Illustrasies gegrond op bekende situasies

DIT is natuurlik belangrik dat alle illustrasies wat jy gebruik, pas by die materiaal wat jy bespreek. Maar om werklik doeltreffend te wees, is dit net so belangrik dat dit by jou gehoor pas.

Watter uitwerking kan die soort gehoor op jou keuse van illustrasies hê wanneer jy voor ’n groep praat? Wat het Jesus Christus gedoen? Of Jesus nou met die skares of met sy dissipels gepraat het, hy het nie sy voorbeelde op lewenswyses gegrond wat eie was aan lande buite Israel nie. Sulke voorbeelde sou onbekend gewees het vir sy gehoor. Jesus het byvoorbeeld nie melding gemaak van die lewe aan die Egiptiese hof of die godsdiensgebruike van Indië nie. Sy illustrasies was eerder gegrond op bedrywighede wat mense in alle lande in gemeen het. Hy het gepraat van klere heelmaak, sake doen, iets kosbaars verloor en ’n huweliksfees bywoon. Hy het verstaan hoe mense onder verskillende omstandighede reageer, en hy het hiervan gebruik gemaak (Mark. 2:21; Luk. 14:7-11; 15:8, 9; 19:15-23). Aangesien Jesus se openbare bediening veral op die volk Israel toegespits was, het hy hoofsaaklik van voorwerpe en bedrywighede in sy illustrasies melding gemaak wat deel was van hulle daaglikse lewe. Hy het dus verwys na dinge soos boerdery, die manier waarop skape op hulle herder reageer en die gebruik van dierevelle om wyn in te bewaar (Mark. 2:22; 4:2-9; Joh. 10:1-5). Hy het ook na bekende geskiedkundige voorbeelde verwys—die skepping van die eerste mensepaar, die Vloed van Noag se dag, die vernietiging van Sodom en Gomorra, die dood van Lot se vrou, om ’n paar te noem (Matt. 10:15; 19:4-6; 24:37-39; Luk. 17:32). Neem jy ook die bedrywighede wat aan jou gehoor bekend is sowel as hulle kulturele agtergrond in ag wanneer jy illustrasies kies?

Sê nou jy praat met een of miskien net ’n paar mense en nie met ’n groot groep nie? Probeer ’n illustrasie kies wat spesifiek op daardie klein gehoor van toepassing is. Toe Jesus vir ’n Samaritaanse vrou by ’n put naby Sigar getuig het, het hy gepraat van “lewende water”, ‘om nooit dors te word nie’ en ‘’n fontein van water wat opborrel om die ewige lewe te gee’—dit was alles beeldspraak wat direk met daardie vrou se werk verband gehou het (Joh. 4:7-15). En toe hy met manne gepraat het wat hulle visnette gewas het, het die beeldspraak wat hy gebruik het, met die vissersbedryf verband gehou (Luk. 5:2-11). In albei gevalle kon hy na boerdery verwys het, aangesien hulle in ’n landbougebied gewoon het, maar hoeveel beter was dit tog om na die werk te verwys waarmee hulle besig was terwyl hy hierdie beeld geskilder het! Probeer jy dit doen?

Terwyl Jesus hom op “die verlore skape van die huis van Israel” toegespits het, is die apostel Paulus nie net na Israel gestuur nie, maar ook na die heidense nasies (Matt. 15:24; Hand. 9:15). Het dit ’n uitwerking gehad op die manier waarop Paulus gepraat het? Ja. Toe hy aan Christene in Korinte geskryf het, het hy na wedlope verwys, van die gebruik gepraat om maaltye in afgodstempels te eet en op die triomftogte gesinspeel, dinge waarmee daardie nie-Jode bekend sou wees.—1 Kor. 8:1-10; 9:24, 25; 2 Kor. 2:14-16.

Is jy net so versigtig as wat Jesus en Paulus was wanneer jy illustrasies en voorbeelde kies om in jou onderrigting te gebruik? Neem jy die agtergrond en daaglikse bedrywighede van jou gehoor in ag? Die wêreld het natuurlik sedert die eerste eeu verander. Baie mense het deur middel van die televisie toegang tot wêreldnuus. Hulle is dikwels op hoogte van sake in die buiteland. Waar dit die geval is, is dit beslis nie onvanpas om illustrasies op sulke nuusberigte te grond nie. Maar die dinge wat mense die diepste tref, hou gewoonlik verband met hulle persoonlike lewe—hulle huis, hulle gesin, hulle werk, die kos wat hulle eet, die weer in hulle omgewing.

As jou illustrasie lang verduidelikings nodig het, praat jy dalk oor iets waarmee jou gehoor onbekend is. So ’n illustrasie kan maklik die punt van die les oorskadu. As gevolg daarvan sal die gehoor moontlik jou illustrasie onthou, maar nie die skriftuurlike waarheid wat jy probeer oordra het nie.

Jesus het nie ingewikkelde vergelykings getref nie, maar eenvoudige, alledaagse dinge gebruik. Hy het gebruik gemaak van klein dingetjies om groot dinge te verduidelik en van maklike dinge om moeilike dinge op te klaar. Deur geestelike waarhede met alledaagse gebeure in verband te bring, het Jesus mense gehelp om die geestelike waarhede wat hy geleer het, makliker te verstaan en te onthou. Wat ’n uitstekende voorbeeld om te volg!