Jongmense—Kweek ’n sterk verhouding met Jehovah aan
1 Hoe lieflik is die woorde wat in Psalm 24:3-5 gevind word tog: “Wie mag klim op die berg van die Here? En wie mag staan in sy heilige plek? Hy wat rein van hande en suiwer van hart is, wat sy siel nie ophef tot nietigheid en nie vals sweer nie. Hy sal seën wegdra van die HERE en geregtigheid van die God van sy heil.” Ja, Jehovah wil diegene wat suiwer en rein is, diegene wat nie ’n dubbele lewe lei deur vals te sweer nie, as sy intieme vriende hê. Dit is ’n vreugde om te sien dat daardie beskrywing ’n menigte Christenjeugdiges vandag pas. Hulle strek Jehovah en sy organisasie waarlik tot eer. Hulle sedelike reinheid maak hulle pragtig in die oë van God.
2 Is dit vir jongmense maklik om vandag sedelik rein te wees? Nee. Hulle kom daagliks voor uitdagings te staan. Daar is ’n wêreldwye epidemie van onrein invloede en onsedelike gedrag. Wat kan jy doen om jouself te beskerm? Dit is noodsaaklik dat jy ’n sterk verhouding met Jehovah aankweek.
WAT JY MOET DOEN
3 Aangesien ’n sterk verhouding met Jehovah God innige waardering vir Jehovah se eienskappe insluit, is dit belangrik dat jy leer watter soort persoon hy werklik is. Dit verg ’n ernstige Studie van sy Woord en Bybelse publikasies. Soos Timotheüs moet jy ook “jouself voed met die woorde van die geloof en van die goeie leer waarvan jy ’n navolger geword het” (1 Tim. 4:6). Sulke Studie sal jou help om “die lieflikheid van [Jehovah]” te aanskou (Ps. 27:4, vgl. NW). Hoe meer jy van hom leer, hoe nader sal jy aan hom kom.
4 Dit verg tyd en inspanning om so ’n verhouding aan te kweek. Paulus het vir Timotheüs gesê: “Wees vlytig in hierdie dinge, leef daarin, sodat jou vooruitgang vir almal duidelik kan wees” (1 Tim. 4:15). As jy nog nie gedoop is nie, moet jy daarna streef om jou vir toewyding en doop te bekwaam. Aangesien ons na aan die einde van hierdie stelsel is, moet ons let op “watter soort mense” ons behoort te wees wat “dade van godvrugtige toegewydheid” betref (2 Pet. 3:11, NW). Hoe ons oor Jehovah as ons God en Lewegewer voel, is belangrik. As ons ’n innige band met Jehovah aankweek, soos wat iemand met ’n gerespekteerde en dierbare Vader sal hê, sal dit gepaard gaan met dade wat ’n bewys van daardie verhouding sal wees.—Mal. 1:6.
5 Tienduisende jongmanne en -vroue in die organisasie gebruik hulle krag, energie en geesdrif om aan die predikingswerk deel te neem. Hulle is by die Koninkryksaal vir vergaderinge, bereidwillig en voorberei om kommentaar te lewer. Duisende gebruik hulle jeugdige krag in die pionierdiens. Spreuke 20:29 noem krag wat so goed benut word “die sieraad van die jongmanne”. Hoewel dit harde werk in Jehovah se diens verg om ’n sterk persoonlike verhouding met hom aan te kweek, is dit die moeite werd!
6 Talle van julle jongmense het Christenouers wat die weg wat julle moet volg vir julle uitgeskets het. Hulle het vir jou getoon watter stappe jy moet doen om op die pad na die lewe te bly. Luister na jou ouers in die Here (Ef. 6:1). Hulle het jou baie lief en wil hê dat jy gelukkig moet wees. Hulle wil hê dat jy in die nuwe wêreld moet wees. Gee hulle dus jou samewerking in die studietye wat hulle reël. Leef die waarheid uit. Leer alles wat jy kan van Jehovah, en jy sal hom leer liefkry en hom vir ewig dien.