Maniere om die goeie nuus te verkondig

AS ’N ywerige verkondiger van die goeie nuus het Jesus ’n voorbeeld vir sy volgelinge gestel. Hy het die inisiatief geneem om na mense te gaan en in hulle huise en op openbare plekke met hulle te praat en hulle te leer (Matt. 9:35; 13:36; Luk. 8:1). Jesus het met individue gepraat, sy dissipels privaat geleer en met skares van duisende mense gepraat (Mark. 4:10-13; 6:35-44; Joh. 3:2-21). Hy het elke gepaste geleentheid gebruik om met mense te praat sodat hy hulle kon aanmoedig en hoop kon gee (Luk. 4:16-19). Selfs wanneer hy moeg en honger was, het hy nie die kans laat verbygaan om ’n getuienis te gee nie (Mark. 6:30-34; Joh. 4:4-34). Spoor dit ons nie aan om Jesus na te volg wanneer ons die geïnspireerde verslae van sy bediening lees nie? Beslis, net soos die apostels aangespoor is. – Matt. 4:19, 20; Luk. 5:27, 28; Joh. 1:43-45.

² Kyk na die geleenthede wat Christene vandag het om deel te neem aan die werk wat Jesus Christus byna 2 000 jaar gelede begin het.

DIE PREDIKINGSWERK VAN HUIS TOT HUIS

³ As Jehovah se Getuies besef ons die waarde daarvan om die goeie nuus van die Koninkryk stelselmatig van huis tot huis te verkondig. Ons het hierdie metode al op so ’n groot skaal gebruik dat mense ons daarmee identifiseer. Die bevredigende resultate bevestig hoe wys dit was om hierdie metode te gebruik om miljoene mense in ’n kort tydjie te bereik (Matt. 11:19; 24:14). Die huis-tot-huis-bediening is ’n praktiese manier waarop ons liefde vir Jehovah en vir ons naaste kan wys. – Matt. 22:34-40.

⁴ Die predikingswerk van huis tot huis is nie ’n nuwe metode waarmee Jehovah se Getuies in ons tyd vorendag gekom het nie. Die apostel Paulus sê dat hy mense in hulle huise geleer het. Hy het vir die opsieners in Efese oor sy bediening gesê: “Van die eerste dag af dat ek in die provinsie Asië gekom het, [het] ek nie gehuiwer . . . om julle alles te vertel wat voordelig is . . . en van huis tot huis te leer nie.” Op hierdie en ander maniere het Paulus “vir die Jode en die Grieke getuig oor berou teenoor God en geloof in ons Here Jesus” (Hand. 20:18, 20, 21). Destyds het die Romeinse keisers afgodediens bevorder, en baie mense het “meer vrees vir die gode” gehad. Dit was dringend dat mense soek na “die God wat die wêreld en alles daarin gemaak het”, die Een wat destyds “vir alle mense [gesê het] dat hulle berou moet toon”. – Hand. 17:22-31.

⁵ Vandag is dit selfs dringender om mense met die goeie nuus te bereik. Die einde van hierdie goddelose wêreldstelsel kom vinnig nader. Hierdie kennis beweeg ons om meer te doen. Die heel beste manier om mense te vind wat graag oor die waarheid wil leer, is om van huis tot huis na hulle te soek. Hierdie metode is net so doeltreffend soos in die dae van Jesus en die apostels. – Mark. 13:10.

⁶ Kan jy ’n volle aandeel aan die huis-tot-huis-bediening hê? Indien wel, kan jy seker wees dat jy Jehovah se hart bly maak (Eseg. 9:11; Hand. 20:35). Die huis-tot-huis-bediening is miskien nie vir jou maklik nie. Jy het dalk fisiese beperkings, of jy preek moontlik in ’n gebied waar baie mense nie wil luister nie. Daar is dalk selfs regeringsbeperkings. Dalk is jy skaam en vind jy dit baie moeilik om gesprekke met vreemdelinge te begin. Dit is dalk hoekom jy angstig voel elke keer wanneer jy aan die huis-tot-huis-bediening deelneem. Moenie mismoedig raak nie (Eks. 4:10-12). Jou omstandighede is soortgelyk aan dié van jou broers op baie ander plekke.

