Verkondig die goeie nuus van die koninkryk met brosjures
1 Watter vreugde is dit tog om die waarheid te ken en om onder diegene te wees wat die goeie nuus ywerig verkondig! Mense wat buite God se organisasie is, het ’n dringende behoefte daaraan om die goeie nuus van die Koninkryk te hoor. Die waarheid aangaande die Koninkryk word op eenvoudige wyse verduidelik in die brosjures Jy kan vir ewig op die aarde lewe!, “Kyk, Ek maak alles nuut” en Die regering wat die Paradys gaan bring. Hulle beeld duidelik die lewe op aarde onder God se Koninkryk uit, en hulle vestig die leser se aandag op die werklikhede van die Koninkryk wat in God se Woord verduidelik word. Om ’n brosjure by ’n belangstellende te laat, is natuurlik net die begin van ons werk (1 Kor. 9:23). Laat ons pligsgetrou teruggaan na almal by wie ons ’n brosjure gelaat het, met die doel om ’n studie in die boek Kennis wat tot die ewige lewe lei aan te bied. Hoe kan ons dit gedurende Augustus doen?
2 Die brosjure “Jy kan vir ewig op die aarde lewe!” kan baie kortliks aangebied word. Terwyl jy die buiteblad wys, kan jy sê:
◼ “Ek wil jou graag iets wys wat ’n pragtige boodskap bevat.” Maak die Lewe op aarde-brosjure oop en lees die eerste paragraaf van die inleiding. Sê dan verder: “Dit beantwoord ook hierdie vraag [blaai na die opskrif bo prent 8]: ‘Waarom sterf die mens?’ Jy sal dit interessant vind om die prente te bestudeer en die tekste te lees wat in hierdie brosjure is. As jy dit wil doen, kan jy hierdie eksemplaar kry teen ’n bydrae van R1,00.”
3 Wat gaan jy sê wanneer jy ’n herbesoek doen by iemand by wie jy die “Lewe op aarde”-brosjure gelaat het? Jy kan hierdie benadering probeer:
◼ Wys prent 49 in die Lewe op aarde-brosjure en vra: “Is dit nie ’n pragtige prent nie? [Wag vir ’n antwoord.] Dit is in die brosjure wat ek laas by jou gelaat het. Ek wil jou graag die vraag op die volgende bladsy vra.” Blaai na prent 50 en lees die vraag: “‘Wil jy vir ewig in daardie pragtige paradys lewe?’ [Wag vir ’n antwoord.] As dit jou begeerte is, let op na wat dit sê jy moet doen: ‘Leer dan meer oor wat God sê.’ [Lees Johannes 17:3.] Ek sal graag die Bybel kosteloos met jou wil studeer. Sal jy daarvan hou?” Maak ’n definitiewe afspraak om terug te kom.
4 Wanneer jy die brosjure “Kyk, Ek maak alles nuut” aanbied, kan jy begin deur die hele prent op die buiteblad te wys en te vra:
◼ “Wat dink jy sal nodig wees om die hele aarde só te laat lyk?” Wag vir ’n antwoord. Beskryf ’n paar van die kenmerke van die prent wat op bladsy 3 gemeld word. Sê dan: “Die meeste mense meen dat dit onmoontlik is om so ’n wêreld tot stand te bring. Maar dit is nie vir God onmoontlik om dit te doen nie. [Bespreek punte in paragraaf 43; lees dan Jesaja 9:5, 6.] God het belowe om ’n nuwe wêreld tot stand te bring waarin mense van alle nasies ’n wonderlike paradys sal geniet. Ek wil graag hê dat jy hierdie brosjure moet lees. Dit sal jou wys hoe jy en jou gesin ’n wonderlike toekoms kan geniet wat God teweeg gaan bring.”
5 Met die herbesoek kan jy die “Kyk”-brosjure gebruik om te verduidelik waarom dit nodig is om meer aangaande die Bybel te leer. Wys dalk weer die buiteblad en sê:
◼ “Toe ek jou hierdie prent die eerste keer gewys het, het ons saamgestem dat ons baie graag in so ’n wonderlike wêreld wil lewe. Om dit moontlik te maak, is daar iets wat ons almal moet doen.” Maak die “Kyk”-brosjure by paragraaf 52 oop; lees die paragraaf en die teks in Johannes 17:3. Verbind die inligting met die illustrasie in paragraaf 53 oor ’n behoorlike Bybelopvoeding, en verduidelik dan dat Jehovah se Getuies sulke onderrigting kosteloos aanbied in ’n persoon se huis. Bied aan om ons studiemetode te demonstreer deur die Kennis-boek te gebruik.
6 Wanneer jy die brosjure “Die regering wat die Paradys gaan bring” aanbied, kan jy iets sê soos:
◼ “Ek het baie mense al hoor sê dat hulle graag onder ’n regering wil lewe wat werklik die groot probleme kan oplos waarmee ons vandag te kampe het. [Meld plaaslike probleme soos werkloosheid, toenemende misdaad of dwelmmisbruik.] Hierdie dinge laat ons baie onveilig voel oor ons toekoms en dié van ons geliefdes. Dink jy dat daar ooit ’n regering sal wees wat hierdie probleme sal oplos? [Wag vir ’n antwoord.] Jy het moontlik al die Onse Vader gebid. Indien wel, het jy geweet dat jy eintlik vir ’n regverdige regering bid?” Blaai na bladsy 3 in die Regering-brosjure, en lees die eerste twee paragrawe. Bied die brosjure aan teen ’n bydrae van R1,00.
7 As jy die brosjure “Die regering wat die Paradys gaan bring” by iemand gelaat het, kan jy die bespreking tydens die herbesoek begin deur te sê:
◼ “Ons het laas gepraat oor die behoefte aan ’n regverdige regering wat die mens se probleme kan oplos. Die brosjure wat ek by jou gelaat het, toon dat God se Koninkryk ons enigste hoop is. Party mense wonder wat daardie regering kan doen om ons lot in die lewe te verbeter. Die Bybel toon dat Christus reeds bewys het dat hy welslae sal behaal waar menseleiers misluk het.” Maak die Regering-brosjure op bladsy 29 oop, en lees die laaste vier paragrawe. Sê dan: “Is dit nie ’n wonderlike toekoms nie? Sal jy dit graag wil sien?” Wag vir ’n antwoord. Lees Johannes 17:3. Spoor die persoon aan om meer te leer deur middel van ’n tuisbybelstudie.
8 As jy ander brosjures gebruik, kan jy jou eie aanbiedings voorberei deur dié wat hier voorgestel word as voorbeelde te gebruik. Maak noukeurige aantekeninge van alle belangstellendes wat gevind word, en maak seker dat jy so gou as moontlik teruggaan. Berei goed voor en vra Jehovah se seën terwyl jy die goeie nuus van die Koninkryk verkondig.