Les 6

Wat is die Koninkryk van God?

Waar is die Koninkryk van God geleë? (1) Wie is die Koning daarvan? (2)

Heers ander saam met die Koning? Indien wel, hoeveel? (3)

Wat toon dat ons in die laaste dae lewe? (4)

Wat sal God se Koninkryk in die toekoms vir die mensdom doen? (5-7)

1. Toe Jesus op die aarde was, het hy sy volgelinge geleer om vir God se Koninkryk te bid. ’n Koninkryk is ’n regering wat deur ’n koning geregeer word. God se Koninkryk is ’n spesiale regering. Dit is in die hemel opgerig en sal oor hierdie aarde heers. Dit sal God se naam heilig. Dit sal God se wil op die aarde laat geskied soos dit in die hemel geskied.—Matteus 6:9, 10.

2. God het belowe dat Jesus die Koning van Sy Koninkryk sal word (Lukas 1:30-33). Toe Jesus op die aarde was, het hy bewys dat hy ’n goedhartige, regverdige en volmaakte Heerser sal wees. Toe hy na die hemel toe teruggekeer het, is hy nie onmiddellik as Koning van God se Koninkryk gekroon nie (Hebreërs 10:12, 13). In 1914 het Jehovah Jesus die gesag gegee wat Hy hom belowe het. Sedertdien heers Jesus in die hemel as Jehovah se aangestelde Koning.—Daniël 7:13, 14.

3. Jehovah het ook ’n hele paar getroue manne en vroue van die aarde gekies om hemel toe te gaan. Hulle sal saam met Jesus as konings, regters en priesters oor die mensdom heers (Lukas 22:28-30; Openbaring 5:9, 10). Jesus het hierdie medeheersers in sy Koninkryk ’n “klein kuddetjie” genoem. Hulle is 144 000 in getal.—Lukas 12:32; Openbaring 14:1-3.

4. Toe Jesus Koning geword het, het hy Satan en sy bose engele uit die hemel en na die omgewing van die aarde neergeslinger. Dit is waarom toestande hier op die aarde sedert 1914 so sleg geword het (Openbaring 12:9, 12). Oorloë, hongersnode, peste, toenemende wetteloosheid—al hierdie dinge is deel van ’n “teken” wat aandui dat Jesus heers en dat hierdie stelsel in sy laaste dae is.—Matteus 24:3, 7, 8, 12; Lukas 21:10, 11; 2 Timoteus 3:1-5.

5. Jesus sal mense binnekort oordeel en hulle van mekaar afskei soos ’n herder skape van bokke afskei. Die “skape” is diegene wat bewys het dat hulle sy getroue onderdane is. Hulle sal die ewige lewe op die aarde ontvang. Die “bokke” is diegene wat God se Koninkryk verwerp het (Matteus 25:31-34, 46). In die nabye toekoms sal Jesus alle bokagtiges vernietig (2 Tessalonisense 1:6-9). As jy een van Jesus se “skape” wil wees, moet jy na die Koninkryksboodskap luister en toepas wat jy leer.—Matteus 24:14.

6. Die aarde is nou in baie lande verdeel. Elkeen het sy eie regering. Hierdie nasies voer dikwels oorlog teen mekaar. Maar God se Koninkryk sal alle menseregerings vervang. Dit sal as die enigste regering oor die hele aarde heers (Daniël 2:44). Dan sal daar nie meer oorlog, misdaad en geweld wees nie. Alle mense sal in vrede en eenheid saamleef.—Miga 4:3, 4.

7. Gedurende Jesus se Duisendjarige Heerskappy sal getroue mense volmaak word, en die hele aarde sal ’n paradys word. Teen die einde van die duisend jaar sal Jesus alles gedoen het wat God hom gevra het om te doen. Dan sal hy die Koninkryk aan sy Vader teruggee (1 Korintiërs 15:24). Waarom vertel jy nie jou vriende en geliefdes wat God se Koninkryk gaan doen nie?

[Prent op bladsy 13]

Onder Jesus se heerskappy sal daar nie meer haat of vooroordeel wees nie