⁷ Jesus het sy dissipels belowe: “Wees verseker: Ek is met julle al die dae tot aan die einde van die wêreldstelsel” (Matt. 28:20). Hierdie belofte versterk ons in die dissipelmaakwerk. Ons voel soos die apostel Paulus, wat gesê het: “Vir alles is ek sterk genoeg deur hom wat my krag gee” (Fil. 4:13). Maak ten volle gebruik van gemeentelike reëlings om aan die huis-tot-huis-getuieniswerk deel te neem. As jy saam met ander werk, sal jy aanmoediging en persoonlike hulp ontvang. Bid vir hulp om enige struikelblokke te oorkom, en werk hard as ’n verkondiger van die goeie nuus. – 1 Joh. 5:14.

⁸ Wanneer jy met ander oor die goeie nuus praat, sal jy geleenthede hê om hulle “’n rede vir die hoop wat [jy] het”, te gee (1 Pet. 3:15). Jy sal al hoe meer bewus word van die verskil tussen dié wat die Koninkrykshoop het en dié wat geen hoop het nie (Jes. 65:13, 14). Jy sal tevrede wees omdat jy weet dat jy gehoorsaam is aan Jesus se bevel om ‘jou lig te laat skyn’. Jy sal dalk selfs die voorreg hê om ander te help om kennis in te neem van Jehovah en van die waarheid wat na die ewige lewe lei. – Matt. 5:16; Joh. 17:3; 1 Tim. 4:16.

⁹ Reëlings word gemaak vir huis-tot-huis-werk oor naweke sowel as gedurende die week. In gebiede waar dit moeilik is om mense deur die dag by die huis te kry, maak party gemeentes reëlings vir aandgetuieniswerk. Mense sal dalk meer geneig wees om besoekers laat in die middag of vroeg in die aand te ontvang as in die oggend.

SOEK NA DIÉ WAT DIE BOODSKAP WAARDIG IS

¹⁰ Jesus het sy dissipels beveel om te “soek” na dié wat die boodskap waardig is (Matt. 10:11). Hy het nie net in die huis-tot-huis-bediening na mense gesoek wat ’n goeie gesindheid het nie. Hy het eerder by elke gepaste geleentheid getuig, formeel sowel as informeel (Luk. 8:1; Joh. 4:7-15). Die apostels het ook op verskeie plekke vir mense getuig. – Hand. 17:17; 28:16, 23, 30, 31.

¹¹ Ons doelwit is ook vandag om almal wat ons kan, met die Koninkryksboodskap te bereik. Dit beteken dat ons Jesus en sy apostels se benadering tot die dissipelmaakwerk moet navolg. Ons moet ook byhou met die tye wat verander en die verskillende omstandighede van die mense in ons gebied (1 Kor. 7:31). Byvoorbeeld, verkondigers was al suksesvol wanneer hulle mense by besighede besoek het. Straatgetuieniswerk is in baie lande baie doeltreffend, en so ook getuieniswerk in parke, in parkeerterreine of waar daar ook al mense is. Party gemeentes maak gebruik van tafels of mobiele lektuurstaanders in hulle gebied. Verder sal die takkantoor dalk spesiale openbare getuieniswerk reël in gebiede van ’n stad waar daar baie voetgangers is. Verkondigers uit verskeie gemeentes sal hiervoor gebruik word. So word mense wat nie tydens die huis-tot-huis-werk gevind word nie, moontlik op ander plekke met die goeie nuus bereik.

