Genesing

Definisie: Die proses waardeur ’n persoon wat liggaamlik, verstandelik of geestelik siek was gesond gemaak word. Sommige van die voorchristelike Hebreeuse profete asook Jesus Christus en sekere lede van die vroeë Christengemeente is deur God se gees in staat gestel om mense wonderdadig te genees.

Word wonderdadige genesing in ons dag deur middel van die gees van God bewerk?

Kan die vermoë om wonderwerke te verrig uit ’n ander bron as die ware God kom?

Moses en Aäron het voor Farao van Egipte verskyn om te versoek dat Israel toegelaat word om na die woestyn te gaan om aan Jehovah te offer. As blyk van goddelike steun het Moses Aäron beveel om sy staf neer te gooi, en dit het ’n groot slang geword. Daardie wonderwerk is in God se krag gedoen. Maar toe het die towerpriesters van Egipte hulle stawwe neergegooi en dié het ook groot slange geword (Ex. 7:8-12). In wie se krag het hulle hulle wonderwerk verrig?—Vergelyk Deuteronomium 18:10-12.

In die 20ste eeu word geloofsgenesing verrig tydens dienste wat gehou word deur die geestelikes van die Christendom. In nie-Christelike gelowe is daar voedoe-priesters, toordokters en ander wat mense genees; hulle maak dikwels van die toorkuns en waarsêery gebruik. Sommige “psigiese genesers” sê dat hulle genesings niks met godsdiens te doen het nie. Kom die genesingskrag in al hierdie gevalle van die ware God af?

Matt. 24:24: “Daar sal valse christusse en valse profete opstaan, en hulle sal groot tekens en wonders [“wonderwerke”, NAV] doen om, as dit moontlik was, ook die uitverkorenes te mislei.”

Matt. 7:15-23: “Pas op vir die valse profete . . . Baie sal in daardie dag vir My sê: Here, Here, het ons nie in u Naam geprofeteer en in u Naam duiwels uitgedrywe en in u Naam baie kragte [“wonders”, NAV] gedoen nie? En dan sal Ek aan hulle sê: Ek het julle nooit geken nie. Gaan weg van My, julle wat die ongeregtigheid werk!”

Word die opsienbarende genesings van ons dag op dieselfde wyse verrig as die wonderdadige genesings van Jesus en sy vroeë dissipels?

Die koste van dienste: “Maak siekes gesond, reinig melaatses, wek dooies op, dryf duiwels uit. Julle het dit verniet ontvang, verniet moet julle dit gee” (Matt. 10:8). (Doen hedendaagse genesers dit—gee hulle dit verniet, soos Jesus beveel het?)

Die welslae wat behaal word: “Die hele skare het probeer om Hom [Jesus] aan te raak, omdat krag van Hom uitgegaan het, en Hy het almal gesond gemaak” (Luk. 6:19). “Hulle [het] die siekes op die strate uitgedra en op bedde en draagbare gelê . . . met die bedoeling dat, as Petrus kom, al was dit net sy skaduwee op iemand van hulle sou val. En die menigte van die stede in die omtrek het ook in Jerusalem bymekaargekom en siekes gebring en mense wat deur onreine geeste gekwel was; en hulle is almal genees” (Hand. 5:15, 16). (Word almal wat in ons dag na godsdiensbeoefenaars of na heiligdomme gaan om genees te word, genees?)

Toon die lewenswyse van lede van die organisasies waartoe “genesers” behoort dat hulle God se gees het?

Openbaar hulle, as ’n groep, in uitnemende mate vrugte van die gees soos liefde, lankmoedigheid, sagmoedigheid en selfbeheersing?—Gal. 5:22.

Is hulle waarlik “nie van die wêreld nie” omdat hulle alle betrokkenheid by die wêreld se politieke aangeleenthede vermy? Het hulle in oorlogstyd vry van bloedskuld gebly? Het hulle ’n goeie reputasie omdat hulle die wêreld se onsedelike gedrag vermy?—Joh. 17:16; Jes. 2:4; 1 Thess. 4:3-8.

Word ware Christene vandag geïdentifiseer deur die vermoë om wonderdadige genesings te verrig?

Joh. 13:35: “Hieraan sal almal weet dat julle my dissipels is, as julle liefde onder mekaar het.” (Dit is wat Jesus gesê het. As ons hom werklik glo, soek ons na liefde, nie wonderdadige genesing nie, as bewys van ware Christelikheid.)

Hand. 1:8: “Julle sal krag ontvang wanneer die Heilige Gees oor julle kom, en julle sal my getuies wees . . . tot aan die uiterste van die aarde.” (Net voordat Jesus sy apostels verlaat het om terug te keer hemel toe, het hy vir hulle gesê dat dít, nie genesing nie, die lewensbelangrike werk is wat hulle moes doen. Kyk ook Mattheüs 24:14; 28:19, 20.)

1 Kor. 12:28-30, NAV: “In die kerk is daar mense aan wie God ’n bepaalde taak gegee het. Ten eerste is daar apostels, ten tweede profete, ten derde leraars; verder is daar dié wat wonderdade kan doen, dan dié wat genadegawes ontvang het om mense gesond te maak, om hulp te verleen, om leiding te gee of om ongewone tale of klanke te gebruik. Is almal miskien apostels? Is almal profete? Is almal leraars? Kan almal miskien wonders doen? Het almal die genadegawes om mense gesond te maak?” (Die Bybel toon dus duidelik dat nie alle ware Christene die gawe sou besit om mense te genees nie.)

