Stel Koninkryksbelange eerste
1 Diegene wat Jesus se raad toepas om eers die Koninkryk te soek, vind dat hulle hul prioriteite in orde moet kry (Matt. 6:33). Hulle vind ook dat dit moontlik is om struikelblokke te bowe te kom wanneer hulle Jesus se raad volg. Dit is prysenswaardig dat baie broers en susters met ongelowige gesinslede getrou voortgaan om Koninkryksbelange eerste te stel.
2 Hoe oortuigend het Jesus tog bewys dat hy die Koninkryk eerste in sy lewe gestel het! Toe hy voor Pilatus tereggestaan het, het hy standvastig gebly (Joh. 18:36, 37). Ja, selfs terwyl hy sterwend aan die folterpaal gehang het, het hy voortgegaan om die hoop van God se Koninkryk te beklemtoon en aan die kwaaddoener gesê: “Jy [sal] saam met My in die Paradys wees.”—Luk. 23:43.
BEREKEN DIE KOSTE
3 Waarom het Jesus die Koninkryk as só belangrik beskou? Hy is van die hemel af gestuur om ‘te getuig vir die waarheid’dat God se Koninkryk in regverdigheid sou regeer en dit moontlik sou maak dat Sy wil soos in die hemel op aarde geskied. Wat ’n groot vreugde dan om deel te hê aan die uitvoering van Jehovah se wil om die aarde in ’n Paradys te omskep, soos hy hom dit oorspronklik voorgeneem het!
4 Indien ons Jesus as ’n voorstander van God se Koninkryk wil navolg, behels dit onder meer dat ons ’n “folterpaal” en alles wat daarmee gepaard gaan, dra. ‘Om die koste te bereken’ beteken dat ’n persoon bereid moet wees om ‘af te sien’ van materiële besittings as hulle sy diens aan God belemmer (Luk. 14:27, 28, 33, vgl. NW). Terselfdertyd het Jesus almal aangemoedig om sy volgelinge te wees en die goeie nuus aan ander te verkondig. Die verkryging van die ewige lewe onder die Koninkryksheerskappy is enige opoffering werd.—Matt. 13:44-46.
MOENIE JULLE KWEL NIE
5 Die verloop van 19 eeue het die belangrikheid om Koninkryksbelange eerste in ons lewe te stel geensins laat afneem nie. Ons kan ons gerus afvra of Jehovah se diens werklik vir ons die belangrikste is. Jesus het verduidelik: “Niemand kan twee here dien nie . . Julle kan nie God én Mammon dien nie!. . . Moenie julle kwel oor jul lewe—wat julle sal eet en wat julle sal drink nie; of oor julle liggaam—wat julle sal aantrek nie” (Matt. 6:24, 25). Kwel ons ons oor ons lewe? Of het ons genoeg geloof om Jesus se raad te volg om eers die Koninkryk te soek en te vertrou dat al hierdie ander dinge vir ons bygevoeg sal word?
6 Party broers het hoër besoldigde betrekkings van die hand gewys omdat die werkrooster op teokratiese bedrywighede inbreuk sou maak. Ander moes van werk verander toe dit met Bybelbeginsels gebots het. Sommige werkgewers het toegewings gedoen om Getuies van Jehovah wat bewys het dat hulle gewillige, betroubare werkers is tegemoet te kom (Kol. 3:23, 24). ’n Gemeente word ongetwyfeld op voortreflike wyse opgebou wanneer ouere manne, bedieningsknegte en pioniers ’n goeie voorbeeld stel deur eers die Koninkryk te soek.
BEPLAN NOU
7 Party van julle jongmense sal aan die einde van die jaar die skool verlaat. Tref jy nou al reëlings om ’n teokratiese loopbaan te volg? Is jy van plan om ’n rukkie voltyds te werk voordat jy met pionierdiens begin? Dit is prysens-waardig dat jy dit oorweeg om in die toekoms die pionierdiens te betree. Maar as die Koninkryk werklik eerste in jou lewe kom en jou omstandighede jou toelaat, waarom stel jy die pionierdiens dan nie eerste nie? Wanneer sekulêre werk die voorkeur geniet, is daar ’n gevaar dat jou hart beswaar sal word deur sorge wat pionierdiens teëwerk.—Matt. 6:27, 34; Luk. 21:34.
8 As ons Koninkryksbelange eerste wil stel, moet ons die Koninkrykswerk ook geldelik ondersteun. Baie individuele broers en gemeentes stuur elke maand bydraes aan die Genootskap, en dit word hoog op prys gestel. Beskikbare syfers toon egter dat die meeste gemeentes in Suid-Afrika nie gereeld bydraes stuur nie. Byvoorbeeld: Van die meer as 1100 gemeentes het slegs 374 gedurende Januarie 1990 bydraes aan die Genootskap gestuur. Ons moet hierdie belangrike saak as individue en gemeentes biddend oorweeg.
9 Nog ’n manier waarop ons toon dat ons Koninkryksbelange eerste stel, is deur ons gemeentelike rekeninge te betaal. Op die oomblik het baie gemeentes ’n nadelige saldo op hulle rekening by die Genootskap. As dit die geval met julle gemeente is, moet julle nie as ’n gemeente saamspan om enige nadelige saldo wat julle het so gou moontlik uit te wis nie? Sodoende sal julle toon dat Koninkryksbelange eerste kom, en dit sal die gemeente ook in staat stel om lektuur te verkry wat onontbeerlik is vir verspreiding in die veld.
10 Hierdie wêreld vereis baie van diegene wat bereid is om hulle af te sloof. As ons ons lewe vereenvoudig en ons van die belangriker dinge vergewis, kan ons seëninge smaak omdat ons eers die Koninkryk soek. Pleks van voor die verlokkinge van hierdie wêreld te swig, is dit tog soveel beter om op Jehova te vertrou, wat ons behoeftes ken en beloof het om daarin te voorsien! As ons Koninkryksbelange eerste stel, sal ons lewe ’n doel hê wat deur die vooruitsig op ewige toekomstige seëninge versterk sal word.—Matt.6:33; 1 Tim 6:17-19.