¹² As ons mense in openbare plekke ontmoet wat wys dat hulle in die Bybel se boodskap belangstel, kan ons ’n gepaste publikasie aanbied. Jy kan jou kontakbesonderhede vir die persoon gee wat belangstel en ’n herbesoek reël sodat jy verder oor die Bybel met hom kan praat. Jy kan dan vir hom ons webwerf, jw.org, wys of hom die adres gee van die naaste plek waar die gemeentelike vergaderinge gehou word. Jy sal moontlik vind dat getuieniswerk in openbare plekke ’n aangename manier is om jou bediening uit te brei.

¹³ Maar die werk wat aan Christene vandag toegewys is, behels meer as om die goeie nuus te verkondig. As jy ander wil help om die waarheid aan te neem wat tot die lewe lei, moet jy belangstellendes herhaaldelik besoek sodat hulle vooruitgang kan maak en ryp Christene kan word.

HERBESOEKE

¹⁴ Jesus het vir sy volgelinge gesê: “Julle sal getuies van my wees . . . tot in die mees afgeleë deel van die aarde” (Hand. 1:8). Maar hy het ook vir hulle gesê: “Gaan dus en maak dissipels van mense van al die nasies, . . . en leer hulle om alles te gehoorsaam wat ek julle beveel het” (Matt. 28:19, 20). Herbesoeke kan ’n bron van vreugde in Jehovah se diens wees. Mense wat in die goeie nuus belanggestel het toe jy hulle die eerste keer besoek het, sal heel moontlik bly wees om jou weer te sien. Deur die Bybel verder met hulle te bespreek, kan jy moontlik hulle geloof in God versterk en hulle help om te besef dat hulle God nodig het (Matt. 5:3). As jy goed voorberei en reël om die herbesoek te doen op ’n tyd wat hulle pas, kan jy dalk ’n tuisbybelstudie begin. Dit sal gewoonlik jou doelwit wees wanneer jy herbesoeke doen. Ons plant nie net die saadjies van waarheid nie, maar gooi dit ook nat. – 1 Kor. 3:6.

¹⁵ Vir party is dit moontlik ’n uitdaging om herbesoeke te doen. Jy vind dit dalk glad nie moeilik om ’n kort aanbieding van die goeie nuus te doen nie, en jy geniet daardie aspek van die bediening. Maar wanneer jy daaraan dink om terug te gaan om ’n Bybelbespreking met die huisbewoner te hê, lyk die uitdaging dalk oorweldigend. Goeie voorbereiding sal jou meer selfvertroue gee. Gebruik gerus die praktiese voorstelle wat by die Lewe en Bediening-vergadering gegee word. Jy kan ook ’n meer ervare verkondiger vra om saam met jou te gaan.

TUISBYBELSTUDIES

¹⁶ Toe die evangelieprediker Filippus met ’n Joodse proseliet gepraat het wat God se Woord gelees het, het hy vir hom gevra: “Verstaan u regtig wat u lees?” Die man het geantwoord: “Hoe kan ek dit ooit verstaan as iemand my nie lei nie?” Die Bybelverslag in Handelinge hoofstuk 8 vertel ons dan dat Filippus met die Skrifgedeelte begin het wat die man gelees het en “hom van die goeie nuus oor Jesus vertel” het (Hand. 8:26-36). Ons weet nie hoeveel tyd Filippus saam met die man deurgebring het om die goeie nuus aan hom te verduidelik nie, maar hy het die man genoeg geleer dat hy ’n gelowige geword het en gevra het om gedoop te word. Hy het ’n dissipel van Jesus Christus geword.

¹⁷ Vandag is daar baie mense wat nie die Bybel ken nie. Daarom is ’n aantal herbesoeke en ’n deeglike studie oor ’n tydperk van weke, maande of selfs ’n jaar of langer dalk nodig voordat hulle geloof kan opbou en kan kwalifiseer om gedoop te word. Maar die geduldige en liefdevolle hulp wat jy aan opregtes van hart gee om dissipels te word, bring sy eie beloning, net soos Jesus gesê het: “Dit maak ’n mens gelukkiger om te gee as om te ontvang.” – Hand. 20:35.

