “Video’s vertoon” moet jy rapporteer hoeveel kere jy een van ons video’s kon wys.

²⁵ Wanneer jy “Herbesoeke” rapporteer, moet jy al die besoeke tel wat jy gedoen het met die doel om verdere belangstelling te ontwikkel by mense wat nie toegewyde, gedoopte Getuies is nie. ’n Herbesoek kan gedoen word deur iemand persoonlik te besoek, ’n brief te skryf, ’n telefoonoproep te maak, ’n teksboodskap of ’n e-pos te stuur of lektuur af te lewer. Elke keer wanneer ’n tuisbybelstudie gehou word, kan dit as ’n herbesoek getel word. ’n Ouer kan tot een herbesoek elke week tel as ’n ongedoopte kind by is wanneer die ouer die leiding gedurende gesinsaanbidding neem.

²⁶ Hoewel ’n Bybelstudie gewoonlik elke week gehou word, word dit elke maand as net een studie gerapporteer. Verkondigers moet die totale aantal verskillende Bybelstudies wat hulle gedurende die maand gehou het, invul. Dit sluit Bybelstudies in met mense wat nie toegewyde, gedoopte Getuies is nie. As ’n lid van die dienskomitee jou vra om met ’n onbedrywige broer of suster te studeer of as jy met ’n pas gedoopte persoon studeer wat nog nie die boek Geniet die lewe vir ewig! voltooi het nie, kan jy dit ook as ’n Bybelstudie tel.

²⁷ Dit is belangrik om die aantal “Ure” akkuraat te rapporteer. Dit is basies die tyd wat jy bestee aan die huis-tot-huis-bediening, herbesoeke en Bybelstudies, asook die tyd wat jy daaraan bestee om op ander maniere formeel of informeel vir mense te getuig wat nie toegewyde, gedoopte Getuies is nie. As twee verkondigers saam werk, kan albei die tyd tel, maar elkeen sal net sy eie herbesoeke of Bybelstudies tel. As albei ouers hulle kinders gedurende hulle aand vir Gesinsaanbidding help oplei, kan elkeen tot een uur per week tel. Broers kan die tyd tel wanneer hulle ’n openbare toespraak hou. Iemand wat ’n openbare toespraak tolk, kan ook die tyd tel. Daar is noodsaaklike bedrywighede waarvoor tyd nie getel word nie, soos die tyd wat jy gebruik om jou vir velddiens gereed te maak, die velddiensvergadering by te woon, na persoonlike sake om te sien, ensovoorts.

²⁸ Elke verkondiger moet deur sy Bybelopgeleide gewete gelei word wanneer hy biddend besluit wat hy as velddienstyd sal tel. Party verkondigers preek in digbevolkte gebiede, terwyl ander in gebiede werk waar daar min inwoners is en groot afstande afgelê moet word. Gebiede verskil, en verkondigers se beskouing van hulle bediening verskil ook. Die Bestuursliggaam dwing nie hulle gewete op die wêreldwye gemeente af deur vir hulle presies voor te skryf hoe velddienstyd getel moet word nie; verder is niemand anders aangestel om in hierdie saak te oordeel nie. – Matt. 6:1; 7:1; 1 Tim. 1:5.

²⁹ Tyd wat in die velddiens deurgebring word, moet in volle ure gerapporteer word. ’n Uitsondering hierop is wanneer ’n verkondiger min kan doen omdat hy bejaard is, nie sy huis of ’n verpleeginrigting kan verlaat nie of as gevolg van ’n ander rede beperk is. So ’n verkondiger kan velddiens in eenhede van 15 minute rapporteer. Al getuig hy net 15 minute gedurende die maand, moet hy hierdie tyd rapporteer. Hy sal as ’n gereelde Koninkryksverkondiger beskou word. Hierdie reëling is ook van toepassing op ’n verkondiger wat tydelik beperk is, wat miskien ’n maand of so as gevolg van ’n ernstige siekte of besering nie kan rondbeweeg nie. Hierdie voorsiening is net vir diegene wat baie beperk is in hulle bedrywighede. Die dienskomitee sal bepaal of ’n verkondiger vir hierdie reëling kwalifiseer.

DIE GEMEENTE SE VERKONDIGERVERSLAG

³⁰ Jou velddiensrapport vir elke maand word op ’n Gemeente se verkondigerverslag ingevul. Hierdie verslae behoort aan die plaaslike gemeente. As jy na ’n ander gemeente gaan trek, moet jy jou ouermanne laat weet. Die sekretaris sal seker maak dat jou verslag na jou nuwe gemeente aangestuur word. Op hierdie manier is die ouermanne in ’n beter posisie om jou te verwelkom en jou die nodige geestelike ondersteuning te gee. As jy vir minder as drie maande van jou gemeente af weg gaan wees, moet jy asseblief aanhou om jou velddiensrapporte na jou tuisgemeente te stuur.