Toon Markus 16:17, 18 nie dat die vermoë om siekes te genees ’n teken sou wees wat gelowiges identifiseer nie?

Mark. 16:17, 18: “Vir die wat geglo het, sal hierdie tekens volg: in my Naam sal hulle duiwels uitdryf, met nuwe tale sal hulle spreek, slange sal hulle opneem; en as hulle iets dodeliks drink, sal dit hulle geen kwaad doen nie; op siekes sal hulle die hande lê, en hulle sal gesond word.”

Hierdie verse verskyn in sekere Bybelmanuskripte en weergawes van die vyfde en sesde eeu G.J., maar hulle verskyn nie in die ouer Griekse manuskripte, die Sinaiticus en die Vatikaanse manuskrip 1209 van die vierde eeu nie. Dr. B. F. Westcott, ’n gesaghebbende op die gebied van Bybelmanuskripte, het gesê dat “die verse . . . nie ’n deel van die oorspronklike verhaal is nie, maar ’n byvoegsel” (An Introduction to the Study of the Gospels, Londen, 1881, bl. 338). Bybelvertaler Hieronymus het in die vyfde eeu gesê dat “hierdie gedeelte in feitlik al die Griekse kodekse ontbreek” (The Last Twelve Verses of the Gospel According to S. Mark, Londen, 1871, J. W. Burgon, bl. 53). Die New Catholic Encyclopedia (1967) sê: “Die woordeskat en styl daarvan verskil so radikaal van die res van die Evangelie dat dit nouliks moontlik lyk dat Markus dit [dit wil sê, verse 9-20] geskryf het” (Dl. IX, bl. 240). Daar is geen verslag dat vroeë Christene gif gedrink of slange opgeneem het om te bewys dat hulle gelowiges is nie.

Waarom is gawes soos die vermoë om mense wonderdadig te genees aan die eerste-eeuse Christene gegee?

Hebr. 2:3, 4: “Hoe sal ons ontvlug as ons so ’n groot saligheid veronagsaam wat, nadat dit eers deur die Here verkondig is, aan ons bevestig is deur die wat dit gehoor het, terwyl God ook nog saam getuig het deur tekens en wonders en allerhande kragtige dade en bedelinge van die Heilige Gees volgens sy wil?” (Hier was voorwaar oortuigende bewys dat die Christengemeente, wat destyds nuut was, waarlik uit God was. Sou dit nodig wees om dit herhaaldelik te bewys nadat die gemeente behoorlik gevestig was?)

1 Kor. 12:29, 30; 13:8, 13: “Almal is tog nie profete nie . . . ? Het almal genadegawes van gesondmaking, spreek almal in tale . . . ? Die liefde vergaan nimmermeer; maar profesieë—hulle sal tot niet gaan; of tale—hulle sal ophou . . . En nou bly geloof, hoop, liefde—hierdie drie; maar die grootste hiervan is die liefde.” (Wanneer daardie wonderdadige gawes aan hul doel beantwoord het, sou hulle ophou. Maar kosbare eienskappe wat die vrug van God se gees is, sou steeds in die lewens van ware Christene geopenbaar word.)

Is dit werklik belangrik hoe dit gedoen word, solank ’n persoon net genees word?

2 Thess. 2:9, 10: “[Die ongeregtige] se koms is volgens die werking van die Satan met allerhande kragtige dade en tekens en wonders van die leuen en met allerhande verleiding van ongeregtigheid in die wat verlore gaan, omdat hulle die liefde tot die waarheid nie aangeneem het om gered te word nie.”

Luk. 9:24, 25: “Elkeen wat sy lewe wil red, sal dit verloor; maar elkeen wat sy lewe om My ontwil verloor, hy sal dit red. Wat baat dit ’n mens tog as hy die hele wêreld win, maar homself verloor of skade aandoen?”

Watter hoop bestaan daar op ware genesing van alle siektes?

Openb. 21:1-4: “Ek het ’n nuwe hemel en ’n nuwe aarde gesien, want die eerste hemel en die eerste aarde het verbygegaan . . . En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”

Jes. 25:8: “Hy sal die dood vir ewig vernietig, en die Here HERE sal die trane van alle aangesigte afvee.” (Ook Openbaring 22:1, 2)

Jes. 33:24: “Geen inwoner sal sê: Ek is siek nie.”

As iemand sê—

‘Glo jy aan genesing?’

Jy kan antwoord: ‘Enigiemand wat nie glo dat God die krag het om te genees nie, glo nie die Bybel nie. Maar ek kan nie anders as om te wonder of mense vandag reg te werk gaan nie.’ Dan kan jy byvoeg: (1) ‘Ek wil graag vir u ’n teks lees en ek wil hê u moet kyk of u ’n gebruik sien wat vandag baie anders is (Matt. 10:7, 8). . . . Het u ook iets opgemerk wat Jesus gesê het sy dissipels kon doen maar wat genesers vandag nie kan doen nie? (Hulle kan nie dooies opwek nie.)’ (2) ‘Ons oordeel nie ander mense nie, maar dit is opmerklik dat Mattheüs 24:24 iets meld waarteen ons op ons hoede moet wees.’

Of jy kan sê: ‘Ek glo beslis dat wat die Bybel oor genesing sê waar is. Maar enige genesing wat in hierdie stelsel bewerk word, bied slegs tydelike verligting, nie waar nie? Mettertyd sterf ons almal. Sal daar ooit ’n tyd aanbreek wanneer almal wat lewe blakende gesondheid geniet en nooit hoef te sterf nie? (Openb. 21:3, 4).’