¹⁸ Jy sal ongetwyfeld ’n tuisbybelstudie wil hou deur een van die publikasies te gebruik wat spesiaal vir dié doel voorberei is. Wanneer jy die instruksies volg wat by die Lewe en Bediening-vergadering gegee word en saam met ervare onderrigters in die gemeente werk, sal jy produktiewe studies kan hou en ander kan help om dissipels van Jesus Christus te word.

¹⁹ As jy hulp nodig het om ’n tuisbybelstudie te begin en te hou, kan jy gerus met een van die opsieners praat of met ’n mede-Getuie wat suksesvol is in die Bybelstudiewerk. Die wenke wat in die Lewe en Bediening-vergaderingwerkboek verskyn en by die vergadering gedemonstreer word, sal jou ook help. Vertrou op Jehovah en maak jou begeerte ’n saak van gebed (1 Joh. 3:22). Stel dit vir jou as ’n doelwit om, indien moontlik, ’n tuisbybelstudie te hou behalwe vir die studie wat jy met jou gesin hou. Deur Bybelstudies te hou, sal jy meer vreugde in die bediening hê.

HELP BELANGSTELLENDES OM JEHOVAH SE ORGANISASIE TE LEER KEN

²⁰ Wanneer ons mense help om Jehovah God te leer ken en dissipels van Jesus Christus te word, word hulle deel van die gemeente. Bybelstudente sal geestelike vooruitgang maak en tot rypheid groei as hulle Jehovah se organisasie erken en daarmee saamwerk. Dit is belangrik dat ons hulle leer hoe om dit te doen. Video’s en die brosjure Wie doen vandag Jehovah se wil? is spesiaal vir hierdie doel voorberei. Van die inligting in Hoofstuk 4 van hierdie publikasie kan ook help.

²¹ Van jou heel eerste paar Bybelbesprekings af moet jy die student help om te sien dat Jehovah ’n organisasie gebruik om vandag die predikingswerk op aarde te doen. Beklemtoon die waarde van ons Bybelstudiehulpe en verduidelik hoe dit geproduseer en wêreldwyd versprei word deur vrywillige werkers wat aan God toegewy is. Nooi jou Bybelstudent om vergaderinge saam met jou by die Koninkryksaal by te woon. Verduidelik aan hom hoe die vergaderinge gehou word en stel hom aan die broers en susters voor. Help hom ook om ander Getuies by kring- en streekbyeenkomste te leer ken. Laat die nuweling by hierdie en ander geleenthede self sien hoe Jehovah se volk liefde openbaar, die identifiserende kenmerk van ware Christene (Joh. 13:35). Namate die belangstellende se waardering vir Jehovah se organisasie toeneem, sal hy nader aan Jehovah kom.

BYBELLEKTUUR

²² Die vroeë Christene het ywerige verkondigers van die Woord van God geword. Hulle het afskrifte van die Skrif vir hulle persoonlike gebruik en vir gemeentelike studie gemaak. Hulle het God se Woord van waarheid by ander aanbeveel. Hulle het nie baie handgeskrewe afskrifte gehad nie en dit was vir hulle baie kosbaar (Kol. 4:16; 2 Tim. 2:15; 3:14-17; 4:13; 1 Pet. 1:1). Vandag gebruik Jehovah se Getuies moderne drukmetodes om honderdmiljoene Bybels en Bybelstudiehulpe te publiseer. Dit sluit pamflette, brosjures, boeke en tydskrifte in honderde tale in.

²³ Wanneer jy die goeie nuus aan ander bekend maak, moet jy goed gebruik maak van die Bybelstudiehulpe wat deur Jehovah se organisasie voorsien word. Omdat jy weet hoeveel dit jou gehelp het om die publikasies van Jehovah se Getuies te lees en te studeer, sal jy met ander daaroor wil praat. – Heb. 13:15, 16.

