Doen die predikingswerk en gee ’n deeglike getuienis
1 As “’n leier en ’n aanvoerder” het Jesus sy dissipels voorberei vir die groot predikingswerk wat voorgelê het (Jes. 55:4; Luk. 10:1-12; Hand. 1:8). Die apostel Petrus het die opdrag wat Jesus hulle gegee het, met hierdie woorde beskryf: “Hy [het] ons beveel om vir die volk te preek en om ’n deeglike getuienis te gee dat dit die Een is wat deur God verorden is om regter van die lewendes en die dooies te wees” (Hand. 10:42). Wat behels dit om ’n deeglike getuienis te gee?
2 Ons kan baie leer as ons na die voorbeeld van die apostel Paulus kyk. Toe hy met die ouer manne van die gemeente in Efese vergader het, het hy hulle herinner: “Ek [het] my nie daarvan weerhou . . . om julle alles te vertel wat nuttig is of om julle in die openbaar en van huis tot huis te leer nie. Maar ek het aan Jode sowel as Grieke deeglik oor berou teenoor God en geloof in ons Here Jesus getuig.” Ondanks die beproewinge waarvoor Paulus self te staan gekom het, het hy probeer om soveel mense moontlik met die goeie nuus te bereik. Hy was nie tevrede daarmee om net basiese waarhede oor te dra aan dié wat na hom geluister het nie, maar hy wou “al die raad van God” aan hulle meedeel. Om dit te kon doen, was hy bereid om hom in te span en opofferings te maak. Hy het verder gesê: “Ek [heg] geen waarde aan my siel asof dit vir my dierbaar is nie, as ek maar net my loopbaan kan volbring en die bediening wat ek van die Here Jesus ontvang het, om deeglik van die goeie nuus van die onverdiende goedhartigheid van God te getuig.”—Hand. 20:20, 21, 24, 27.
3 Hoe kan ons vandag Paulus se voorbeeld navolg? (1 Kor. 11:1). Deur na verdienstelike huisgesinne te soek selfs wanneer ons self voor beproewinge te staan kom, deur mense van alle etniese groepe en tale met die goeie nuus te probeer bereik en deur die belangstelling wat ons vind, ywerig te kweek (Matt. 10:12, 13). Dit vereis tyd, inspanning en liefde vir mense.
4 Kan jy as ’n hulppionier dien? Maart en April kan vir jou ’n uitstekende geleentheid wees om ’n deeglike getuienis te gee deur hulppionierdiens te doen. Hoe bemoedigend was dit tog verlede jaar om te sien dat so baie ’n spesiale poging aangewend het om as hulppioniers te dien!
5 ’n Tagtigjarige suster met baie gesondheidsprobleme is geraak deur die aanmoediging wat Jehovah se organisasie gegee het. Sy het geskryf: “Dit het die sprankie ywer wat ek al lank in my hart het, laat vlam vat, en dit het my laat voel dat ek ten minste nog een keer hulppionierdiens moet doen.” Sy het besluit om Maart haar doelwit te maak. “Wat ek eerste gedoen het”, het sy gesê, “is om te gaan sit en die koste te bereken. Ek het dit met my dogter bespreek, want ek sou haar hulp nodig hê. Sy het my verras deur self ’n aansoekvorm in te vul.” Daardie maand het die bejaarde suster 52 uur in die bediening deurgebring. “Ek het dikwels tot Jehovah gebid om my nuwe krag te gee wanneer ek moeg geraak het. Aan die einde van die maand het ek gelukkig en tevrede gevoel, en ek het Jehovah keer op keer bedank omdat hy my gehelp het. Ek sal dit graag weer wil probeer.” Haar gelukkige ondervinding kan ander aanmoedig wat ten spyte van ernstige gesondheidsprobleme graag hulppionierdiens wil doen.
6 ’n Broer wat onverwags sy sekulêre werk verloor het, het die situasie benut om hulppionierdiens te doen. Gedurende hierdie tyd is hy met ywer gevul vir die predikingswerk, en teen die einde van die maand het hy ’n nuwe Bybelstudie begin. Toe hy teruggedink het aan die ondervinding, het hy gesê: “Wat ’n maand!” Hoe verheug was hy tog oor Jehovah se leiding en hulp! Ja, Jehovah het ’n ryk seën op die broer uitgestort omdat hy hom in die bediening ingespan het, en Hy sal dieselfde vir jou doen.—Mal. 3:10.
7 Baie vind dit nie maklik om hulppionierdiens te doen nie. Nietemin het ’n hele aantal broers en susters daaraan deelgeneem ten spyte van sekulêre en gesinsverantwoordelikhede sowel as persoonlike probleme. Om ’n deeglike getuienis te gee, behels dikwels dat ons ons kosbare tyd en energie opoffer, maar dit bring ongeëwenaarde seëninge mee.—Spr. 10:22.
