Neem deel aan die werk wat nooit herhaal gaan word nie
1 Jehovah moes verskeie kere gedurende die mensdom se geskiedenis oordeel aan sy vyande voltrek. Vanweë sy barmhartigheid het hy regskapenes egter van ’n geleentheid vir redding voorsien (Ps. 103:13, NW). Hulle reaksie het hulle lot bepaal.
2 Byvoorbeeld, voor die Vloed, in 2370 v.G.J., was Noag “’n prediker van regverdigheid”. Diegene wat gesterf het, was dié wat die Goddelike waarskuwing verontagsaam het (2 Pet. 2:5; Heb. 11:7). Voor die vernietiging van Jerusalem in 70 G.J. het Jesus duidelik uiteengesit watter optrede nodig sou wees as enigiemand die verwoesting wou ontvlug wat oor die stad sou kom. Almal wat sy waarskuwingsboodskap verwerp het, moes die ernstige gevolge daarvan dra (Luk. 21:20-24). Sulke Goddelike waarskuwings en oordele is baie keer deur die geskiedenis heen herhaal.
3 ’n Hedendaagse waarskuwingswerk: Jehovah het lank gelede gesê dat sy toorn teen vandag se goddelose stelsel ontketen sal word en dat net die ootmoediges dit sal oorleef (Sef. 2:2, 3; 3:8). Die tyd om hierdie waarskuwingsboodskap te verkondig, raak vinnig minder! Die “groot verdrukking” is net om die draai, en die ootmoediges word nou ingesamel. Die “lande” is inderdaad ‘wit om geoes te word’. Geen ander werk kan derhalwe hiermee vergelyk word wat belangrikheid en dringendheid betref nie.—Matt. 24:14, 21, 22; Joh. 4:35.
4 Ons moet deelneem aan die werk om ander die hedendaagse waarskuwing te laat hoor, “of hulle luister of nie”. Dit is ’n godgegewe toewysing wat ons nie durf verontagsaam nie (Eseg. 2:4, 5, NAV; 3:17, 18). As ons ’n volle aandeel aan hierdie werk het, voorsien dit ’n oortuigende bewys van ons innige liefde vir God, ons opregte besorgdheid oor ons naaste en ons onwankelbare geloof in ons Verlosser, Jesus Christus.
5 Dit is nou die tyd om op te tree: Ná oordele deur Jehovah in die verlede het goddeloosheid altyd van voor af ontstaan omdat Satan en sy demone steeds bedrywig was. Maar hierdie keer sal dit anders wees. Sataniese invloed sal weggeneem word. ’n Wêreldwye waarskuwing oor ’n naderende “groot verdrukking” sal nooit weer nodig wees nie (Op. 7:14; Rom. 16:20). Ons het die spesiale voorreg om deel te neem aan ’n werk wat nooit herhaal gaan word nie. Dit is nou die tyd vir ons om ten volle van hierdie geleentheid gebruik te maak.
6 Die apostel Paulus het met baie oortuiging aangaande sy predikingsbedrywighede gesê: ‘Ek is rein van die bloed van alle mense’ (Hand. 20:26). Hy het nie bloedskuldig gevoel weens enige versuim om die waarskuwing bekend te maak nie. Waarom nie? Want hy kon van sy bediening sê: “Met dié doel werk ek inderdaad hard en span ek my in” (Kol. 1:29). Laat ons dieselfde bevrediging geniet deur ten volle deel te neem aan die werk wat nooit herhaal gaan word nie!—2 Tim. 2:15.