²⁴ Maar ons Bybellektuur is nie die enigste hulpmiddel wat ons het nie. Al hoe meer mense gebruik hoofsaaklik die Internet wanneer hulle inligting soek. Daarom is ons amptelike webwerf, jw.org, ’n doeltreffende hulpmiddel om die goeie nuus te versprei. Mense regoor die wêreld kan ’n rekenaar gebruik om die Bybel of Bybellektuur in honderde tale te lees of na oudio-opnames daarvan te luister. Persone wat huiwer om met ons te gesels of wat in gebiede woon waar hulle min geleenthede het om met Jehovah se Getuies te praat, kan ons oortuigings ondersoek deur jw.org in die privaatheid van hulle huis te gebruik.

²⁵ Daarom adverteer ons jw.org by elke gepaste geleentheid. As ’n huisbewoner ’n vraag oor ons oortuigings vra, kan ons ’n foon, tablet of ’n rekenaar gebruik om hom dadelik die antwoord te wys. As ons iemand ontmoet wat ’n ander taal praat, insluitende ’n gebaretaal, kan ons hom na ons webwerf verwys om die Bybel en Bybellektuur in sy taal te vind. Baie verkondigers het al ’n video op die webwerf gebruik om ’n Bybelbespreking te begin.

INFORMELE GETUIENISWERK

²⁶ Jesus het vir mense wat na hom geluister het, gesê: “Julle is die lig van die wêreld. . . . Julle [moet] julle lig voor mense laat skyn, sodat hulle julle goeie werke kan sien en julle Vader wat in die hemel is, kan verheerlik” (Matt. 5:14-16). Daardie dissipels het as ligte in die wêreld geskyn deur Jesus na te volg, wat van homself gesê het: “Ek is die lig van die wêreld.” Jesus het die voorbeeld vir Christene gestel om “die lig van die lewe” te laat skyn tot voordeel van almal wat wil luister. – Joh. 8:12.

²⁷ Die apostel Paulus het ook ’n goeie voorbeeld gestel wat ons kan navolg (1 Kor. 4:16; 11:1). Terwyl hy in Atene was, het hy elke dag op die markplein getuig vir dié wat daar was (Hand. 17:17). Die Christene in Filippi het sy voorbeeld gevolg. Daarom kon Paulus vir hulle sê dat hulle “in ’n geslag wat sleg en verdraai is”, lewe onder wie ‘hulle as ligte in die wêreld skyn’ (Fil. 2:15). Ons kan vandag die Koninkrykswaarheid deur ons woorde en dade laat skyn wanneer ons ook al die geleentheid kry om ander van die goeie nuus te vertel. Hoewel ons natuurlik deur ons goeie voorbeeld as eerlike en opregte mense kan wys dat ons anders as die wêreld is, sal hulle uitvind hoekom ons anders is as ons oor die goeie nuus met hulle praat.

²⁸ Baie van Jehovah se knegte verkondig die goeie nuus aan mense wat hulle by hulle sekulêre werk, by die skool, op openbare vervoer of van dag tot dag op ander plekke teëkom. Wanneer ons reis, kry ons dalk die geleentheid om met medereisigers te praat. Elkeen van ons moet op die uitkyk wees na geleenthede om ’n gewone gesprek in ’n getuienis te verander. Ons moet voorbereid wees om by elke gepaste geleentheid met ander te praat.

²⁹ Ons sal gemotiveer wees om dit te doen as ons in gedagte hou dat ons op hierdie manier ons Skepper loof en sy naam eer. Wat meer is, ons kan opregtes van hart dalk help om Jehovah te leer ken sodat hulle hom ook kan dien en die hoop op lewe kan hê wat deur geloof in Jesus Christus verkry word. Sulke pogings maak Jehovah se hart bly, en hy beskou dit as heilige diens. – Heb. 12:28; Op. 7:9, 10.

GEBIED

³⁰ Dit is Jehovah se wil dat die Koninkryksboodskap wêreldwyd, in stedelike en in plattelandse gebiede, verkondig moet word. Om hierdie rede ontvang gemeentes sowel as individue wat in afgesonderde plekke dien, gebiedstoewysings van die takkantoor (1 Kor. 14:40). Dit kom ooreen met die reëling wat onder God se leiding in die eerste eeu ingestel is (2 Kor. 10:13; Gal. 2:9). Met die vinnige uitbreiding van die Koninkrykswerk in hierdie laaste dae word baie bereik wanneer die reëling om die gemeente se gebied te dek, goed georganiseer is.