WAAROM ONS ONS VELDDIENS RAPPORTEER

³¹ Vergeet jy soms om jou velddiensrapport in te gee? Ons moet ongetwyfeld almal van tyd tot tyd hieraan herinner word. Maar as ons die regte gesindheid teenoor rapportering aankweek en verstaan hoekom dit belangrik is, sal dit vir ons makliker wees om te onthou om ons velddiens te rapporteer.

³² Party het al gevra: “Hoekom moet ek ’n rapport aan die gemeente gee? Jehovah weet mos wat ek in sy diens doen.” Ja, Jehovah weet wat ons doen, en hy weet of ons diens heelhartig is of nie. Maar onthou dat Jehovah laat opteken het hoeveel dae Noag in die ark was en hoeveel jare die Israeliete in die wildernis rondgetrek het. God het ’n rekord gehou van hoeveel mense getrou gebly het en van hoeveel ongehoorsaam was. Hy het ’n verslag laat opteken van hoe die land Kanaän progressief verower is en van wat die getroue rigters in Israel gedoen het. Ja, hy het baie besonderhede in verband met die bedrywighede van sy knegte laat opteken. Hy het hierdie geskrewe verslag oor wat plaasgevind het, geïnspireer. So het hy vir ons gewys hoe belangrik dit vir hom is om akkurate verslae te hou.

³³ Geskiedkundige gebeure wat in die Bybel opgeteken is, wys hoe akkuraat die verslae was wat deur Jehovah se volk gehou is. In baie gevalle sou die Bybelverslag nie dieselfde trefkrag gehad het as die spesifieke getalle nie gemeld is nie. Kyk na die volgende voorbeelde: Genesis 46:27; Eksodus 12:37; Rigters 7:7; 2 Konings 19:35; 2 Kronieke 14:9-13; Johannes 6:10; 21:11; Handelinge 2:41; 19:19.

³⁴ Hoewel ons rapporte natuurlik nie alles insluit wat ons in ons aanbidding van Jehovah doen nie, is dit van praktiese waarde vir Jehovah se organisasie. In die eerste eeu, toe die apostels van ’n predikingskampanje teruggekeer het, het hulle Jesus “alles vertel wat hulle gedoen het en vir die mense geleer het” (Mark. 6:30). Soms wys rapporte dat spesiale aandag aan sekere aspekte van ons bediening gegee moet word. Die syfers wys moontlik dat daar vooruitgang in party bedrywighede was, maar dat daar minder vooruitgang was op ander gebiede, soos in die toename in verkondigers. Miskien het die verkondigers aanmoediging nodig of is daar probleme wat opgelos moet word. Verantwoordelike opsieners sal kyk na rapporte en enige dinge probeer regstel wat die vooruitgang van individue of van die gemeente in sy geheel kan belemmer.

³⁵ Rapporte help die organisasie ook om te bepaal waar meer werkers in die veld nodig is. Watter gebiede is produktiewer? Waar word min vooruitgang gemaak? Watter publikasies is nodig om mense te help om die waarheid te leer? Rapporte stel die organisasie in staat om min of meer uit te werk wat die lektuurbehoeftes in die predikingswerk in verskillende dele van die wêreld sal wees en om betyds daarin te voorsien.

³⁶ Die meeste van ons vind rapporte en verslae aanmoedigend. Is ons nie bly wanneer ons hoor van die werk wat ons broers doen om die goeie nuus wêreldwyd te verkondig nie? Verslae oor vermeerdering help ons om ’n geheelbeeld van die groei van Jehovah se organisasie te verkry. Ondervindinge maak ons hart bly, vul ons met ywer en beweeg ons om meer in die predikingswerk te doen (Hand. 15:3). Ons samewerking om velddiensrapporte in te gee, is belangrik en wys dat ons besorgd is oor die broers regoor die wêreld. Deur ons getrouheid in hierdie klein saak, wys ons dat ons onderdanig is aan Jehovah se organisatoriese reëling. – Luk. 16:10; Heb. 13:17.

STEL PERSOONLIKE DOELWITTE

³⁷ Daar is geen rede om ons velddiens met iemand anders s’n te vergelyk nie (Gal. 5:26; 6:4). Elkeen se omstandighede verskil. Maar dit kan vir ons baie nuttig wees om realistiese doelwitte te stel as ’n manier om ons vooruitgang in die bediening te meet. Dit kan ons groot bevrediging verskaf wanneer ons hierdie doelwitte bereik.

³⁸ Dit is duidelik dat Jehovah die insameling bespoedig van diegene wat hy deur “die groot verdrukking” sal beskerm. Ons lewe in die tyd waarin Jesaja se profesie vervul word: “Die kleine sal ’n duisend word, en die onbelangrike ’n magtige nasie. Ek, Jehovah, sal dit op die regte tyd bespoedig” (Op. 7:9, 14; Jes. 60:22). Wat ’n voorreg is dit tog om in hierdie betekenisvolle laaste dae bedienaars van die goeie nuus te wees! – Matt. 24:14.