8 Maart en April is ideale maande om aan die hulppionierdiens deel te neem. Daar is vyf naweke in Maart. Party wat voltyds werk, sal moontlik ook hulppionierdiens kan doen as hulle goed gebruik maak van die naweke en die vroeë aandure. Verder kan ’n mens die openbare vakansiedae in April gebruik. Party sal dalk skoolvakansie of verlof van hulle sekulêre werk hê, wat hulle kan help om die vereiste 50 uur te bereik. Ook is die spesiale Tydskrifdag vir Saterdag, 5 April, gereël. Kan jy een van die voorgestelde hulppionierdiensroosters wat by hierdie artikel ingesluit is, gebruik om te beplan hoe jy gedurende Maart of April 50 uur in die bediening kan deurbring? Bespreek jou rooster met ander; dit sal party ongetwyfeld aanspoor om saam met jou aan die bediening deel te neem. As jy nie hulppionierdiens kan doen nie, kan jy ’n spesifieke doelwit vir hierdie maande stel en dié ondersteun wat wel kan pionier. Beplan nou al om gedurende Maart en April meer velddiens te doen.
9 Toon waardering vir die Gedenkmaal: Elke jaar gedurende die Gedenkmaalseisoen beweeg dankbaarheid vir die losprys duisende om die ‘tyd uit te koop’ om hulppioniers te wees (Ef. 5:15, 16). Verlede jaar was daar in Suid-Afrika 8 104 hulppioniers in Maart en 4 929 in April. Dit is ’n gemiddelde van 6 516 vir elk van hierdie twee maande. Vergelyk dit met die gemiddelde van 1 600 wat gedurende elk van die vorige maande van die diensjaar hulppionierdiens gedoen het. (Verlede jaar was daar in Botswana 120 hulppioniers in Maart en 78 in April, in Lesotho 160 en 203, in Namibië 145 en 71, in St. Helena 14 en 4 en in Swaziland 219 en 139.) Hierdie Gedenkmaalseisoen bied ons nog ’n uitstekende geleentheid om ons opregte waardering vir Christus se losprysoffer te toon deur meer in die veldbediening te doen.
10 Terwyl 16 April nader kom, kan jy peins oor wat die Gedenkmaal vir jou beteken. Dink aan die gebeure wat Christus se dood voorafgegaan het en aan die gedagtes wat swaar op sy gemoed en hart gerus het. Dink ook na oor die vreugde wat Jesus voorgehou is en hoe dit hom gehelp het om hierdie mishandeling te verduur. Peins oor sy huidige posisie as Hoof van die gemeente, waarin hy oor die predikings- en dissipelmaakwerk toesig hou (1 Kor. 11:3; Heb. 12:2; Op. 14:14-16). Toon dan jou waardering vir alles wat Christus gedoen het deur soveel moontlik in die predikingswerk te doen na gelang van jou omstandighede.
11 Moedig ander aan om deeglik te wees: As ouer manne en bedieningsknegte aan die hulppionierdiens deelneem, is hulle in ’n goeie posisie om ander aan te moedig. Wanneer hulle saam met verkondigers velddiens doen en wanneer hulle herdersbesoeke doen, bied dit hulle goeie geleenthede om ander persoonlik te help om ’n volle deelname aan hierdie spesiale bedrywigheid te hê. Mag ons almal dit ’n saak van gebed maak en sodoende ons verenigde pogings versterk om ’n deeglike getuienis te gee.
12 Hoewel al die ouer manne en bedieningsknegte sal saamwerk met die gemeentelike reëlings vir groter bedrywighede gedurende Maart en April, moet die diensopsiener in die besonder die reëlings vir die evangelisasiewerk koördineer. Hy moet reël waar die velddiensgroepe gehou gaan word, sowel as dae en tye wat die meeste van die verkondigers sal pas en hy moet dit gereeld laat aankondig. Reëlings kan getref word om ’n paar velddiensvergaderinge op verskillende tye gedurende die dag te hou om almal in die gemeente die geleentheid te gee om aan verskeie aspekte van die getuieniswerk deel te neem. Dit kan insluit om in sakegebied, op straat en van huis tot huis te getuig sowel as om herbesoeke en telefoongetuieniswerk te doen. Verder moet hy reël dat daar genoeg lektuur, tydskrifte en gebied gedurende hierdie maande beskikbaar sal wees.
13 Die aanbod vir Maart sal die Kennis-boek wees, met die doelwit om Bybelstudies te begin. Goeie wenke oor hoe die Kennis-boek aangebied kan word, het in die byvoegsel tot Ons Koninkryksbediening vir Januarie 2002 verskyn. April se aanbod sal Die Wagtoring en Ontwaak! wees. Gebruik gerus die voorgestelde aanbiedings in “Wat ons oor die tydskrifte kan sê”. Almal moet tyd neem om goed voor te berei sodat ons ’n deeglike getuienis kan gee.
14 Hoe geseënd is ons tog om onder leiding van die Hoof van die gemeente, Christus Jesus, te werk en om die voorreg te geniet om die goeie nuus aan ander te verkondig! Terwyl Maart en April nader kom, kan ons weer eens probeer om hierdie twee maande die beste tot nog toe te maak, terwyl ons Christus se opdrag gehoorsaam om die predikingswerk te doen en ’n deeglike getuienis te gee.
[Venster op bladsy 4]
Verskeie maniere om in Maart en April 2003 hulppionierdiens te doen
Dag Ure
Maandag 1 2 — — 2 —
Dinsdag 1 — 3 — — —
Woensdag 1 2 — 5 — —
Donderdag 1 — 3 — — —
Vrydag 1 2 — — — —
Saterdag 5 4 3 5 6 7
Sondag 2 2 3 2 2 3
Maart 56 56 54 55 50 50
April 50 50 51 53 — —
Sal een van hierdie roosters vir jou werk?