³¹ Hierdie reëling is die diensopsiener se verantwoordelikheid. ’n Bedieningskneg kan die gebied uitgee. Daar is twee soorte gebiede, groepsgebied en persoonlike gebied. As ’n gemeente min gebied het, sal groepopsieners groepsgebied hê waarin verkondigers in die groep kan preek. Maar as ’n gemeente baie gebied het, kan verkondigers persoonlike gebied kry.

³² ’n Verkondiger wat persoonlike gebied het, sal daar kan preek wanneer daar geen velddiensvergaderinge is nie of dit onprakties is om by die groep aan te sluit. Byvoorbeeld, party verkondigers kry gebied naby hulle werksplek en preek daar gedurende hulle etensuur of ná werk. Party gesinne kry persoonlike gebied in hulle buurt en preek party aande daar. As ’n verkondiger persoonlike gebied het wat hy maklik kan bereik, kan dit hom help om goed gebruik te maak van die tyd wat hy velddiens doen. Persoonlike gebied kan natuurlik ook vir groepgetuieniswerk gebruik word. As jy graag persoonlike gebied wil hê, kan jy die gebiedskneg daarvoor vra.

³³ As die groepopsiener gebied vir die groep of ’n verkondiger gebied vir homself kry, moet die persoon wat die gebied gekry het, sy bes probeer om iemand by elke huis te kontak. Reëlings wat gemaak word om die gebied te dek, moet ooreenstem met wette wat mense se inligting beskerm. Enige groepopsiener of verkondiger wat gebied kry, moet dit binne vier maande probeer dek. Wanneer dit gedek is, moet hy die gebiedskneg laat weet. Afhangende van die omstandighede, kan die groepopsiener of verkondiger die gebied hou en dit weer deurwerk of dit aan die gebiedskneg teruggee.

³⁴ Wanneer almal in die gemeente saamwerk, kan die gebied deeglik gedek word. Ons kan ook voorkom dat dieselfde gebied op dieselfde tyd deur twee groepe verkondigers gedek word, iets wat die huisbewoners kan irriteer. Deur dit te doen, is ons bedagsaam teenoor ons broers en die mense in die gebied.

WERK SAAM OM VIR MENSE VAN ALLE TALE TE PREEK

³⁵ Almal moet van Jehovah God, sy Seun en die Koninkryk leer (Op. 14:6, 7). Ons wil graag mense van alle tale help om die naam van Jehovah aan te roep vir redding en om die Christelike persoonlikheid aan te trek (Rom. 10:12, 13; Kol. 3:10, 11). Wat is van die uitdagings wat kan ontstaan wanneer ons die goeie nuus in gebiede verkondig waar verskillende tale gepraat word? Hoe kan hierdie uitdagings hanteer word sodat soveel mense moontlik die kans sal kry om die Koninkryksboodskap te hoor in die taal wat hulle die beste verstaan? – Rom. 10:14.

³⁶ Elke gemeente se gebiedstoewysings word na aanleiding van taal gemaak. In gebiede waar verskillende tale gepraat word, preek verkondigers van verskillende gemeentes dus in dieselfde gebiede. In sulke gevalle is dit die beste dat verkondigers van elke gemeente daarop konsentreer om vir mense te preek wat hulle spesifieke taal praat. Dit geld ook gedurende jaarlikse kampanjes om uitnodigings te versprei. Maar wanneer verkondigers in openbare plekke en informeel getuig, kan hulle met enigiemand praat en lektuur in enige taal aanbied.

