STUDIE 43
Gebruik van toegewese materiaal
DIE Bybel vergelyk die Christengemeente met die menseliggaam. Elke deel is noodsaaklik, maar ‘nie almal het dieselfde funksie nie’. In ooreenstemming hiermee moet ons ons toelê op enige voorreg wat aan ons toevertrou is. Dit vereis dat ons enige toespraak wat ons kry, verstaan en goed daarvoor voorberei en nie die belangrikheid van sekere onderwerpe geringskat omdat ons dink dat ander onderwerpe interessanter sou wees nie (Rom. 12:4-8). Die “getroue en verstandige slaaf”-klas het die verantwoordelikheid om geestelike voedsel “op die regte tyd” te voorsien (Matt. 24:45). Wanneer ons ons vermoëns gebruik om toesprake voor te berei volgens die instruksies wat ons ontvang het, toon ons waardering vir daardie reëling. Dit dra by tot die gladde werking van die hele gemeente.
Wat om in te sluit. Wanneer jy ’n toespraak oor ’n sekere onderwerp in die skool moet hou, moet jy sorg dat jy daardie onderwerp bespreek en nie iets anders nie. In die meeste gevalle sal spesifieke naslaanmateriaal voorsien word. As daar nie vir jou gesê word watter gepubliseerde materiaal jy as die grondslag van jou toespraak moet gebruik nie, kan jy self besluit uit watter bronne jy jou materiaal gaan versamel. Maar terwyl jy jou toespraak voorberei, moet jy seker maak dat die hele aanbieding om die toegewese onderwerp ontwikkel is. Wanneer jy besluit wat om in te sluit, sal jy ook jou gehoor in ag moet neem.
Bestudeer die naslaanmateriaal sorgvuldig en ontleed die tekste daarin. Dink dan wat die doeltreffendste manier sal wees om dit tot voordeel van die gehoor te gebruik. Kies twee of moontlik drie punte uit die gepubliseerde materiaal wat jy as hoofpunte in jou toespraak sal gebruik. Kies ook uit die toegewese materiaal die tekste wat jy wil lees en bespreek.
Hoeveel van die materiaal moet jy dek? Slegs wat jy op doeltreffende wyse kan ontwikkel. Moenie baie inligting insluit ten koste van goeie onderrigting nie. As van die materiaal nie by die doel van jou toespraak pas nie, moet jy op dele konsentreer wat jou sal help om daardie doel te bereik. Gebruik inligting uit die toegewese materiaal wat die leersaamste en voordeligste vir jou gehoor sal wees. Jou doel met hierdie spraakraadgewingspunt is nie om te sien hoeveel materiaal jy kan dek nie, maar om die toegewese materiaal te gebruik as die grondslag van jou toespraak.
Jou toespraak is nie bedoel om bloot ’n opsomming van toegewese materiaal te wees nie. Jy moet voorberei om sekere punte te verduidelik, daarop uit te wei, dit toe te lig en moontlik ’n voorbeeld van die toepassing daarvan te gee. Bykomende idees moet gebruik word om belangrike punte in jou toegewese materiaal te ontwikkel en nie om daardie materiaal te vervang nie.
Broers wat bekwaam genoeg is as onderrigters, kan mettertyd gevra word om dele op die Diensvergadering te behartig. Hulle verstaan hoe belangrik dit is om die toegewese materiaal goed te gebruik en dit nie met iets anders te vervang nie. Broers wat openbare toesprake hou, word eweneens sketse gegee om te gebruik. Dit laat ’n mate van aanpasbaarheid toe, maar dit toon duidelik watter hoofpunte ontwikkel moet word, watter stawende argumente gebruik moet word en watter tekste die grondslag van die toespraak vorm. As jy leer hoe om die toegewese materiaal as die grondslag van onderrigting te gebruik, sal dit jou grootliks help om vir ander voorregte as spreker te kwalifiseer.
Hierdie opleiding kan jou ook help om progressiewe tuisbybelstudies te hou. Jy sal leer om die aandag op die studiemateriaal te vestig en nie van die onderwerp af te dwaal deur ander dinge te beklemtoon wat miskien interessant is, maar nie nodig is om die onderwerp te verstaan nie. En tog, as jy die doel van hierdie les verstaan, sal jy nie so onbuigsaam word dat jy nie bykomende verduidelikings sal gee aan ’n student wat dit nodig het nie.