³⁷ In party gevalle kan anderstalige gemeentes nie hulle meer afgeleë gebied gereeld dek nie. Wanneer dit die geval is, moet die diensopsieners van die betrokke gemeentes met mekaar kommunikeer om ’n stelsel uit te werk om die gebied te dek wat vir almal aanvaarbaar is. Dit sal almal die geleentheid gee om die Koninkryksboodskap te hoor en sal voorkom dat die werk nie onnodig dubbel gedoen word nie. – Spr. 15:22.

³⁸ Wat moet ons doen as die persoon wat die deur oopmaak, ’n ander taal praat? Ons moenie aanneem dat verkondigers wat sy taal praat, hom sal besoek nie. Party verkondigers het ’n eenvoudige aanbieding geleer in ’n taal wat hulle dikwels in hulle gebied teëkom. Ons kan vir ’n persoon wys hoe hy ons amptelike webwerf, jw.org, kan gebruik om lektuur in sy taal te lees of af te laai of ons kan aanbied om vir hom lektuur in sy taal te bring.

³⁹ As die persoon regtig belangstel, moet ons iemand probeer vind wat hom kan help in ’n taal wat hy verstaan. Ons kan ook vir hom sê waar vergaderinge in sy taal gehou word. As hy wil hê dat iemand wat sy taal praat, hom moet kontak, kan ons vir hom wys hoe hy sy kontakbesonderhede op jw.org kan invul. Die takkantoor sal dan probeer om ’n verkondiger, groep of gemeente in sy omgewing te vind wat hom verder kan help.

⁴⁰ Totdat die belangstellende vir ons sê dat iemand wat sy taal praat, hom gekontak het, moet ons aanhou om hom te besoek. In party gevalle sal die takkantoor die ouermanne laat weet dat niemand gekry kon word wat die persoon se taal praat nie. Wanneer dit gebeur, moet ons ons bes doen om die huisbewoner se belangstelling verder te ontwikkel. Indien moontlik, kan ons die Bybel met hom studeer, dalk met behulp van ’n publikasie in sy taal. As ons goed gebruik maak van die prente en die persoon die tekste laat lees, sal hy ’n basiese begrip van die Bybel verkry. ’n Lid van sy gesin wat sy taal en die plaaslike taal goed genoeg ken, sal dalk bereid wees om die tolk te wees.

⁴¹ Om die belangstellende te help om God se organisasie te leer ken, moet ons hom na ons vergaderinge nooi, al verstaan hy dalk nie alles op die program nie. Wanneer tekste gelees word, kan ons hom help om dit te kry deur ’n Bybel in sy taal te gebruik as een beskikbaar is. Assosiasie met ander in die gemeente kan ook opbouend wees en sal hom help om verdere geestelike vooruitgang te maak.

⁴² Tentatiewe groepe: ’n Tentatiewe groep bestaan uit ’n aantal verkondigers wat in ’n taal preek wat nie die gemeente se taal is nie. Dit kan gevorm word al is daar nie ’n bekwame ouerman of bedieningskneg beskikbaar wat ’n weeklikse vergadering in daardie taal kan hou nie. Die takkantoor kan ’n gemeente kies wat ’n tentatiewe groep kan ondersteun as daar aan die volgende vereistes voldoen word:

(1) As daar baie mense in die gebied is wat ’n taal praat wat nie die gemeente se taal is nie.

(2) Ten minste ’n paar verkondigers ken hierdie taal of is bereid om hierdie taal te leer.

(3) Die liggaam van ouermanne is bereid om die leiding te neem om die predikingswerk in hierdie taal te organiseer.

As die liggaam van ouermanne graag ’n tentatiewe groep wil hê, moet hulle met die kringopsiener praat. Hy is dalk bewus van ander gemeentes wat vir die mense in hierdie taal preek en kan waardevolle inligting gee wat sal help om vas te stel watter gemeente in die beste posisie is om die tentatiewe groep te ondersteun. Wanneer ’n gemeente gekies word, sal die ouermanne ’n brief vir die takkantoor stuur en vra dat hulle amptelik erken word as ’n gemeente wat ’n tentatiewe groep ondersteun.

⁴³ Groepe: Die takkantoor sal ’n gemeente kies wat ’n groep kan ondersteun as daar aan die volgende vereistes voldoen word:

1. (1) Daar is genoeg belangstelling en potensiaal vir groei in ’n spesifieke taalgroep.

2. (2) Ten minste ’n klein groepie verkondigers praat die taal of is besig om dit te leer.

3. (3) ’n Bekwame ouerman of bedieningskneg moet beskikbaar wees om die leiding te neem en ten minste een weeklikse vergadering – of ’n deel van ’n weeklikse vergadering, soos ’n publieke toespraak of ’n Wagtoring-studie – in daardie taal hou.

Wanneer daar in ’n redelike mate aan hierdie vereistes voldoen word, sal die liggaam van ouermanne aan die takkantoor skryf oor al die besonderhede van die groep en vra om amptelik erken te word as ’n gemeente wat ’n groep ondersteun. Die ouerman of bedieningskneg wat die leiding neem, sal beskou word as die “groepopsiener” of “groepkneg” wat die verantwoordelikheid het om na die groep om te sien.

⁴⁴ Wanneer die groep gevorm word, moet die liggaam van ouermanne van die gemeente wat die groep ondersteun, besluit of ander dele van die gemeentelike vergaderinge bygevoeg moet word en hoe dikwels die vergaderinge gedurende die maand gehou kan word. Velddiensvergaderinge kan ook vir die groep gereël word. Almal in die groep werk onder die toesig van die liggaam van ouermanne wat die groep ondersteun. Die ouermanne sal gebalanseerde leiding voorsien en inisiatief aan die dag lê om in die behoeftes van die groep te voorsien. Gedurende die week van die kringopsiener se besoek aan die gemeente wat die groep ondersteun, sal hy saam met die groep werk. Hy sal ’n kort verslag aan die takkantoor stuur oor die vooruitgang van die groep en enige spesifieke behoeftes noem. Mettertyd sal die groep dalk ’n gemeente kan word. As almal teokratiese riglyne volg, sal dit Jehovah gelukkig maak. – 1 Kor. 1:10; 3:5, 6.

GROEPGETUIENISWERK

⁴⁵ Toegewyde Christene het ’n persoonlike verantwoordelikheid om die goeie nuus aan ander te verkondig. Dit kan op baie maniere gedoen word, maar die meeste van ons waardeer die feit dat ons saam met ander velddiens kan doen (Luk. 10:1). Daarom kom gemeentes oor naweke sowel as gedurende die week bymekaar vir velddiens. Vakansiedae is ook goeie geleenthede vir groepgetuieniswerk omdat baie broers nie werk toe gaan nie. Die Gemeentelike Dienskomitee reël dat daar velddiensvergaderinge is op gerieflike tye en plekke gedurende die dag en aande.

⁴⁶ Groepgetuieniswerk gee verkondigers die kans om saam te werk en om ‘mekaar aan te moedig’ (Rom. 1:12). Nuwe verkondigers kan saam met bekwame, ervare verkondigers werk en opleiding ontvang. In party gebiede is dit dalk vir veiligheidsredes beter dat twee of meer verkondigers saam werk. Selfs al is jy van plan om alleen in die gebied te werk, kan dit vir almal aanmoedigend wees as jy saam met die groep bymekaarkom. Net die wete dat ander in dieselfde omgewing velddiens doen, kan baie aanmoedigend wees. Pioniers en ander moenie verplig voel om elke velddiensvergadering by te woon wat deur die gemeente gereël word nie, veral as daar elke dag velddiensvergaderinge is. Maar hulle sal heel moontlik elke week ten minste van die velddiensvergaderinge kan bywoon.

⁴⁷ Mag ons almal die voorbeeld volg wat Jesus en sy apostels gestel het! Ons kan seker wees dat Jehovah ons pogings sal seën om soveel as moontlik te doen in die lewensbelangrike werk om hierdie goeie nuus van die Koninkryk te verkondig. – Luk. 9:57-62.